काठमाडौं । राष्ट्रिय स्वतन्त्र पार्टी (रास्वपा) को केन्द्रीय समितिको बैठक बसिरहेको छ। मंगलबार बिहानबाट पार्टी केन्द्रीय कार्यालय वनस्थलीमा पार्टीका कार्यवाहक सभापति डोलप्रसाद अर्यालको अध्यक्षतामा बैठक सुरु भएको हो ।बैठकमा समसामयिक राजनीतिक परिस्थितिसहित सात एजेन्डामा छलफल हुने रास्वपाले जनाएको छ ।

भदौ २३ गतेको जेन्जीको आन्दोलनको विषयलाई लिएर रास्वपाभित्र मतभेद छ । जेन्जीको आन्दोलनपश्चात सांसदहरुले सामुहिक राजीनामा दिएका थिए । पूर्व सांसद सुमना श्रेष्ठका अनुसार पार्टीका नेताहरुले झण्डा नलैजाने तर व्यक्तिगत रुपमा आन्दोलनमा सहभागी हुन पाइने कार्यकर्तालाई निर्देशन दिइएको थियो ।

यता भदौ २४ गते नख्खु कारागारमा रहेका सभापति रवि लामिछानेलाई निकाल्न रास्वपाका शीर्ष नेताहरु नै पुगेका थिए । लामिछाने विजयी भावमा कारमा बाहिरिएका थिए भने त्यसपश्चात कारागारमा आगजनी भएको थियो । रास्वपाका सहमहामन्त्री विपिन आचार्यले प्रदर्शनको उग्रताको नेतृत्व वा संलग्न पदाधिकारी वा मभन्दा तल्लो तह जुनसुकै स्तरबाट भएपनि छानबिन र कारबाहीको दायरामा आउनु पर्ने बताएका थिए ।

‘रास्वपाको ठूलो समर्थन आधार युवाहरू हुन् । तसर्थ शान्तिपूर्ण रूपमा युवाहरूले राखेका मागमा पार्टीको नैतिक समर्थन हुनु र शान्तिपूर्ण र स्वस्फुर्त सहभागिता स्वभाविक हो । तर यदि रास्वपाका नेतृत्व र जिम्मेवार तह र तप्कामा रहेका कुनै पनि व्यक्तिहरू सो स्थानमा भीडलाई बोलाउने, उक्साउने वा भीडलाई उत्तेजित पार्ने कार्यमा प्रत्यक्ष वा परोक्ष रुपमा संलग्न छन् भने सो कार्य क्षम्य हुनु हुँदैन ।’

उनले भने, ‘नख्खु कारागार वरपर त्यस दिन भएका प्रदर्शनको सरकारले सकेसम्म छिटो छानबिन र अनुसन्धान गर्छ भन्ने विश्वास छ । उग्रताको नेतृत्व वा संलग्नता चाहे म, मभन्दा माथिल्लो तहका पदाधिकारी वा मभन्दा तल्लो तह जुनसुकैस्तरबाट भए पनि छानबिन र कारबाहीको दायरामा आउनु पर्छ । अराजकतालाई प्रश्रय दिने कार्यमा संलग्न सम्बन्धित सबैलाई पार्टीसँगको आवद्धता छाड्न र अनुसन्धान प्रक्रियामा सहयोग गर्न आग्रह गर्दछु ।’

आचार्यले भनेका छन्, ‘भदौ २४ गते नख्खु कारागारबाट पार्टी सभापति रवि लामिछाने बाहिर निस्किएपछि कारागार परिसरमा भएको आगजनी तथा तोडफोडमा रास्वपाका जुनसुकै तहका नेताहरू संलग्न रहेको पाइएमा सरकारले कानुनअनुसार कारबाही गर्दा पार्टीको पूर्ण सहयोग रहने विश्वास दिलाउन चाहन्छु ।’

बैठकमा कम्तीमा ४ जना प्रदेश सभापतिहरूले रास्वपा सभापति रवि लामिछानेले मार्ग प्रशस्त गर्नुपर्ने प्रस्ताव राख्ने तयारी गरेको स्रोतले जानकारी दिएको छ । रास्वपामा प्रदेश सभापतिहरू पदेन केन्द्रीय सदस्य हुने व्यवस्था छ । आजको केन्द्रीय समिति बैठकमा प्रदेशहरुबो राजनीतिक प्रस्ताव पेश गर्न भनिएको थियो । त्यसमा चारवटाले सभापतिले आफ्नो मुद्दाको कानूनी निरुपण नहुञ्जेलका लागि पद त्याग गर्न वा संरक्षणको भूमिकामा बस्न प्रस्ताव गर्न लागेका हुन् ।

स्रोतका अनुसार कोशी, गण्डकी, लुम्बिनी र सुदूरपश्चिमका प्रदेश समिति सभापतिले मार्ग प्रशस्त गर्नुपर्ने पक्षमा छन् । कोशीका सभापति सरिन तामाङ, गण्डकीका राजन गौतम, लुम्बिनीका देवराज पाठक र सुदूरपश्चिमका प्रकाश विष्टले केन्द्रीय समिति बैठकमा यो प्रस्ताव गर्ने बुझिएको छ । बाँकी तीन सभापतिको भने लाइन क्लियर भएको छैन ।