Tag: एमाले

काठमाडौं । नेकपा (एमाले) का उपाध्यक्ष सुरेन्द्र पाण्डेले पार्टीमा नेताको वरिपरी लाग्नेलाई मात्रै नेतृत्वका लागि योग्य ठान्ने परिपाटीको अन्त्य गर्न आफूहरुले चाहेको बताएका छन् । ११ औं महाधिवेशनमा ईश्वर पोखरेल समूहका नेता पाण्डेले अध्यक्ष केपी शर्मा ओलीप्रति लक्षित गर्दै नेताको वरिपरी लाग्नेहरुलाई मात्रै नेतृत्वमा ल्याउने परिपाटीको अन्त्य गर्न आफूहरुले महाधिवेशनमा छुट्टै समूह बनाएर उम्मेदवारी दिने अवस्था आएको बताएका हुन् ।

उपाध्यक्ष पाण्डेले नेता, कार्यकर्ता आफैले मूल्यांकन गरेर नेतृत्व छान्ने परिपार्टी बसाल्न र पार्टीलाई सामूहिक ढंगले अघि बढाउन महाधिवेशनले नयाँ नेतृत्व छान्नुपर्ने तर्क समेत गरे । उनले पार्टीलाई कसैले हल्लाउन नसक्ने गरी अघि बढाउन पनि महाधिवेशनले नयाँ नेतृत्व चयन गर्नुपर्ने जिकिर गरे ।
उनले भने, ‘कार्यकर्ताको बीचमा स्थापित मान्छे होइन, नेताको वरिपरी लाग्ने मान्छे मात्रै नेतृत्वका लागि योग्य ठान्ने परिपार्टी हुर्क्याै । हामी यसको विपक्षमा छौ । कार्यकर्ता आफैले हरेक फिल्ड नेता, कार्यकर्ता आफैले आफ्नो नेता आफै मूल्यांकन गरेर छान्ने पद्धति र सामूहिक ढंगले पार्टीलाई लिएर जाने पद्धति हामी स्थापित गरौै । यो परिपाटीलाई हामीले पार्टीको आधारभुत परिपाटीको रुपमा विकास ग¥यौँ भने यो पार्टीलाई कसैले छुन सक्दैन । कसैले हल्लाउन सक्दैन । यही लडाई यो महाधिवेशनको लडाईँ हो । यो लडाईमा हामी जित्न सकौ । जित्ने गरी अगाडि बढौं ।’ उपाध्यक्ष पाण्डेले अध्यक्ष ओलीले दुई कार्यकाल मात्रै अध्यक्ष रहने गरी आफूले बनाएको विधान फेरी संशोधन गरेको भन्दै आपत्ति समेत जनाए ।

काठमाडौं । एघारौं महाधिवेशन सुरु हुनु अघिल्लो दिन आज (शुक्रबार) दिउँसो १ बजेका लागि बोलाइएको नेकपा एमालेको सचिवालय बैठक सरेको छ । एमाले उपाध्यक्ष युवराज ज्ञवालीका अनुसार अब बैठक दिउँसो २ बजे बस्नेछ । ‘बैठक सरेको सूचना आयो, दिउँसो २ बजे बस्छ भनिएको छ’, उनले सुनाए । ललितपुरको च्यासलस्थित पार्टीको केन्द्रीय कार्यालयमा सचिवालय बैठकमा एमालेको विधान संशोधन, महाधिवेशन तयारीलगायत एजेण्डामा छलफल हुनेछ ।

यसैबीच अध्यक्ष पदमा उम्मेदवारी दिने घोषणा गरेका वरिष्ठ उपाध्यक्ष ईश्वर पोखरेल पक्षले भने सचिवालय बैठकमा विधान संशोधनको कुरा उठे २ कार्यकाल र ७० वर्षे उमेर हदको प्रावधान ब्युँताउने पर्ने प्रस्ताव लाने तयारी गरेको छ । गत सोमबारै सचिवालय बैठक राख्ने तयारीमा रहेका अध्यक्ष ओली वरिष्ठ उपाध्यक्ष पोखरलले अवधारणापत्र बुझाएकै कारण रोकिएका थिए ।

पोखरेल पक्षले सचिवालय बैठकमा अवधारणापत्रका विषयमा पनि कुरा उठाउने भएपछि उनले बैठक ३ दिनलाई स्थगन गरेका थिए । एमालेको सचिवालय बैठक एघारौँ महाधिवेशन उद्घाटनको अघिल्लो दिन बस्न लागेको हो । एमालेको ११ औँ महाधिवेशन भोलि शनिबार अर्थात् मंसिर २७ गते सुरु हुँदैछ । एमाले महाधिवेशनको उद्घाटन भक्तपुरको सल्लाघारीमा हुनेछ भने बन्द सत्र मंसिर २८ र २९ गते काठमाडौँको भृकुटीमण्डपमा हुनेछ ।

