काठमाडौं । नेपाली कम्युनिष्ट पार्टी (नेकपा) ले आगामी कार्तिक ७ गतेदेखि दुईमहिने राष्ट्रिय जागरण अभियान सञ्चालन गर्ने निर्णय गरेको छ।

पार्टी कार्यालय पेरिसडाँडामा शुक्रबार बसेको केन्द्रीय संयोजन समितिको बैठकले कार्तिक ७ देखि मंसिर २५ गतेसम्म अभियान सञ्चालन गर्ने निर्णय गरेको हो।

नेकपाका प्रवक्ता प्रकाश ज्वालाका अनुसार महाधिवेशनको तयारी, स्थानीय तथा प्रदेश निर्वाचनको तयारी र सरकारका जनविरोधी तथा अराजक गतिविधिविरुद्ध आन्दोलनको तयारी गर्ने उद्देश्यले अभियान सञ्चालन गर्न लागिएको हो। बैठकले अभियानसम्बन्धी कार्यविधिसमेत पारित गरेको छ।

बैठकले पार्टीका संगठनात्मक गतिविधिलाई तीव्रता दिने निर्णय पनि गरेको छ। जसअनुसार पुस ११ गते देशभरका सबै वडामा एकैदिन अधिवेशन गरिनेछ भने माघ १५ गते सबै पालिकामा पालिकास्तरीय अधिवेशन सञ्चालन गरिनेछ।

स्थानीय तहको निर्वाचनपछि जिल्ला, प्रदेश हुँदै राष्ट्रिय महाधिवेशन आयोजना गरिने प्रवक्ता ज्वालाले जानकारी दिएका छन्।

त्यसैगरी, ‘ग्रे जोन’ पत्रिकाको रिपोर्टमा उल्लेखित राष्ट्रिय स्वाधीनतासँग सम्बन्धित विषयमा सरकारले आफ्नो आधिकारिक धारणा सार्वजनिक गर्नुपर्ने मागसहित बैठकले विशेष प्रस्ताव पारित गरेको छ।

बैठकले युवा सहभागितालाई प्राथमिकता दिँदै पार्टीका कार्यक्रमहरूमा ५० प्रतिशत युवा सहभागिता सुनिश्चित गर्ने निर्णयसमेत गरेको छ।

साथै प्रवासमा पार्टीको काम विस्तार गर्ने, श्रमजीवी मजदुर र किसानबीचका गतिविधिलाई थप सशक्त बनाउने तथा ती कामलाई व्यवस्थित रूपमा अघि बढाउने निर्णय भएको प्रवक्ता ज्वालाले बताए।