काठमाडौं । जेनजीको वृहत ‘भर्चुअल’ वैठकमा भावी प्रधानमन्त्रीका विषयमा छलफल गरिएको छ । पाँच हजार बढी सहभागी वैठकमा सबैभन्दा बढीले पूर्व प्रधानन्यायाधीश सुशीला कार्कीलाई समर्थन जनाएका छन् ।

काठमाडौं महानगरपालिकाका मेयर बालेन्द्र शाह जेनजी पुस्तामा सबैभन्दा बढी लोकप्रिय छन् । तर, उनले उनले फोन नउठाएको एक जेनजी प्रतिनिधिले बताए । ‘उहाँले फोन नउठाउनु भएपछि अरु नामहरुमाथि छलफल गरिएको हो । सबैभन्दा धेरै समर्थन सुशीला कार्कीको नाममा छ,’ ती प्रतिनिधिले भने ।

कार्कीलाई यसअघि नै जेनजीको तर्फबाट प्रधानमन्त्रीको अफर गरिएको थियो । स्रोतका अनुसार उनले एक हजार जनाको लिखित हस्ताक्षर चाहिने माग गरेकी थिइन् । उनले माग गरेभन्दा धेरै २५ सयभन्दा बढीको हस्ताक्षर उनलाई दिइएको स्रोतको दाबी छ । कार्कीले राजनीतिक रिक्तता शून्यको अवस्थामा नेतृत्व लिन्छु भनेकी छिन् ।

प्रधानमन्त्रीमा कुलमान घिसिङ, सागर ढकाल, हर्क सामपाङ लगायतको नाम पनि चर्चामा आएका थिए । यस्तै, र्‍यान्डम नेपाली नामक एक युट्युवरलाई पनि राम्रो मत परेको छ । तर उनले अरु कोही तयार नभए मात्रै आफू अघि सर्ने बताएका छन् । र्‍यान्डम नेपालीको वास्तविक नाम राष्ट्रविमोचन तिमल्सिना हो । उनी कानून व्यवसायी हुन् । यसअघि उनी नेसनल ल कलेजका कार्यवाहक प्रिन्सिपल थिए ।

रास्वपा सांसद सुमना श्रेष्ठले आफू पार्टीसम्बद्ध भएकाले सामेल हुन नमिल्ने जवाफ दिएको, हर्क साम्पाङ तयार रहेको, सागर ढकाल तयार भए पनि धनगढीमा फसेको, कुलमान घिसिङ हिजोको पत्रकार सम्मेलनमा मेन्टरको भूमिकामा उपस्थित भएको र र्‍याण्डम नेपालीले कोही पनि तयार नभए आफूले जिम्मेवारी लिने बताएको रिपोर्टिङ गरिएको छ ।