काठमाडौं । नेकपा (एमाले) का अध्यक्ष केपी शर्मा ओलीले सुशीला कार्की नेतृत्वको सरकारका क्रियाकलाप पूर्णतः गैरकानूनी र असंवैधानिक रहेको आरोप लगाएका छन् । बिहीवार राजधानी काठमाडौंमा सम्पादकहरुसँगको संवादमा उनले यस्तो आरोप लगाएका हुन् । उनले जेन–जी आन्दोलनको अनुसन्धानका लागि गठित जाँचबुझ आयोगमा बयान दिन जाने कि नजाने आफ्नो व्यक्तिगत कुरा भएको समेत टिप्पणी गरे । उनले जाँचबुझ आयोगको मनशाय के छ भन्ने कुरा सञ्चारमाध्यमहरुमा आयोगका सदस्यहरुले व्यक्त गरेका अभिव्यक्तिहरुबाट पुष्टि भइसकेको समेत बताए ।

वर्तमान सरकार अन्तरिम सरकारमा मात्र नभई असंवैधानकि सरकार भएको समेत उनको आरोप छ । उनले वर्तमान प्रधानमन्त्री कार्कीलाई निर्वाचन गराउन राष्ट्रपतिले प्रधानमन्त्रीमा नियुक्त गरेको जिकिर गर्दै कुनै प्रतिष्ठान मास्ने अधिकार नरहेको समेत टिप्पणी गरे । उनले समय एकनासले नचल्ने उल्लेख गर्दै होस गरेर अगाडि बढ्न समेत सरकारलाई चेतावनी दिए ।

उनले भने, ‘बयान दिन जाने नजाने मेरो कुरा हो । कानूनी व्यवस्था के छ मैले नि हेरेको छु । उहाँहरुले मनसाय के छ भन्ने कुरा त मिडियामा बोलेको कुरा सुनेको छु । मलाई जनताले माया गरेका छन् । विरोधीले लखेटेका छन् । न म माया गरेर यहाँ छु न त विरोध गरेर सक्किएको छु । उनीहरु चाँही सक्कियो भन्ने ठान्छन् ।’

उनले भने, ‘सुशीला कार्कीजीहरुले जुन सम्झौता भनेर ड्रामा गर्नुभयो । त्यो भनेर टुंगिदैन । उहाँ अन्तरिम सरकार मात्रै होइन असंवैधानिक पनि हो । उहाँलाई निर्वाचन गर्न पो नियुक्त गरिएको हो । कुन प्रतिष्ठान मास्ने के गर्ने ? भनेर होइन । उहाँहरुलाई यत्ति भन्न चाहन्छु कि– फागुन २१ गतेपछि फागुन २२ आउँछ । सुशीलाजीमा गएर टक्क समय रोकिने होइन । त्यही भएर होस् गरेर चल्न म उहाँहरुलाई आग्रह गर्न चाहन्छु । उहाँहरुको क्रियाकलाप गैरकानूनी र प्रतिशोधपूर्ण छ । त्यसकारण त्यो सम्झौताका दफाहरुमा पस्नु पर्ने जरुरी नै छैन ।’ उनले आफूलाई बालुवाटार भागेको भन्ने टिप्पणी आउने गरेको भन्दै नभागेको भए के गर्नु हुन्थ्यो ? भन्दै जेनजी नेताहरुलाई प्रश्न गरेका छन् । आफू राजधानी वरपर नै कसैको घरमा बसेको र डेरा पाउना साथ गुन्डुमा सरेको ओलीको भनाइ छ ।

‘मैले डेरा खोजेँ । पाएपछि सरेँ । डेरा नसर्दा म यहाँ छु भनेर डाँडाडाँडामा गएर माइक लगाउने कुरा त भएन नि,’ ओलीले भने, ‘२ गते म गुन्डुमा आएँ । त्यहाँ फुत्त निस्किएँ त । यतै कतै आसपासमा रहेछु र त फुत्त निस्किएँ नि । एयरपोर्ट बन्द थियो के रे ।’ उनले विमानस्थलमा गएर टिकट हेरे हुने पनि बताए । ‘आफ्नो घरमा नहुँदा अर्काको डेरामा हुँदा धाक लगाएर असहज त पारिदिन भएन नि,’ ओलीको भनाइ छ । आफू नभागेरै बसेको भए के गरिन्थ्यो ? भनेर प्रश्न गरे । ‘नभाग्या भए के गर्थे त सुशीलाजी वा अरुले ? के गर्नु हुन्थ्यो उहाँले ? हुन त भाषा सुनिएको छ, रेकर्डमा आएको छ । तर पनि उहाँहरूकै मुखबाट सुनौं न त ? जेनजी नेताहरू सुशीला कार्कीहरूलाई नै सोध्छु,’ ओलीले भने ।

काठमाडौं । नेकपा (एमाले) का अध्यक्ष केपी शर्मा ओलीले नेतृत्वको विषयमा शर्त राखेर सहमति नहुने स्पष्ट पारेका छन् । आज (बिहीबार) काठमाडौंमा सम्पादकहरूसँग अन्तरक्रिया कार्यक्रममा ओलीले वरिष्ठ उपाध्यक्ष ईश्वर पोखरेलको अभिव्यक्तिको जबाफ दिँदै संवादबाट मात्रै सहमति हुने बताएका हुन् । ‘कुराबाट पो सहमति हुन्छ त । पूर्व शर्त राखेर सहमति हुन्छ ?,’ ओलीले भने । बुधबार सम्पादकहरूसँग छलफल गर्दै वरिष्ठ उपाध्यक्ष पोखरेलले महाधिवेशनमा ओलीले आफू बाहेक अरूलाई अध्यक्ष घोषणा गरे सहमति हुन सक्ने बताएका थिए ।

