काठमाडौं । साताको अन्तिम कारोबार दिन शुक्रबार नेपाल स्टक एक्सचेन्ज (नेप्से) परिसूचक दोहोरो अंकले बढेको छ। नेप्से १७.१५ अंकले उकालो लाग्दै २ हजार ५९१.८० विन्दुमा बन्द भएको हो।

बजारमा कारोबार रकमसमेत बढेको छ। अघिल्लो दिन बिहीबार ३ अर्ब ९३ करोड रुपैयाँको सेयर कारोबार भएकोमा शुक्रबार ४ अर्ब ८३ करोड रुपैयाँ बराबरको कारोबार भएको छ।

यस दिन ३५३ वटा धितोपत्रका १ करोड २९ लाख ५ हजार ९४२ कित्ता सेयर किनबेच भएका छन्। कारोबारमा आएका कम्पनीमध्ये १८० वटाको सेयर मूल्य बढेको छ भने ८९ वटाको घटेको छ। १० कम्पनीको मूल्यमा भने कुनै परिवर्तन भएन।

शुक्रबार कुथेली बुखरी स्मल हाइड्रोपावरको सेयर मूल्य सर्वाधिक ४.९१ प्रतिशतले बढेको छ। यसको प्रतिकित्ता मूल्य ९७० रुपैयाँ पुगेको छ। त्यस्तै, सिन्धु विकास बैंकको मूल्य ४.२२ प्रतिशतले बढेर प्रतिकित्ता ४२७ रुपैयाँ ३० पैसा कायम भएको छ।

यस दिन रिज लाइफ इनर्जीको सेयर मूल्य सर्वाधिक ७.८५ प्रतिशतले घटेको छ। कम्पनीको प्रतिकित्ता मूल्य ६६८ रुपैयाँमा झरेको छ। आइसिएफसी फाइनान्स डिबेन्चरको मूल्य पनि २.९० प्रतिशतले घटेर प्रतिडिबेन्चर १ हजार १७० रुपैयाँ कायम भएको छ।

कारोबार रकमका आधारमा कुमारी बैंक शीर्ष स्थानमा रहेको छ। बैंकको प्रतिकित्ता २३१ रुपैयाँका दरले २१ करोड ११ लाख रुपैयाँ बराबरको सेयर कारोबार भएको हो। बैंकको सेयर मूल्य अघिल्लो दिनको तुलनामा १.४० प्रतिशतले बढेको छ।

त्यस्तै, हिमाल घलेम्दी हाइड्रोको २० करोड ३७ लाख रुपैयाँ बराबरको सेयर कारोबार भएको छ। कम्पनीको प्रतिकित्ता २८५ रुपैयाँ १० पैसाका दरले सेयर किनबेच भएको हो।

शुक्रबार कारोबारमा आएका १३ वटै समूहगत परिसूचक बढेका छन्। तीमध्ये बैंकिङ समूहको परिसूचक सर्वाधिक १.२८ प्रतिशतले उकालो लागेको छ। सबै समूहमा देखिएको वृद्धिले समग्र नेप्से परिसूचकलाई सकारात्मक दिशा दिएको हो।