काठमाडौं । परीक्षामा सहभागी नै नभएका जापानमा रहेका १३ जनाको नाममा सवारी चालक अनुमतिपत्र जारी गरेको आरोपमा यातायात व्यवस्था कार्यालय, सवारी चालक अनुमतिपत्र रुपन्देहीका तत्कालीन कार्यालय प्रमुख तेजनारायण यादवसहित सात जनाविरुद्ध भ्रष्टाचार मुद्दा दायर भएको छ।

अख्तियार दुरुपयोग अनुसन्धान आयोगले सरकारी कागजातमा केरमेट गरी परीक्षाको नतिजा हेरफेर गरेर विदेशमा रहेका व्यक्तिका नाममा लाइसेन्स जारी गरिएको निष्कर्षसहित उनीहरूविरुद्ध विशेष अदालतमा मुद्दा दायर गरेको हो।

मुद्दा खेप्ने अन्यमा तत्कालीन मेकानिकल सुपरभाइजर यादवप्रसाद अर्याल, अधिकृतस्तर सातौँ तहका तुल्सिराम अधिकारी, छैटौँ तहका राजीव अर्याल तथा लुम्बिनी प्रदेश ट्राफिक प्रहरी कार्यालय रुपन्देहीका तत्कालीन प्रहरी नायब उपरीक्षक डिल्लीनारायण पाण्डेय, प्रहरी निरीक्षक गणेश ज्ञवाली र प्रहरी नायब निरीक्षक हुमानन्द खनाल रहेका छन्।

अख्तियारका अनुसार उनीहरूको मिलेमतोमा सरकारी कागजात केरमेट गर्नुका साथै परीक्षाको परिणामसमेत परिवर्तन गरिएको थियो। त्यसरी अनियमितता गरी वैदेशिक रोजगारीका सिलसिलामा जापानमा रहेका र परीक्षामा उपस्थित नभएका १३ जनाको नाममा सवारी चालक अनुमतिपत्र जारी गरिएको पाइएको आयोगको ठहर छ।

आयोगले प्रतिवादीहरूलाई भ्रष्टाचार निवारण ऐन, २०५९ बमोजिम कैद र जरिवाना सजाय गर्न मागदाबी गरेको छ।