‘छोड्छौ भनेर सहमति भनेर हुन्छ ? मसँग भन्नुप¥यो । मसँग भन्नु भएको छैन । बाहिर–बाहिर उम्मेदवारी घोषणा गर्नु भाछ,’ उनले भने । उनले सहमतिका लागि कसैलाई दबाब नदिने पनि बताएका छन् । ‘संवादबाट सहमति भयो भने त्यो सहमति हो । दबाबबाट गर्न चाहँदैनौं,’ उनले भने । एमाले महाधिवेशन शनिबारदेखि सुरू हुँदैछ । आगामी नेतृत्वका लागि ओलीसँगै ईश्वर पोखरेलले पनि उम्मेदवारी दिने तयारी गरेका छन् ।

काठमाडौ । नेकपा (एमाले) का सचिव गोकर्ण विष्टले पार्टीको एउटा पदमा दुई कार्यकालको व्यवस्था पुनः कायम गरेर जानुपर्ने बताएका छन् । आज (बुधबार) एमालेको एघारौं महाधिवेशनका सन्दर्भमा काठमाडौं आयोजित अन्तर संवादमा उनले त्यो व्यवस्था हटाउँदा समस्या भएको भन्दै आउँदो महाविधेशनबाट त्यो कायम गरेर जानुपर्ने बताएका हुन् ।

‘लोकतन्त्रमा जनताले जहिल्यै आशा गरिरहने अवस्था हुन्थ्यो तर हामीले दुई कार्यकालको व्यवस्था हटाउँदा त्यसमा पनि समस्या भो,’ बिष्टले भने, ‘अब हामीले आगामी महाधिवेशनबाट दुई कार्यकालको व्यवस्था पुनः कायम गरेर प्रभावकारी बनाउनु पर्छ । त्यसमा हामी सफल हुनेछौं ।’ उनले नयाँ पुस्ताले प्रतिनिधित्व चाहेको भन्दै ४० वर्षमुनिका लागि कोटा नै निर्धारण गरेर केन्द्रीय सदस्य बनाउने बताएका छन् । ‘नयाँ पुस्ताले हस्तक्षेप र प्रतिनिधित्व चाहेक छन्,’ बिष्टले भने, ‘४० मुनिका तर्फबाट कोटा नै निर्धारण गरेर केन्द्रीय सदस्य बनाउन पहल गरिन्छ ।’

सुशासनमा जोड दिए मात्रै युवाको आकर्षण पार्टीमा हुने धारणा उनको छ । ‘जति धेरै सुशासनमा जोड दिएर सफलता मिल्छ युवा पुस्ताको आकर्षण त्यति नै हुन्छ,’ बिष्टले भने । उनले चुनावी तालमेलमा पनि पार्टी अवसरवाद देखाएको टिप्पणी गरेका छन् । ‘राप्रपासँग चुनावमा गठबन्धन गरेर अवसरवाद देखायौं,’ बिष्टले भने, ‘सरकारमा जान कांग्रेस, माओवादी, रास्वपा, राप्रपासहितका दलसँग जसरी सहकार्य गरियो । यसले अवसरवादको चरम नमुना प्रदर्शन भयो ।’

काठमाडौं । नेकपा (एमाले) का केन्द्रीय सदस्य डा. सुरेन्द्र मानन्धरले पार्टी निर्माणमा ऊर्जावान समय दिएका कार्यकर्ता पाखा पारिएको आरोप लगाएका छन् । उनले पार्टी निर्माणमा योगदान गर्नेहरू पाखा पारिदाँ एमाले अहिलेको संकटमा पुगेको बताए । बुधबार एमालेको ईश्वर पोखरेल समूहले ११ औं महाधिवेशनका सन्दर्भमा काठमाडौँमा आयोजना गरेको अन्तर संवाद कार्यक्रममा उनले एमाले अध्यक्ष केपी शर्मा ओली असक्षम रहेको बताउँदै उनले राम्रा र नराम्रा कामको जस र अपजस दुबै ओलीले लिनुपर्ने बताए ।

मानन्धरले आन्दोलन र पार्टी नेतृत्व दुबै सच्याउन केन्द्रीय किमिटीमै लिखित रूपमा प्रस्ताव दर्ज गरेको जानकारी दिँदै पार्टी र आन्दोलन फरक कित्तामा पुगेको बताए । उनले एमालेमा युवा संगठन भए पनि युवा नभएको, किसान संगठन रहेको तर किसान एमालेसँग नभएको बताए । नेतृत्वको नालायकिको कारण कम्युनिष्ट आन्दोलन दुर्घटनाको शिकार भएको उनको जिकिर छ ।

त्यस्तै अर्का केन्द्रीय सदस्य अरबिन्द्र सिंहले अध्यक्ष केपी शर्मा ओली पार्टीलाई चरिनाङ्गो बनाएको आरोप लगाएका छन् । भदौ २३ र २४ को विध्वंश केपी ओलीकै कारण भएको भन्दै उनले पार्टीभित्र अहिले पनि कतिपयले केपी ओली संकटको मोचन गर्ने नेता भन्दै भ्रम बाँड्न लागि परेको बताए । उनले एकनाथ ढकालहरू छुट्टै पार्टी भएर पनि एमालेको सांसद हुन मिल्ने, पार्टीमा विद्या भण्डारीको सदस्यता रोकेर गल्ती गरिएको बताएका छन् ।

