काठमाडौं । नव नियुक्त प्रधानमन्त्री सुशीला कार्कीलाई भारतीय समकक्षी नरेन्द्र मोदीले बधाई दिएका छन् । सामाजिक सञ्जालमा अंग्रेजी, हिन्दी र नेपाली भाषामा लेख्दै उनले शुभकामना दिएका छन् । उनले लेखेका छन्, ‘नेपालको अन्तरिम सरकारको प्रधानमन्त्रीको रूपमा पदभार ग्रहण गर्नु भएकोमा श्रीमती सुशीला कार्कीलाई हार्दिक शुभकामना । नेपालका दाजुभाइ तथा दिदीबहिनीहरूको शान्ति, प्रगति र समृद्धिप्रति भारत पूर्ण रूपमा प्रतिबद्ध छ ।’

शुक्रबार राति राष्ट्रपति रामचन्द्र पौडेलले नेपालको पहिलो महिला प्रधानमन्त्रीका रूपमा कार्कीलाई शपथ दिलाएका थिए । मंगलबार र बुधबार भएको युवाहरूको आन्दोलनपछि तत्कालीन केपी शर्मा ओली नेतृत्वमा रहेको सरकार ढलेपछि देशले अन्तरिम सरकार पाएको हो । नयाँ सरकारले आगामी ६ महिनाभित्र निर्वाचन गर्नेछ । आउँदो फागुन २१ गते निर्वाचन मिति समेत तोकिएको छ ।