काठमाडौं। राष्ट्रिय स्वतन्त्र पार्टी (रास्वपा) का सांसद खगेन्द्र सुनारले छताछुल्ल भएको विवादास्पद अडियोमा आफ्नो संलग्नता नरहेको दाबी गर्दै आफूमाथि उठेका सबै आरोपको निष्पक्ष छानबिन गर्न चुनौती दिएका छन्। 

प्रहरीभित्रको भ्रष्टाचारबारे संसद्को सार्वजनिक लेखा समितिमा प्रश्न उठाएपछि आफूलाई नियोजित रूपमा घेराबन्दीमा पारेर चरित्रहत्या गर्न खोजिएको उनको आरोप छ।

दाङबाट आफ्नो धारणा सार्वजनिक गर्दै सुनारले पछिल्लो समय आफूविरुद्ध विभिन्न आरोप, टीकाटिप्पणी र विवाद सिर्जना गर्ने प्रयास भइरहेको बताए। 

कहिले घुस खाएको, कहिले भ्रष्टाचार गरेको त कहिले विभिन्न व्यक्तिसँग जोडेर आरोप लगाइएको उल्लेख गर्दै उनले सार्वजनिक भएको पछिल्लो अडियोलाई पनि आफूलाई बदनाम गर्ने अभियानकै एउटा हिस्साका रूपमा व्याख्या गरे।

उनले अडियोमा सुनिएको आवाज र त्यसमा प्रस्तुत गरिएको पात्र आफू नभएको दाबी गरेका छन्। अडियोको सत्यता र त्यसमा आफ्नो संलग्नताबारे निष्पक्ष अनुसन्धान हुनुपर्ने उनको भनाइ छ। 

सुनारले आफूविरुद्ध अहिले भइरहेको गतिविधिलाई प्रहरी संगठनभित्रको भ्रष्टाचारबारे उठाएको प्रश्नसँग जोडेर हेरेका छन्। 

उनका अनुसार सार्वजनिक लेखा समितिमा प्रहरीभित्रको अनियमितताबारे निर्मम ढंगले प्रश्न उठाएपछि आफूलाई विभिन्न माध्यमबाट दबाबमा पार्ने प्रयास भएको हो।

उनले प्रहरी प्रधान कार्यालयदेखि केन्द्रीय अनुसन्धान ब्युरो (सीआईबी) सम्मका निकायले आफूविरुद्ध प्रमाण जुटाउने, मुद्दा हाल्न सक्ने व्यक्तिहरू खोज्ने र आफ्नो विपक्षमा बोल्न सक्ने मानिस पहिचान गर्ने काम गरेको आरोप लगाए।

आफ्नो सम्पर्कमा रहेका साथीभाइ, इष्टमित्र र अन्य व्यक्तिलाई समेत विभिन्न माध्यमबाट सम्पर्क गरी आफूविरुद्ध लाग्न प्रेरित गरिएको उनको दाबी छ। मुद्दा हालेमा पैसा, सम्मान तथा अन्य सहयोग उपलब्ध गराउने प्रलोभनसमेत दिइएको उनले आरोप लगाए।

सुनारका अनुसार, आफूविरुद्ध मुद्दा हाल्न तयार हुने व्यक्ति नभेटिएपछि सामाजिक सञ्जाल र सञ्चारमाध्यमलाई प्रयोग गरेर बदनाम गर्ने प्रयास भइरहेको छ। उनले यस्ता गतिविधिलाई सामान्य आरोपप्रत्यारोपभन्दा माथि उठेर हेर्नुपर्ने भन्दै राज्यका निकायको कार्यशैलीमाथि नै प्रश्न उठाएका छन्।

सामाजिक सञ्जालमा सार्वजनिक भएको अडियोले विवाद चर्किएपछि सुनारले त्यसमा आफ्नो संलग्नता अस्वीकार गरेका छन्। उनले आफूलाई एउटा काल्पनिक पात्रसँग जोडेर प्रस्तुत गरिएको र त्यस क्रममा महिलासमेत जोडेर चरित्रहत्या गर्ने प्रयास भएको आरोप लगाए।

उनका अनुसार, विभिन्न व्यक्तिका तस्बिर, आवाज वा अन्य सामग्रीलाई जोडेर आफूविरुद्ध भ्रम सिर्जना गर्ने काम भइरहेको छ। उनले प्रविधि, कृत्रिम बुद्धिमत्ता (एआई) वा अन्य व्यक्तिमार्फत आवाज तयार पारेर आफूलाई फसाउने प्रयास भएको हुन सक्ने आशंका व्यक्त गरे।

