हङ्गेरीका प्रधानमन्त्री भिक्टर ओर्बनले युक्रेनलाई समर्थन गर्ने संयुक्त कार्यलाई सुदृढ पार्ने उद्देश्यले युरोपेली सङ्घ (इयु) को शिखर सम्मेलनको एक दिनअघि बुधबार फ्रान्सका राष्ट्रपति इमानुएल म्याक्रोनलाई भेट्ने बताउनुभएको छ ।

ओर्बानको यो घोषणा अमेरिकी राष्ट्रपति डोनाल्ड ट्रम्पले किएभलाई सैन्य सहायता आपूर्ति निलम्बन गर्ने आदेश दिएपछि आएको हो । उक्त आदेशले अमेरिका आफ्ना सहयोगीहरूबाट हट्दै र मस्कोतर्फ बढ्दै छ भन्ने डर युक्रेन र धेरै युरोपेली राजधानीहरूमा बढाएको छ ।

इयुमा ट्रम्प र मस्कोका नजिकका सहयोगीहरू मध्ये एक ओर्बनले युक्रेनमा रुसले गरेको आक्रमणलाई लिएर हालैका दिनहरूमा ‘ट्रान्सअटलान्टिक फाटो’ स्पष्ट भएको बताउनुभयो ।   “म भोलि पेरिसमा फ्रान्सका राष्ट्रपतिसँग भेट गर्दैछु”, राष्ट्रवादी नेताले मङ्गलबार मिडिया ब्रिफिङमा युक्रेनको युद्ध छलफलको विषय हुने सङ्केत गर्दै भन्नुभयो, “अमेरिकी राष्ट्रपति चुनावले अटुट बनाएको एक स्पष्ट रणनीतिक भिन्नता छ... केहीले युद्ध चाहन्छन् र केहीले शान्ति । यो चुनौती हामीले बिहीबार सामना गर्नुपर्नेछ । मेरा लागि बुधबार नै ।”

उहाँले सप्ताहन्तमा लन्डनमा युक्रेनको पक्षमा एकजुट हुन भेला भएका युरोपेली नेताहरूमाथि ‘युक्रेनमा युद्ध जारी राख्नुपर्छ’ भन्ने निर्णय गरेको आरोप लगाउनुभयो ।  आइतबारको सङ्कट शिखर सम्मेलनपछि, म्याक्रोनले फ्रान्स र बेलायतले ‘हावामा, समुद्रमा र ऊर्जा पूर्वाधारमा’ एक महिनाको युद्धविराम प्रस्ताव गरेको बताउनुभयो । हालको चरणमा भूमि युद्धलाई यसले समेटेको छैन ।     उक्त शिखर सम्मेलनमा हङ्गेरीलाई आमन्त्रित गरिएको थिएन ।