काठमाडौं । सहकारीको बचत रकम अपचलनसम्बन्धी छानबिन गर्न गठित संसदीय समितिले रकम हिनामिनामा जोडिएका दुई सहकारीका संचालकसँग सोधपुछ गरेको छ ।

समितिको शुक्रबारको बैठकमा गोरखा बचत तथा ऋण सहकारी संस्थाका पूर्वअध्यक्ष डम्बरबहादुर तामाङ र गोरखा सेभिङ तथा क्रेडिट सहकारी संस्थाका अध्यक्ष इमान सिंह राइसँग सोधपुछ गरेको हो ।

समिति संयोजक सूर्य थापाले उनीहरुले ऋणीहरुबाट ऋण उठाउने र ऋण असुलीका लागि सरकार, बैंक, समस्याग्रस्त व्यवस्थापन समितिले सहयोग गर्ने हो भने सहकारी अगाडि बढाउन सकिने बताएका जानकारी दिए ।

समितिले समस्याग्रस्त २९ वटा सहकारीका संचालकसँग सोधपुछ गर्नेछ । तीन महिनाको समय पाएको समितिले प्रमाणहरू जुटाउने र अन्य निकायबाट प्रमाण लिने काम गरिसकेको छ ।

तीन महिनाको समय पाएको समितिको म्याद भदौ १५ सम्म रहेको छ । समितिले जेलमा भएका व्यक्तिहरूसँग सोधपुछका लागि सहजीकरण गरिदिन गृहमन्त्रीलाई आग्रह गरिसकेको छ भने फरार १८ जनालाई नेपाल ल्याउन गृह मन्त्रालयलाई पत्राचार गरेको छ ।

समितिले सहकारी ठगी प्रकरणमा जोडिएका रास्वपाका सभापति रवि लामिछानेसँग पनि बयान लिने तयारी गरेको छ ।