सुनारले आफूमाथि उठेका प्रश्नबाट भाग्ने मनसाय नरहेको स्पष्ट पारेका छन्। बरु आफू, आफूसँग सम्बन्धित व्यक्ति र आफ्नो सम्पर्कमा रहेका मानिसहरूका विषयमा समेत आवश्यक अनुसन्धान गर्न उनले राज्यलाई आग्रह गरेका छन्।

आफ्नो व्यक्तिगत सम्बन्ध, आर्थिक लेनदेन, झैझगडा, मेलमिलाप वा अन्य कुनै विषयमा प्रश्न उठेको भए त्यसको समेत छानबिन गर्नुपर्ने उनको भनाइ छ।

उनले आफूमाथि निष्पक्ष अनुसन्धान हुनुपर्ने माग गर्दै राजनीतिक संरक्षण वा दयाको अपेक्षा नरहेको पनि बताएका छन्। आफू दोषी ठहरिए कानुनले तोकेको सजाय भोग्न तयार रहेको उनको दाबी छ।

यस क्रममा उनले आवश्यक परे रास्वपाको केन्द्रीय समितिबाट निलम्बित हुन वा सांसद पदबाट बाहिरिनसमेत तयार रहेको बताए। 

सुनारले आफ्नो प्रतिवादका क्रममा सबैभन्दा कडा अभिव्यक्ति दिँदै आफूले अपराध गरेको प्रमाणित भए तत्कालै कानुनी कारबाही भोग्न तयार रहेको बताए।

‘मैले भगवान्को आँखामा हुने कुनै पाप र कानुनको आँखामा हुने कुनै अपराध गरेको छु भने, म अहिले यहीँबाट हथकडी लगाएर जानलाई कुनै आपत्ति छैन,’ भन्ने उनको भनाइ छ।

उनले आफूविरुद्ध लगाइएका आरोपको सत्यता प्रमाणबाट स्थापित हुनुपर्नेमा जोड दिएका छन्। सार्वजनिक पदमा बसेको व्यक्तिले प्रश्नको सामना गर्नुपर्ने भए पनि प्रमाणबिना कसैलाई दोषी करार गर्ने, व्यक्तिगत प्रतिष्ठामा आघात पुर्‍याउने वा दबाब सिर्जना गर्ने काम स्वीकार्य नहुने उनको तर्क छ।

सुनारले आफूमाथि कारबाही भए पनि आफूले प्रहरीभित्रको अनियमितताबारे उठाएको प्रश्न कमजोर नहुने दाबी गरेका छन्। बरु आफूलाई दबाबमा पार्ने प्रयासले भ्रष्टाचार र सार्वजनिक निकायको जवाफदेहिताबारे थप प्रश्न उठाएको उनको भनाइ छ।

सुनारले पछिल्लो विवादमा महिलासहित विभिन्न व्यक्तिलाई आफूहरूसँग जोडेर सार्वजनिक रूपमा प्रस्तुत गरिएको विषयमा पनि आपत्ति जनाएका छन्।

उनका अनुसार, केही व्यक्तिलाई आफूविरुद्ध मुद्दा हाल्न दबाब दिइएको, घरमा फोन गरेर आरोप लगाउन भनिएको तथा परिचितहरूमार्फत आफूविरुद्ध बोल्न प्रेरित गरिएको छ।

उनले कसैको तस्बिर वा अन्य सामग्रीलाई आफूले अस्वीकार गरेको घटनासँग जोडेर प्रस्तुत गरिएको आरोपसमेत लगाए। यस्ता गतिविधिले सम्बन्धित व्यक्तिको प्रतिष्ठामा समेत क्षति पुग्न सक्ने उनको भनाइ छ।

उनले कुनै व्यक्तिमाथि अन्याय भएको भए त्यसको अनुसन्धान गर्नु राज्यको दायित्व भएको स्वीकार गरेका छन्। तर अनुसन्धानको नाममा कसैलाई जबर्जस्ती विवादमा तान्ने, धम्की दिने वा सार्वजनिक रूपमा बदनाम गर्ने काम हुन नहुने उनको तर्क छ।

सुनारले आफ्नो वर्तमान अवस्थालाई प्रहरीभित्रको भ्रष्टाचारबारे उठाएको प्रश्नसँग जोड्दै आएका छन्। 

उनले गरिब परिवारका छोराछोरीका लागि आवश्यक सामग्री तथा त्यससँग सम्बन्धित अनियमितताबारे आफूले आवाज उठाएको र त्यसपछि आफूविरुद्ध गतिविधि तीव्र भएको दाबी गरेका छन्।

उनको भनाइमा, सार्वजनिक निकायभित्र हुने अनियमितताबारे प्रश्न उठाउने व्यक्तिलाई नै उल्टै विवादमा तानेर कमजोर पार्ने प्रयास भइरहेको छ।

आफूले उठाएको प्रश्नको जवाफ दिनुको सट्टा आफूलाई बदनाम गर्न खोजिएको उनको आरोप छ।