काठमाडौं । नेकपा एमालेले काठमाडौं महानगरपालिकाका मेयर बालेन साहलाई आफ्नो मेयर पद नभूल्न चेतवावनी दिएको छ ।

मंगलबारको प्रतिनिधसभा बैठकमा एमाले सचिव योगेश भट्टराईले उत्तेजना फैलाउने अभिव्यक्ति नदिन मेयर साहलाई चेतावनी दिएका हुन् ।

उनले देशमा यो व्यवस्था ल्याउनको लागि मरिमेटेका नेता र एमालेको नेतृत्वमाथि गालीगलौज गर्न आफैँ आकाशतिर फर्किएर थुक्नुजस्तो भएको बताए ।

उनले भने, ‘बालेनजीलाई म भन्न चाहन्छु पैसा कति चाहियो सरकारले दिन तयार छ । प्रधानमन्त्री अर्थमन्त्री र सम्बन्धित मन्त्रीलाई भनौँला । तर उत्तेजना फैलाएर हुँदैन । अनर्गल प्रचार गर्न बन्द गर्नुस् । तपाईंमार्फत् लाखौँ युवाहरूले भविष्य खोजेका छन्।’

उनले झापाको गिरीबन्धु जग्गा प्रकरणमा एमाले पार्टी र अध्यक्ष केपी शर्मा ओलीमाथि नियोजित ढंगले प्रचार र आरोप लगाउने षड्यन्त्र भएको भन्दै आपत्ति जनाए ।

उनले, भने, ‘२०४६ सालपछि वा अगाडि कुन–कुन बेलाको छानबिन गर्नुपर्ने हो, प्रत्येक छानबिनको लागि एमाले तयार छ । एनसेलको गर्ने हो कि टेरामक्सको गर्ने हो कि ? बाँसबारीको गर्ने हो कि कोहलपुर जग्गाको गर्ने हो कि ? बालमन्दिरको गर्ने हो कि बालुवाटार जग्गाको कहाँ–कहाँ गर्ने ? हामीालई पार्टीको केन्द्रीय समितिमा दायाँ–बायाँ दाग लागेको व्यक्ति राखेर बैठक गर्नुपरेको छैन ।’

उनले सबै काण्डका विषयमा छानबिन गर्न आफूहरु तयार रहेको बताए । उनले भने, ‘प्रत्येक छानिबनका लागि आउँछौँ, यी तमाम विषयमा कांग्रेसकै साथीहरू बसेर छानबिन गरौँ । तपाईंहरू बसेर रिपोर्ट लिएर आउनुहोस् संसदमा । सबैको सामना गर्न एमाले तयार छ ।’