काठमाडौं । नेकपा (एमाले) केन्द्रीय सदस्य उषाकिरण तिमिल्सिनाले आफूले चार वर्षको अवधिमा ६ मिनेट मात्र बोल्न पाएको बताएकी छन् । नेकपा एमालेको ११औं महाधिवेशनका विषयमा मंगलबार (मंसिर २३) काठमाडौंको बागबजारस्थित होटल हार्दिकमा आयोजित अन्तरसंवाद कार्यक्रममा बोल्दै उनले लामो समयदेखि लोकतान्त्रिक विधि र पद्धतिलाई अनुशरण गर्दै आएको पार्टीले आन्दोलनको संस्कार र संस्कृतिको खिल्ली उडाएको टिप्पणी गरिन्।

आफू कारबाहीमा समेत परेको स्मरण गर्दै उनले भनिन्, ‘म विगत चार वर्ष केन्द्रीय सदस्य हुँदा मैलै बोल्न पाएको समय जम्मा ६ मिनेट हो । त्यो पनि दुईचोटि केन्द्रीय कमिटी बैठकमा । हामीले ल्याएको गणतन्त्र त्यो खालको होइन कि, चार वर्षको अवधिमा जम्मा ६ मिनेट बोल्न पाउने ? पार्टीभित्र बोल्ने ठाउँ कहाँ छ ? निश्चित नेताले मनपरी बोल्ने ठाउँका रूपमा अभ्यास गरिँदै आइयो ।’ पार्टी अध्यक्ष प्रधानमन्त्रीको कुर्सीमा बसेर जनतालाई ललकार्ने काम भएको उनको भनाइ छ । उनले पार्टी अध्यक्ष केपी शर्मा ओलीप्रति लक्षित गर्दै भनिन्, ‘उहाँलाई जसले चुनौती दिन्छ जस्तो लाग्छ, जसले थोरै प्रश्न गर्छ त्यसको कल्याण भयो ।’

काठमाडौं । नेकपा (एमाले) ले आगामी ११ औं महाधिवेशनको उद्घाटन सत्रलाई राष्ट्रिय राजनीतिक उपस्थितिले भरिपूर्ण बनाउन विभिन्न १६ राजनीतिक दलका शीर्ष नेताहरूमाझ औपचारिक निम्तो पठाएको छ । अतिथि सत्कार समितिले तयार गरेको सूचीअनुसार राष्ट्रिय दलदेखि साना दल तथा विदेशस्थित व्यक्तिहरूसम्मलाई निमन्त्रणा पठाउने प्रक्रिया तीव्र बनाइएको छ ।

समितिकी सदस्य सुनिता बरालका अनुसार निम्तो प्राप्त गर्ने दलहरूमा नेपाली कांग्रेस, नेपाली कम्युनिष्ट पार्टी, राष्ट्रिय स्वतन्त्र पार्टी (रास्वपा), मजदुर किसान पार्टी (नेमकिपा) लगायत प्रमुख दलहरू परेका छन् । नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ र रास्वपाका कार्यवाहक सभापति डिपी अर्याललाई विशेष आमन्त्रण गरिएको समितिले जनाएको छ ।

यस बाहेक लोकतान्त्रिक समाजवादी पार्टी (लोसपा), जनता समाजवादी पार्टी (जसपा), जसपा नेपाल, राष्ट्रिय प्रजातन्त्र पार्टी (राप्रपा) तथा राप्रपा नेपाल, राष्ट्रिय जनमोर्चा, जनमत पार्टी, परिवार दल, नेकपा माले, नेपाल कम्युनिष्ट पार्टी (माओवादी), नेपाल कम्युनिष्ट पार्टी क्रान्तिकारी र नागरिक उन्मुक्ति पार्टीलाई समेत महाधिवेशनमा सहभागी हुन अनुरोध गरिएको छ । विदेशस्थित व्यक्तिहरूलाई भेटेर होइन, शुभकामना सन्देशका माध्यमबाट निम्तो पठाइएको तथा नेपालस्थित विदेशी कूटनीतिक नियोगलाई पनि उपस्थितिका लागि अनुरोध गरिएको समितिले जनाएको छ ।
महाधिवेशन तयारीसँगै मूल आयोजक समितिदेखि मञ्च व्यवस्थापन, आवास, स्वयंसेवक र प्रचार समिति सक्रिय रहेका छन् । विशेष लोगो र जिङ्गल सार्वजनिक गर्दै प्रचार समितिले कार्यक्रमलाई सुसंगत बनाउन काम गरिरहेको छ ।

यसैबीच निमन्त्रणा वितरणमा एमाले नेतृ कोमल वली र सुनिता बराल निरन्तर दौडधूपमा छन् । पूर्व सांसदद्वयले नेपाल परिवार दलका अध्यक्ष एकनाथ ढकाल, नेकपा (माले) का महासचिव सिपी मैनाली, नेकपा (माओवादी) का संयोजक नेत्रविक्रम चन्द ‘विप्लव’ लगायतका नेताहरूमाझ महाधिवेशन उद्घाटनमा उपस्थितिका लागि चिठ्ठी पुर्‍याइसकेका छन् । ठूला दलका नेताहरूलाई निम्तो पुर्‍याउने काम भने ओलीको निर्देशनमा अन्य जिम्मेवार व्यक्तिले सम्हालिरहेका छन् । एमालेले महाधिवेशनलाई व्यापक राजनीतिक समागमका रूपमा प्रस्तुत गर्ने तयारीसहित आमन्त्रण विस्तारलाई निरन्तरता दिइरहेको समितिको भनाइ छ ।

