काठमाडौं । ऊर्जा, जलस्रोत तथा सिँचाइसहित तीन मन्त्रालयको नेतृत्व पाएका मन्त्री कुलमान घिसिङले मन्त्रालयहरु र यिनका मातहत निकायमा शून्य सहनशीलताको नीति लिने बताएका छन् । भ्रष्टाचार र अनियमितता नियन्त्रण जेनजीको माग भएको बताउँदै उनले यसको निर्मूल अन्त्य गर्ने दाबी गरे । मन्त्रालयमा पदभार ग्रहणपछि उनले यसो दावी गरेका हुन् ।

‘मन्त्रालय र मातहतमा शून्य सहनशीलता अवलम्बन गरिनेछ । त्यस्तो कार्य गरेको पाइए तत्काल कारबाही गरिनेछ’, उनले भने, ‘भ्रष्टाचार नियन्त्रण होइन निर्मूल गरिनेछ । कसैले पनि कुनै पनि निकायले भ्रष्टाचार र अनियमितता गरेको भेटिए कडा कारबाही । यो नै हाम्रो दायित्व हो । अहिलेको आन्दोलनको विषय पनि भ्रष्टाचार र सुशासन नै थियो ।’ उनले आफ्नो पारदर्शितामा प्रश्न उठ्यो भने सिधै भन्न पनि आग्ह गरेका छन् । ‘मलाई सिधै भन्नु होला । ठूलो चुनौती लिएर आएको छु। त्यसको सामना गर्छु भनेर आएको छु ।’

कर्मचारी सरुवामा ‘राइट म्यान इन राइट प्लेस इन राइट टाइम’
मन्त्री कुलमान घिसिङले कर्मचारी सरुवामा आफ्नो मूल मन्त्र नै ‘राइट म्यान इन राइट प्लेस इन राइट टाइम’ रहेको बताएका छन् । यसैको परिपालना गर्दै कार्यमा खटिने उनले बताएका हुन् । मन्त्रीको पदभार ग्रहणपछि उनले कार्यकक्षमा कर्मचारी सरुवामा उपयुक्त मान्छेले उपयुक्त जिम्मेवारी पाउने उल्लेख गरे । ‘कर्मचारी सरुवा, जिम्मेवारी प्रदानमा सुनिएका विगतका अनियमिततालाई निर्मूल गरिनेछ’, उनले भने, ‘उपयुक्त मान्छेलाई उपयुक्त जिम्मेवारीलाई कडाइ साथ लागू गरिनेछ । प्रतिशोध गरिने छैन ।’

उनले कर्मचारीहरुलाई असल नियतले ढुक्क भएर काम गर्न आग्रह गरेका छन् । ‘नडराई काम गर्नुहोला, राम्रो काम गर्नेलाई राम्रो जिम्मेवारी दिइनेछ । अहिलेको अवस्था हेरेर काम गर्नुहोस्, कसैप्रति पूर्वाग्रही हुने छैन । द्रुतगतिमा काम गर्नुहोला । निर्णयहरु फास्ट ट्राकमा काम गर्नुस् । १८ घण्टा खटिनुस्’, उनले भने ।