विश्व स्वास्थ्य संगठन (डब्लुएचओ) का प्रमुख टेड्रोस अधानोम गेब्रेयेससले इथियोपियामा आफ्नो युद्धकालको पीडा स्मरण गर्दै विश्वका नेताहरूलाई शान्तिका लागि एकजुट हुन आग्रह गर्नुभएको छ ।

विश्व स्वास्थ्य संगठनले इजरायल र हमासबीचको युद्धमा गाजा पट्टीमा खाद्यान्न, स्वास्थ्य सामग्री र अन्य सहायताको सुरक्षित वितरणका लागि तत्काल ‘मानवीय सहायताका लागि युद्धविराम’ गर्न आह्वान गर्नुभएको छ ।टेड्रोसले प्रसिद्ध सामाजिक सञ्जाल एक्स (ट्वीटर) मा भन्नुभएको छ, “युद्धविराम र शान्तिका लागि विनम्र अनुरोध गरिरहेको छु ।”

“युद्धको छायाँमा फसेको बच्चाको रूपमा, मलाई यसको गन्ध, आवाज र दृश्यहरू राम्ररी थाहा थियो । अहिले द्वन्द्वको बीचमा फसेकाहरूप्रति म गहिरो सहानुभूति राख्छु, उनीहरूको पीडा मेरो आफ्नै जस्तो महसुस गर्छु,” उहाँले भन्नुभयो, “युद्धले विनाश, भयावहता र त्रासदी मात्र ल्याउँछ । अरु केही होइन ।”

“यस नाजुक घडीमा, हामी विभाजनबाट माथि उठेर शान्तिको मार्ग अँगालौं । साहसको साँचो प्रदर्शन शान्ति रोज्नुमा निहित छ । म विश्वका नेताहरूलाई एकताबद्ध हुन र विश्वलाई शान्तितर्फ डो¥्याउन आह्वान गर्दछु ।

इजरायली अधिकारीहरूका अनुसार गत अक्टोबर ७ मा हमासका बन्दुकधारीले गाजामा आक्रमण गरेपछि इजरायलले गाजामा भारी बमबारी गरेको छ, जसमा एक हजार ४०० जनाको मृत्यु भएको छ, जसमा अधिकांश सर्वसाधारण रहेका छन् र अन्य २२० भन्दा बढीलाई अपहरण गरिएको छ ।

हमासद्वारा सञ्चालित गाजा पट्टीको स्वास्थ्य मन्त्रालयले आक्रमणमा परी आठ हजारभन्दा बढी व्यक्तिको मृत्यु भएको जनाएको छ ।

टेड्रोसले ‘अन्यायपूर्ण र भयानक’ हमासको आक्रमणको निन्दा गर्दै गाजामा भएको बमबारीमा ‘बालबालिकाले मूल्य चुकाइरहेको’ बताएका छन् ।

गत वर्षको मे महिनामा डब्लुएचओको दोस्रो कार्यकालका लागि पुनः निर्वाचित हुँदा ५८ वर्षीय टेड्रोसले आफ्नो नम्र पालनपोषणलाई एक गरीब परिवारमा युद्धपिडित सन्तानका रूपमा जन्म भएको बताउनुभएको थियो ।

भावुक बन्दै बोल्दा उहाँले सानै उमेरमा द्वन्द्वको अनुभव गरेको र हालै युक्रेनको भ्रमणको क्रममा ती तीव्र भावनाहरू कसरी उच्च गतिमा आए भनेर वर्णन गर्नुभएको थियो ।

“जब मैले युक्रेनी बच्चाहरूलाई देखें, मेरो ५० वर्षभन्दा पहिलेको छवि दिमागमा आयो; यो यति दृष्यमान थियो कि यसबाट मैले मेरै विगतको युद्धको गन्ध, युद्धको आवाज, युद्धको छवि महशुस गरेँ,” उहाँले आँसु झार्दै भन्नुभयो, “म कसैलाई पनि यस्तो होस् भन्ने चाहन्नँ । त्यसैले मलाई आशा छ कि शान्ति आउनेछ ।”