विघटित प्रतिनिधि सभाका सबै राष्ट्रिय दल तथा वैचारिक निकटता भएका दलहरूलाई निम्तो पठाइए पनि उज्यालो नेपाल र श्रम संस्कृति पार्टी लगायतका नयाँ बनेका दलहरूलाई भने अहिलेसम्म निम्ता नगरिएको उनले बताइन् । ‘नयाँ बनेका दलहरूलाई अहिलेसम्म निम्ता गरिसकेको छैन, उहाँहरूलाई बोलाउने\नबोलाउने भन्ने विषयमा अहिलेसम्म छलफल भएको छैन,’ बरालले भनिन्, ‘निम्ता गर्ने क्रम चलिरहेको छ, पछि बोलाउन पनि सकिन्छ ।’

काठमाडौं । नेकपा (एमाले) को ११ औं राष्ट्रिय महाधिवेशन नजिकिएसँगै पार्टीभित्र दुई फरक धार खुलेर सक्रिय हुन थालेका छन् । अध्यक्ष केपी शर्मा ओली नेतृत्वको संस्थापन पक्ष र अध्यक्ष पदका दावेदार वरिष्ठ उपाध्यक्ष ईश्वर पोखरेल नेतृत्वको समूह दुबै आ–आफ्ना समर्थन आधार विस्तार र महाधिवेशन प्रतिनिधिसँग संवादमा जुटिरहेका छन्।

पोखरेल पक्षमा उभिएका महिला नेतृहरूले आज बागबजारस्थित हार्दिक होटलमा विशेष भेला आयोजना गर्दैछन् । पार्टी उपाध्यक्ष अष्टलक्ष्मी शाक्य, केन्द्रीय सदस्य विन्दा पाण्डे, उषाकिरण तिम्सिनादेखि रचना खड्कासम्मका नेतृहरू महाधिवेशनका प्रतिनिधि तथा सञ्चारकर्मीहरूसँग नेतृत्व परिवर्तनको आवश्यकता र वैकल्पिक प्यानलबारे खुला संवाद गर्ने तयारीमा छन् । मंगलबार दिउँसो १ बजे हुने यो कार्यक्रममा पोखरेल पक्षले आफ्नो धारणा औपचारिक रूपमै प्रस्तुत गर्ने बताइएको छ । यसअघि पनि पोखरेल समूहका सुरेन्द्र पाण्डे, युवराज ज्ञवाली, कर्ण थापालगायतका नेताहरूले पत्रकार सम्मेलनमार्फत आगामी नेतृत्वगत प्रतिस्पर्धाबारे आफ्नो अडान सार्वजनिक गरेका थिए ।

यता संस्थापन पक्ष नजिक रहेको प्रेस चौतारीले एमाले सचिव लेखराज भट्टसहितका नेताहरूसँग महाधिवेशन केन्द्रित छलफललाई निरन्तरता दिँदै आएको छ । चौतारीले आज दिउँसो २ बजे भट्टसँग संवाद आयोजना गरेको छ । यसअघि चौतारीले उपाध्यक्ष द्वय विष्णु पौडेल र रामबहादुर थापाका लागि पनि छुट्टै पत्रकार सम्मेलन गरेको थियो, जसप्रति पोखरेल पक्ष असन्तुष्ट रहेको बताइएको छ ।

च्यासलमा सोमबार भएको भेटघाटमा पोखरेल समूहका एक नेताले चौतारी इञ्चार्ज राजेन्द्र गौतमसँग यसबारे गुनासो समेत राखेको स्रोतले जनाएको छ । एमालेको ११ औं महाधिवेशन यही मंसिर २७ गतेदेखि काठमाडौंमा प्रारम्भ हुँदैछ । यस महाधिवेशनमा अध्यक्ष ओली र वरिष्ठ उपाध्यक्ष पोखरेल दुवैले आफ्नो–आफ्नै प्यानल बनाई नेतृत्वका लागि प्रतिष्पर्धामा जाने तयारी गर्दै, संगठनभित्रको बहस र गतिविधि अहिले निकै तीव्र बनेको छ ।

काठमाडौं । नेकपा (एमाले) का उपमहासचिव प्रदीप ज्ञवालीले नेपाली कम्युनिष्ट पार्टी (नेकपा) द्वारा आयोजित ‘एकता सन्देश सभा’ केन्द्रित नेकपाका शीर्ष नेताहरूमाथि कडा प्रश्न उठाएका छन् । उपमहासचिव ज्ञवालीले माओवादी आन्दोलनदेखि सिद्धान्तगत दिशासम्मका मुद्दामा पार्टीभित्र स्पष्टता नआएको आरोप लगाउँदै प्रश्न उठाएका हुन् ।

