काठमाडौं । महिलामाथि धम्की दिएको, अश्लील गालीगलौज गरेको र पैसा मागेर दबाब दिएको अडियो सार्वजनिक भएपछि राष्ट्रिय स्वतन्त्र पार्टी (रास्वपा) का सांसद खगेन्द्र सुनार विवादमा परेका छन्।

जनआस्थाले सार्वजनिक गरेको विवरणमा सुनारसँग जोडिएका चारवटा अडियो संवादमा महिलालाई धम्की दिएको र पैसाको मागेको सुनिन्छ ।

विवरणअनुसार, ती महिलाले सुनारमाथि आफ्नो नग्न भिडियो बनाएको र त्यसपछि आफूलाई निरन्तर दुःख दिएको बताएकी छन् । अडियो संवादमा महिलाले आफ्नो पीडा सुनाउँदै यस्तो व्यवहार कहिलेसम्म सहने भन्दै प्रश्न गरेको सुनिन्छ।

सुनारले महिलालाई अश्लील शब्द प्रयोग गर्दै धम्क्याएको र पैसा मागेको सुनिन्छ। फोन संवादमा महिलाको फेसबुक खाता निष्क्रिय गरेको विषयमा सुनार आक्रोशित भएको र खाता पुनः सक्रिय नगरे परिणाम भोग्नुपर्ने चेतावनी दिएका छन् ।

बागमती प्रदेशकी पूर्वराज्यमन्त्रीसमेत रहेकी ती महिलालाई अडियोमा तत्काल राजीनामा दिन निर्देशन दिएको सुनिन्छ । महिलाले आफ्नो नग्न भिडियो बनाएको विषय उठाउँदा पनि आफूलाई किन यातना दिइरहेको भन्दै प्रश्न गरेकी छन्।

अडियोमा आपत्तिजनक अभिव्यक्ति

सार्वजनिक विवरणअनुसार, संवादमा महिलाले पैसा दिन नसकेको भन्दै आफूलाई दबाब दिइएको गुनासो गरेकी छन्। त्यसपछि सुनारले पैसा चाहिएको र साँझसम्म उपलब्ध गराउनुपर्ने चेतावनी दिएका छन् ।

अर्को संवादमा महिलालाई अपमानजनक शब्द प्रयोग गरेको र बलात्कारसम्बन्धी आपत्तिजनक टिप्पणी गरे।
यी संवादले सार्वजनिक पदमा रहेका व्यक्तिको भाषा र व्यवहारबारे प्रश्न उठाएका छन्।

अडियो सार्वजनिक भएपछि सुनारको भूमिकाबारे प्रश्न उठेका छन्। उनको प्रतिक्रिया लिन खोज्दा फोन अफ थियो। रास्वपाका प्रवक्ता जगदीश खरेलले पनि तत्काल प्रतिक्रिया दिन अस्वीकार गरे।
गम्भीर आरोप सार्वजनिक भएपछि सम्बन्धित सांसदले आफ्नो धारणा राख्नु र पार्टीले घटनाबारे स्पष्ट पार्नु आवश्यक हुन्छ। आरोप लागेकै आधारमा दोषी ठहर गर्न मिल्दैन। तर आरोपको निष्पक्ष छानबिनबाट पन्छिनु पनि उचित हुँदैन।

सुनारसँग जोडिएको अडियोको सत्यता के हो? महिलाले लगाएका आरोपको वास्तविकता के हो? पैसा मागिएको भनिएको संवादको सन्दर्भ के हो? यी प्रश्नको उत्तर प्रमाण र निष्पक्ष अनुसन्धानबाट आउनुपर्छ।

जनताको प्रतिनिधि भएकाले सुनारले उठेका प्रश्नको तथ्यपूर्ण जवाफ दिनु र रास्वपाले निष्पक्ष छानबिनमा सहयोग गर्नु आवश्यक छ।