काठमाडौं । न्याय सेवा आयोगले न्याय सेवाका अधिकृतहरूको जिम्मेवारी व्यापक रूपमा हेरफेर गर्ने भएको छ।

आयोगको असोज १४ गतेको निर्णयअनुसार ११ सहसचिव र ४३ उपसचिवसहित ५४ जना अधिकृतको सरुवा सिफारिस गरिएको छ।

कानुन समूहका राजपत्राङ्कित प्रथम श्रेणी अर्थात् सहसचिव वा सोसरहका ११ अधिकृतलाई विभिन्न निकायमा सरुवा गर्न आयोगले सिफारिस गरेको हो।

त्यस्तै, राजपत्राङ्कित द्वितीय श्रेणी अर्थात् उपसचिव वा सोसरहका ४३ अधिकृतको पनि विभिन्न मन्त्रालय, विभाग, आयोग तथा प्रदेशस्तरीय निकायमा सरुवा सिफारिस गरिएको छ।

सरुवा मात्रै होइन, न्याय सेवा आयोगले नयाँ नियुक्ति पाएका उपसचिव तहका अधिकृतहरूको पदस्थापनसमेत सिफारिस गरेको छ। न्याय, कानुन र सरकारी वकिल समूहअन्तर्गतका नौ उपसचिव तहका अधिकृतको नियुक्ति तथा पदस्थापन गरिएको हो।

आयोगको पछिल्लो निर्णयसँगै न्याय सेवाका उच्च तहका अधिकृतहरूको जिम्मेवारी र कार्यस्थलमा व्यापक फेरबदल हुने भएको छ।

आयोगले सहसचिव र उपसचिवको सरुवा सिफारिसको विवरण छुट्टाछुट्टै सार्वजनिक गरेको छ।