ज्ञवालीले पहिलो प्रश्न माओवादी विचार र ब्रान्ड परित्यागका विषयमा उठाए। ’दुई दशकसम्म ‘माक्र्सवादको विकासको तेस्रो आयाम’ भनेर दाबी गरिएको माओवादलाई किन मार्गदर्शक सिद्धान्तबाट हटाइयो? ‘माओवादी’ पहिचान किन परित्याग गरियो? कुनै स्पष्टीकरण छैन,’ उनले भने । त्यसै गरी जनयुद्धकालीन क्षति तथा त्यसको राजनीतिक–ऐतिहासिक विरासत समेत ‘अलपत्र छाडिएको’ आरोप उनले लगाए । एमालेले प्रस्तुत गरेको ‘जनताको बहुदलीय जनवाद’का २३ आधार आज कहाँ पुगे भन्ने प्रश्न समेत उनले उठाए । ‘तत्कालीन प्रस्तोताले आजसम्म कुनै तर्कसंगत जवाफ दिएका छैनन्,’ ज्ञवालीले उल्लेख गरे ।

यस्तै, एमसिसी लगायत विवादास्पद विषयमा ‘नोट अफ डिसेन्ट’ लेख्ने तथा त्यसलाई पारित गराउन निर्णायक भूमिका खेलेका नेताहरू कुन एजेन्डामा विलय भए भन्ने प्रश्न पनि उनले सोधे । गणतन्त्र स्थापनापछिका १७ वर्षमा विभिन्न नेताहरूले पटक–पटक सरकार र नेतृत्व सम्हालेको उल्लेख गर्दै ज्ञवालीले आजका सबै समस्या एक्लै केपी शर्मा ओलीलाई थोपर्न खोजिनु अन्यायपूर्ण भएको टिप्पणी समेत गरे । प्रदेशस्तरमा चलेका ‘गाली–पुराण’को प्रसंग जोड्दै उनले नेता राजेन्द्र श्रेष्ठले एमालेको सदस्यता घटेर ३ लाखमा झरेको दाबी गरेको विषयलाई व्यंग्य गर्दै भने, ’मानौँ उहाँ केही दिन अगाडिसम्म संगठन विभागमा डेटा इन्ट्री गर्ने कम्प्युटर अपरेटर भए जस्तै ।’

सभालाई लक्षित गर्दै उनले थपे, ‘अकबरले कोरेको धर्कोलाई छोटो बनाउन वीरबलले जस्तै छेउमा लामो धर्को कोर्नुहोस् । एमालेभन्दा ठूलो, राम्रो र सक्षम पार्टी बनाउन सक्नुहुन्छ भने बनाइ दिनुहोस् । तर स्रोता समेत दिक्क हुने गरी कति गाली सप्ताह चलाउने ?’ उनले गणतन्त्र स्थापनादेखि भदौ २४ गतेसम्मका कुल १७ वर्ष ३ महिना १० दिन (कुल ६ हजार ३०५ दिन) मध्ये नेतृत्वमा २,५४२ दिन (प्रचण्ड १,१५४, बाबुराम ५६२, माधव ६२२ र झलनाथ २०४) र सरकारमा ४१८४ दिनभन्दा बढी सहभागी हुँदाका गुण दोषको कुनै जिम्मा लिनु नपर्ने, तर आजको समग्र संकटको जवाफदेही चाँहि १,९६१ दिनसम्म नेतृत्व गरेका केपी शर्मा ओलीले लिनु पर्ने हो ? भन्ने प्रश्न पनि गरेका छन् ।

काठमाडौं । नेपाल कम्युनिष्ट पार्टी (एमाले) को यही मंसिर २७ गतेदेखि सुरु हुने ११औँ राष्ट्रिय महाधिवेशनको उद्घाटनसत्रमा सहभागी हुन अध्यक्ष केपी शर्मा ओलीका तर्फबाट पार्टीका सदस्यको घरघरमा पत्र पठाउन थालिएको छ । पार्टीको बागमती प्रदेशका इञ्चार्ज एवं महाधिवेशनका लागि गठित जनपरिचालन कमिटीका सचिव राजन भट्टराईले लोकतन्त्रका पक्षधर शक्ति एकजुट भएर जानुपर्ने आवश्यकता महसुस गराउने गरी अध्यक्ष ओलीका तर्फबाट पर्चा (पत्र) तयार पारेर पठाउन थालिएको बताए ।

राष्ट्रियता, लोकतन्त्र र संविधानमाथि आएको सङ्कटविरुद्ध जनशक्तिको ऐक्यबद्धता प्रदर्शन गर्ने महत्वपूर्ण अवसरका रूपमा महाधिवेशनलाई रुपान्तरित गर्नुपर्ने अध्यक्ष ओलीको आग्रह छ । उनले एमालेलाई राष्ट्रियता र राष्ट्रिय स्वाभिमानको पहरेदार, लोकतन्त्रको सारथी, सामाजिक न्याय र सुरक्षाको सूत्रधार, सुशासन र विकासको नायक तथा समृद्ध नेपाल सुखी नेपालीको सपना पूरा गर्ने पार्टीका रूपमा चित्रण गरे ।

