काठमाडौं । परराष्ट्रमन्त्री शिशिर खनाल प्रि-कोप सम्मेलनमा सहभागी हुन फिजी जाने भएका छन्।

परराष्ट्र मन्त्रालय स्रोतका अनुसार मन्त्री खनाल शनिबार फिजी प्रस्थान गर्ने तयारीमा छन्। यद्यपि, मन्त्रालयले उनको भ्रमणबारे औपचारिक जानकारी सार्वजनिक गरिसकेको छैन।

नोभेम्बर ९ देखि टर्कीमा आयोजना हुने कोप-३१ सम्मेलनअघि त्यसको तयारी बैठकका रूपमा प्रि-कोप सम्मेलन फिजीमा हुँदैछ। सोही सम्मेलनमा सहभागी हुन मन्त्री खनाल फिजी जान लागेको स्रोतको भनाइ छ।

जलवायु परिवर्तनसम्बन्धी संयुक्त राष्ट्रसंघीय खाका महासन्धिअन्तर्गत हुने कोप सम्मेलनअघि प्रि-कोप बैठक आयोजना हुँदै आएको छ। मुख्य सम्मेलनमा छलफल हुने एजेन्डा र जटिल विषयमा प्रि-कोपमै छलफल गरी सहमति जुटाउने प्रयास गरिन्छ।

जलवायु वित्त, हानि तथा क्षति, कार्बन उत्सर्जन न्यूनीकरणलगायत विषय कोप सम्मेलनका प्रमुख एजेन्डा हुन्। मुख्य सम्मेलनको समय सीमित हुने भएकाले कतिपय विषयमा प्रि-कोप बैठकमै विस्तृत छलफल गर्ने गरिन्छ।

यसैबीच, नोभेम्बर ९ देखि टर्कीमा सुरु हुने कोप-३१ मा नेपालको प्रतिनिधिमण्डलको नेतृत्व कसले गर्ने भन्ने टुंगो लागिसकेको छैन। टर्कीबाट प्रधानमन्त्री वालेन्द्र (बालेन) शाहलाई निमन्त्रणा आएको भए पनि उनी सम्मेलनमा सहभागी हुने वा नहुनेबारे निर्णय भइसकेको छैन।

गत भदौ १० गते आएको बाढीबाट नेपालले ठूलो क्षति व्यहोरेको छ। जलवायु परिवर्तनसँग सम्बन्धित विपद्का रूपमा उक्त घटनालाई प्रस्तुत गर्दै नेपालले जलवायुजन्य क्षतिको क्षतिपूर्ति, जलवायु वित्त र कार्बन उत्सर्जन न्यूनीकरणका विषयलाई अन्तर्राष्ट्रिय मञ्चमा उठाउने तयारी गरेको छ।

केही समयअघि सम्पन्न संयुक्त राष्ट्रसंघको ८१औँ महासभामा समेत नेपालले जलवायु परिवर्तनको विषयलाई प्राथमिकताका साथ उठाएको थियो। प्रि-कोप बैठकमार्फत नेपालले कोप-३१ का लागि आफ्ना प्राथमिकता र एजेन्डालाई थप स्पष्ट पार्ने अपेक्षा गरिएको छ।