काठमाडौँ । राष्ट्रिय स्वतन्त्र पार्टी (रास्वपा) नेतृ सुमना श्रेष्ठले आज एकाएक पार्टी छोडेको घोषणा गरिन् । आइतबार बिहान रास्वपा केन्द्रीय सदस्यहरूको ह्वाट्स एप ग्रुपमा तीन विषयमा असन्तुष्टि जनाउँदै उनले पार्टी छाडेको घोषणा गरेकी हुन् । रास्वपा प्रवक्ता मनिष झाले ग्रुपमा असन्तुष्टि जनाउँदै पार्टी छाडेको घोषणा गरे पनि पार्टीमा औपचारिक पत्र आइनपुगेको बताएका छन्।

अर्का एक केन्द्रीय सदस्यका अनुसार सुमनाले ग्रुपमा आफूमाथि मिडिया ट्रायल गरेको, आफ्ना कुराहरू पार्टीले सुनुवाइ नगरेको र पार्टीमा काम गर्ने अवस्था नभएको भन्दै पार्टी छोडेको घोषणा गरेकी हुन् । आफूले पार्टीलाई गल्ती सुधार गर्न पटक–पटक आग्रह गर्दा पनि कुनै सुनुवाइ नभएपछि पार्टी परित्याग गर्न बाध्य भएको श्रेष्ठले बताएकी छन्।

‘कहिल्यै गल्ती नस्वीकार्ने । गल्तीमाथि गल्ती गरिरहने र त्यसको बोझ पार्टीका सबैले बोकिदिनुपर्ने । पार्टीभित्र आलोचना गर्नेहरूका विरूद्धमा मिडिया ट्रायल गर्ने । जहिलेदेखि राष्ट्रिय स्वतन्त्र पार्टीले देशभन्दा माथि पार्टी र पार्टीभन्दा माथि नेतालाई राख्न थालेको हो, त्यतिबेलादेखि नै आलोचना गर्दै आएको हुँ’, रास्वपा परित्यागपछि श्रेष्ठले भनिन् । उनले थपिन्, ‘तर त्यसले कत्ति पनि फरक पारेन । अझ उल्टै मिडिया ट्रायल हुन थाल्यो । यो स्वीकार्य छैन । अब खुला रूपमा आक्रमण गर्ने हो भने पनि सजिलो बनाइ दिएको छु । मनलाग्दी चलुन्जेल मनलाग्दी गर्नुहोला ।’

उसो त केहि दिनअघि भएको जेनजी आन्दोलनपछि अन्तरिम सरकारको प्रधानमन्त्रीमा नियुक्त सुशीला कार्कीको शपग ग्रहण कार्यक्रममा नेतृ सुमना श्रेष्ठ भौतिक रुपमै उपस्थित भएका थिइन् । पूर्व प्रधानमन्त्री डा. बाबुराम भट्टराई बाहेक ठूला अन्य पूर्व प्रधानमन्त्री र विटघित प्रतिनिधिसभाका सभामुख देवराज घिमिरे र राष्ट्रिय सभाका अध्यक्ष नारायणप्रसाद दाहाल समेत अनुपस्थित शपथ ग्रहण समारोहमा सुमना श्रेष्ठ उपस्थित थिइन् ।

उक्त शपथ ग्रहण समारोहमा सुमनाको उपस्थितिलाई लिएर सामाजिक सञ्जालहरुमा उनी जेनजी आन्दोलनतिर समाहित हुन लागेको हो कि भन्ने अनुमान गरेका थिए । रास्वपामा रहँदै पनि काठमाडौं महानगरपालिकाका मेयर बालेन शाहको विचार नजिकको भन्ने आरोप खेप्दै आएकी सुमनले शपथ ग्रहण समारोहमा आफ्नो उपस्थितिका बारे सामाजिक सञ्जालबाटै स्पष्टिकरण दिएकी थिइन् ।

सामाजिक सञ्जालहरुमा उनी सुशीला कार्की नेतृत्वको सरकारमा मन्त्री बन्न लागेको हो कि भन्ने अनुमान गरिएको थियो । तर उनले लगतै रास्वपा छाड्न लागेको कुनै जानकारी नदिई आफू सुशीला कार्कीको सरकारमा नजाने स्पष्ट पारेकी थिइन् । उनले जेनजीको आन्दोलनपछि सरकारमा जाने नभई जनताको सेवाका बारेमा सोच्नु पर्ने बताएकी थिइन् । आज नव नियुक्त प्रधानमन्त्री सुशीला कार्कीले पदभार ग्रहण गर्दै मन्त्रिमण्डल गठनका लागि छलफल अघि बढाइरहेका बेला नेतृ श्रेष्ठले रास्वपा त्यागेको घोषणा गरेकी हुन् ।

नेतृ श्रेष्ठले कार्की नेतृत्वको सरकारमा नजाने सामाजिक सञ्जालबाट बताइसकेको भए पनि मन्त्रिमण्डल विस्तार भइनसकेका कारण र शपथ ग्रहण समारोहमा भौतिक रुपमै उपस्थित भएकी सुमना कतै सरकारमा जाने बाटो खुल्ला गर्न रास्वपा त्यागेकी त होइनन् भन्ने आशंका र कौतुहलता भने बाँकी नै रहेको छ ।

पछिल्लो समय संकट, चुनौति र विभिन्न अप्ठ्याराहरुसँग लड्दै आएको रास्वपामा पार्टीको प्रभावशाली नेतृ श्रेष्ठको यो पार्टी परित्यागको घोषणाले अर्को संकट थपिएको छ । सुमनाबाट सुरु भएको पार्टी परित्यागको लहर बढ्ने हो कि भन्ने चिन्ता नेतृत्वपंक्ति देखिएको छ । रास्वपामा नेताहरुले खुलेर नबोले पनि भित्रभित्रै पार्टी नेताहरुमा असन्तुष्टि चुलिँदो अवस्थामा रहेको राजनीतिक क्षेत्रका जानकारहरु बताउँछन् ।

उसो त हिजो मात्र रास्वपा सभापति रवि लामिछानेले पुनः नख्खु कारागार फर्किदै गर्दा पार्टीका नेताहरुलाई एकतावद्ध भएर वर्तमान राजनीतिक परिस्थिति अनुसार चल्न आग्रह गरेका थिए । सँग उनले कसैलाई पार्टीप्रति रुची हराएको र बाहिरिन मन भए आफू वाधक नबन्ने बताएका थिए । सभापति लामिछानेको यस्तो अभिव्यक्तिपछि सुमनको पार्टी परित्यागको घोषणा आएको हो । सुमनाको पार्टी त्यागको घोषणाले रास्वपामा सानो भए पनि पहिरो गएको छ । यो पहिरो थामिन्छ कि अझ बढ्दै जान्छ त्यो भने भविष्यले बताउने छ ।