उनले वर्तमान राजनीतिक परिस्थितिलाई ‘गम्भीर चुनौतीको समय’ भएको टिप्पणी गरे । यही मंसिर २७ गते दिउँसो १२ः३० बजे भक्तपुरको सल्लाघारीमा एमालेको ११औं राष्ट्रिय महाधिवेशन उद्घाटन हुँदैछ । उद्घाटनका लागि एमालेले बागमती, गण्डकी र मधेस प्रदेशका कार्यकर्ता तथा जनसमुदायलाई विशेष रूपमा उपस्थित गराउने योजना बनाएको सचिव डा. भट्टराईले जानकारी दिए ।

काठमाडौं । नेकपा (एमाले) का उपाध्यक्ष रामबहादुर थापा ‘बादल’ ले केपी शर्मा ओलीलाई पार्टी अध्यक्षमा निरन्तरता दिनुपर्ने बताएका छन् । शुक्रवार प्रेस चौतारी नेपालले काठमाडौंमा आयोजना गरेको एक कार्यक्रममा बोल्दै उनले पार्टीले ओलीलाई नै निरन्तरता दिने निष्कर्षमा पुगेको बताएका हुन् । उनले मुलुकमा राष्ट्रिय स्वाधिनता, लोकतन्त्रको रक्षा र प्रतिक्रान्तिलाई परास्त गर्न पनि ओली नेतृत्वको विकल्प नभएको निष्कर्षमा पार्टी केन्द्रिय समिति पुगेको दाबी समेत गरे ।

ओलीका नीति, विचार र उनले हासिल गरेको उपलब्धिले पनि उनलाई नेतृत्वमा निरन्तरता दिन आवश्यक देखिएको उपाध्यक्ष थापाको जिकिर थियो । उपाध्यक्ष थापाले आम जनता, पार्टी कार्यकर्ता र राष्ट्रिय आवश्यकतालाई सम्बोधन गर्न पनि एमालेले उनलाई नेतृत्वमा निरन्तरता दिन आवश्यक रहेको बताए । उनले वरिष्ठ उपाध्यक्ष ईश्वर पोखरेलप्रति संकेत गर्दै अहिलेको अवस्थामा नेतृत्वका लागि उम्मेदवारी घोषणा गर्दै हिँड्ने कुरा उपयुक्त नभएको समेत बताए ।

उपाध्यक्ष थापाले भने, ‘उहाँका योगदान, उहाँले लिएका नीतिहरु, अवलम्वन गर्नु भएको विचारहरु र उहाँले प्राप्त गर्नु भएको उपलब्धिहरुलाई हेर्दा अहिले पनि उहाँको आवश्यकता देशलाई छ, पार्टीलाई छ । अझ अहिलेको विशिष्ट स्थितिमा ठोस स्थितिमा लोकतन्त्रको स्थापनाको निम्ति उहाँको झन बढी आवश्यकता छ । देशको राष्ट्रिय स्वाधिनताको रक्षाको निम्ति झन उहाँको बढी आवश्यकता छ ।’

उनले भने, ‘त्यो हिसावकितावले वर्तमान नेतृत्वलाई नै निरन्तरता दिनुपर्छ भन्ने निष्कर्षमा केन्द्रिय समिति पुगेको हो । यो नेतृत्वको सवालमा हाम्रो विधान महाधिवेशनमा पनि गम्भिर रुपमा छलफल चल्यो । भर्खरै बसेको केन्द्रिय समिति बैठकमा पनि लिडरसिपको सवालमा गम्भिर रुपमा बहस भएर उहाँको आवश्यकता अहिले पनि देशलाई छ । उहाँको नेतृत्वमा मात्रै नेकपा एमाले अगाडि बढ्नसक्छ । र देशलाई समृद्धिको दिशातिर अगाडि बढाउन सक्छ भन्ने कुराको निष्कर्षमा पुगेर यो निर्णय भयो ।’

कार्यक्रममा बोल्दै उनले भने, ‘त्यो कोणबाट पार्टीलाई एकतावद्ध गर्ने, पार्टीलाई सुदृढ गर्ने र यो प्रतिक्रान्तिलाई परास्त गर्नको निम्ति वर्तमान अध्यक्षको निरन्तरता आवश्यक छ भन्ने हो । त्यो हिसावकितावबाट यो कोणबाट अहिले जो नेतृत्व छ नेकपा एमालेको अध्यक्षलगायतको । अहिलेको ठोस परिस्थितिमा यो नेतृत्वलाई निरन्तरता दिनुपर्छ भन्ने हो अर्थमा । त्यसकारण पार्टीलाई एकतावद्ध गर्नको निम्ति पनि अहिलेको नेतृत्वलाई निरन्तरता दिनुपर्छ भन्ने यो हो । त्यसकारण यो महाधिवेशनको बारेमा पार्टी केन्द्रिय समितिको पनि यही निष्कर्ष हो । ’

उपाध्यक्ष बादलले भने, ‘हुन त अहिले विभिन्न कमरेडहरुले सार्वजनिक रुपमा विभिन्न उम्मेदवारीहरु घोषणा गरिरहनु भएको छ । केन्द्रिय समितिको निर्णयको कोणबाट हेर्दा यो ढंग जानु एमाले नेताहरुका लागि उपयुक्त होइन । यसले पार्टीलाई एकतावद्ध गर्दैन । यसले अझ विघटन र विर्सजनतिर लैजान्छ । अहिलेको सन्दर्भमा प्रतिस्पर्धाको नामबाट यो ढंगले जान हामी उपयुक्त हुँदैन । त्यसकारण एकतावद्ध नेतृत्व सहमतिका साथ अघि बढाउने केन्द्रिय समितिको पनि निर्णय भएको र आम जनताको पनि, कार्यकर्ताको पनि यो चाहना भएको हुनाले यही ढंगले जानुपर्छ भन्ने हाम्रो ठहर छ ।’ उपाध्यक्ष थापाले पदाधिकारी संख्या र केन्द्रिय समितिको आकार बढाउन आवश्यक देखिएको उल्लेख गर्दै त्यसका लागि विधानमा संशोधन गरेर अघि बढ्न आवश्यक रहेको समेत बताए ।

