काठमाडौं । नेकपा (एमाले) ले वर्तमान सरकार राजनीतिक प्रतिशोधको बाटोमा अघि बढेको टिप्पणी गरेको छ । आज (आइतबार) भक्तपुरको गुण्डुमा बसेको सचिवालय बैठकले गरेका निर्णयबारे जानकारी दिँदै उपमहासचिव प्रदीप ज्ञवालीले यस्तो जानकारी दिएका हुन् ।

राजनीतिक दलहरूसँग सरकारले कुनै समन्वय नगरेको र निषेध गर्न खोजेको एमालेको ठहर छ । यस्तै, पार्टी अध्यक्ष केपी शर्मा ओलीलगायत पाँच जनामाथि काठमाठौं उपत्यका छोड्न र विदेश जान नपाउने गरी गरिएको निर्णयप्रति बैठकले आपत्ति जनाएको छ । एमालेले यही महिनाको २७, २८ र २९ गते केन्द्रीय समिति र त्यसअघि पुनः सचिवालय बैठक बस्ने निर्णय गरेको ज्ञवालीले जानकारी दिए ।