काठमाडौं। भाडाको घरमा केन्द्रीय कार्यालय चलाउँदै आएको राष्ट्रिय स्वतन्त्र पार्टी (रास्वपा) अब आफ्नै स्थायी ठेगाना बनाउने तयारीमा जुटेको छ।

पार्टीले काठमाडौं उपत्यकाभित्र कम्तीमा तीन रोपनी जग्गा वा उपयुक्त भवन खरिद गर्न सार्वजनिक रूपमा प्रस्ताव मागेको छ।

रास्वपाले बुधबार, असोज २८ गते सूचना जारी गर्दै मापदण्ड पूरा गर्ने घरधनी तथा जग्गाधनीलाई २१ दिनभित्र प्रस्ताव पेस गर्न आग्रह गरेको हो। पार्टीको असोज १७ गते बसेको केन्द्रीय समिति बैठकले अस्थायी व्यवस्थापन हटाएर आफ्नै स्वामित्वको केन्द्रीय कार्यालय बनाउने निर्णय गरेको थियो।  

रास्वपाको अहिलेको केन्द्रीय कार्यालय काठमाडौंको वनस्थलीमा छ। यसअघि पार्टीले कार्यालय रहेको घरका घरधनीबाट घर खाली गर्न आग्रहसमेत पाएको समाचार सार्वजनिक भएको थियो। घरधनीले भाडा नपाएको र सुरक्षासम्बन्धी कारण देखाएको विवरण पनि बाहिरिएको थियो। 

नयाँ कार्यालयका लागि रास्वपाले सामान्य घर मात्र खोजेको छैन, ठूला बैठक र प्रशासनिक काम सञ्चालन गर्न सकिने संरचना वा त्यस्तो भवन बनाउन मिल्ने खाली जग्गा चाहेको छ। प्रस्तावित घरजग्गा चक्रपथसँग जोडिएको वा त्यसको नजिक हुनुपर्नेछ। मुख्य सडकसम्म सहज पहुँचका साथै कम्तीमा २० फिट चौडा पक्की सडकले छोएको हुनुपर्ने मापदण्ड पनि राखिएको छ।

कार्यालयमा आउने सवारीसाधन पार्किङ गर्न पर्याप्त ठाउँ हुनुपर्नेछ। त्यस्तै, घरजग्गाको स्वामित्व स्पष्ट भएको, कानुनी विवाद नरहेको र बैंक वा वित्तीय संस्थामा रोक्का नभएको हुनुपर्नेछ।

भवनसहितको प्रस्ताव पेस गर्दा आवश्यक स्वीकृत नक्सा तथा निर्माण सम्पन्न प्रमाणपत्रसमेत बुझाउनुपर्ने विवरण सार्वजनिक भएको छ।  

प्रस्तावित घरजग्गाको मूल्य पनि खुलाउनुपर्नेछ। इच्छुक घरधनी तथा जग्गाधनीले प्रतिआना वा प्रतिरोपनी दर अथवा एकमुष्ट रकम उल्लेख गरी प्रस्ताव पेस गर्न सक्नेछन्।

प्राप्त प्रस्तावको अध्ययन र स्थलगत निरीक्षणपछि पार्टीको आवश्यकता तथा उपयुक्तताका आधारमा निर्णय गरिने जनाइएको छ।