डिजिटल मिडिया अलायन्स नेपाल (डिम्यान)का महासचिव युवराज कँडेलले डिजिटल मिडिया र पत्रपत्रिकालाई हेर्ने नजरफरक पारिएको बताएका छन् ।

 नेपाल वान एचडी नेटवर्कको आयोजनामा बसेरा बुटिक होटल, बबरमहलमा शुक्रबार राउण्ड टेबल कार्यक्रममा उनले  भने, ‘पत्रिकामा समाचार आयो र गल्ती भयो भने कारबाही नै गर्न पर्दा मानहानीको मुद्दा चलाइन्छ । तर युट्युब वा अन्य डिजिटल मिडियामा हाल्ने बितिक्कै साइबर क्राइमतिर मुद्दा चलाउने काम भयो । यहाँ किन विभेदगरियो ?’

उनले डिजिटल मिडियाले पनि दर्ता भएर आचारसंहिता मानेर नै काम गर्नुपर्नेमा जोड दिए । उनले भने,’हामीले आचारसंहिता मान्नु नै पर्छ । तर त्यति हुँदाहुँदै पनि विभेद गरिने परिपाटी छ ।‘

उनले डिजिटल मिडियामा शक्ति, सोच र सम्भावनाको कुरा गर्दै गर्दा यी सबै कुरा सम्भावना रहेको बताए । डिजिटल माध्यममा आएका कन्टेन्ट क्रियटरलाई पत्रकार र सामाग्रीलाई समाचार मान्न नहुने उनले बताए । ‘कन्टेन्ट क्रियटरले समाचार नदिन पनि सक्छन् । कँडेलले भने,’ पत्रकारले कन्टेन्ट दिन्छन्। त्यसकारण डिजिटल माध्यमलाई समाचार स्रोतका रूपमा एसेप्ट गर्न गाह्रो भइरहेको छ ।‘

पछिल्लो समय डिजिटल मिडियासँग सम्बन्धित धेरै छलफल हुँदा डिजिटल माध्यममा मात्र सक्रिय रहेका व्यक्तिहरूको उपस्थिति शून्य नै हुने गरेको गुनासो गरे । 

उनले पछिल्लो समय सबै कुराको रिजल्ट डिजिटल माध्यममा देखिने गरेको भन्दै छापा माध्यमले समाचार प्रकाशित गरिसकेपछि सेयर गर्ने डिजिटल मिडियामा नै गरिएको बताए । ‘अहिले कुनै पनि टिभी कार्यक्रम कत्तिको चलेको छ हेर्नका लागि डिजिटल माध्यमकै प्रयोग गर्ने गरिएको छ ।‘

उनले डिजिटल मिडियाले पनि आचारसंहिता मानेर अगाडि बढ्नुपर्ने र राज्यले पनि विभेद गर्न नहुने बताए ।