काठमाडौं । नेकपा (एमाले) का उपमहासचिव विष्णु रिमालले पार्टीको एघारौ महाधिवेशनले पनि केपी शर्मा ओलीलाई अध्यक्ष बनाउने दाबी गरेका छन् । प्रेस चौतारी नेपालले बिहीवार काठमाडौंमा आयोजना गरेको कार्यक्रममा बोल्दै उनले एमालेले फेरि पनि ओलीलाई अध्यक्ष बनाउने निष्कर्ष निकालिसकेको बताएका हुन् । उपमहासचिव रिमालले ओली फेरि पनि एमालेको अध्यक्ष हुने कुरा निश्चित भएको उल्लेख गर्दै सो समाचार लेखेरै राख्न पनि सञ्चारकर्मीहरुलाई आग्रह गरे । उपमहासचिव रिमालले पार्टीको महाधिवेशन प्रतिनिधि चयनमा देखिएको गुनासो पार्टीले तत्काल सम्बोधन गर्ने समेत बताए ।

उनले भने, ‘टीममा एक नम्बर व्यक्तिको बारेमा हामीले फाइनल गरिसकेका छौँ । अध्यक्ष केपी ओली हुनुहुन्छ । यो चाहीँ ठहर नै हो । साथीहरुले लेखेरै राख्नु भए पनि हुन्छ । छाप्नु भए पनि हुन्छ, बजाए पनि हुन्छ । २९ गते महाधिवेशन सम्पन्न भइसकेपछि नेकपा (एमाले) को अध्यक्ष को हुन्छ ? भन्दाखेरी केपी शर्मा ओली । यसमा हाजिरी जवाफमा फेलै खाइन्न । पूरै नम्बर आउँछ । त्यो भन्दामुनिमा टिम कसरी भन्दा त्यो डिस्कसको विषय हुन्छ ।’ उपमहासचिव रिमालले नीतिको प्रश्नमा एमालेमा विवाद नभएकाले नेतृत्व चयन पनि सहमति नै हुने अवस्था रहेको तर्क समेत गरे ।

काठमाडौँ । नेकपा (एमाले) को आसन्न ११औं राष्ट्रिय महाधिवेशनको उदघाटन सत्रमा १० हजार स्वयंसेवक परिचालित हुने भएका छन् । एमालेको ११औं महाधिवेशनको उद्घाटन यही मंसिर २७ गते भक्तपुरको सल्लाघारीस्थित खुल्लाचौरमा र बन्द सत्र काठमाडौंको भृकुटीमण्डपमा हुने तय भएको छ । पार्टीको महाधिवेशनका लागि गठित स्वयंसेवक परिचालन समितिका संयोजक भानुभक्त ढकालका अनुसार उद्घाटनको खुल्ला सत्रमा उल्लेख्य जनसहभागिता हुने भएकाले १० हजार स्वयंसेवक परिचालन गर्ने व्यवस्था गरिएको जानकारी दिए ।

संयोजक ढकालका अनुसार महाधिवेशनको बन्द सत्रमा करिब ५०० स्वयंसेवक हुनेछन् । ती स्वयंसेवक पार्टीका विभिन्न २४ जनसंगठन र विभिन्न कमिटीबाट माग गरिएको उनले बताए । एमालेले हालै गठन गरेको राष्ट्रिय स्वयंसेवक फोर्स (एनभिएफ) ले पनि स्वयंसेवाको समन्वय गर्नेछ। यस्तै सल्लाघारीस्थित नेपाल ट्रष्टको १०८ रोपनी क्षेत्रफलमा फैलिएको उक्त चौरमा एमालेका उपमहासचिव एवं महाधिवेशनको जनपरिचालन समितिका संयोजक प्रदीपकुमार ज्ञवालीसहितको टोलीले बुधबार अवलोकन गरेको छ । उनका साथै एमालेका केन्द्रीय प्रचार तथा प्रकाशन विभागका प्रमुख राजेन्द्र गौतम, केन्द्रीय सदस्य विनोद श्रेष्ठ, भक्तपुर जिल्ला अध्यक्ष वचन देउजा, उपाध्यक्ष एवं बागमती प्रदेशका स्वास्थ्यमन्त्री किरण थापा, जिल्ला सचिव विष्णु तामाङलगायत सहभागी थिए ।

उक्त चौरमा करिब दुई लाख जनसहभागिताको क्षमता गरिएको संयोजक ढकालले उल्लेख गरे । उनका अनुसार त्यहाँ मञ्च व्यवस्थापन, शौचालयलगायत आवश्यक पूर्वाधार निर्माणका लागि स्वयंसेवक खटिसकेका छन् । उद्घाटनका दिन पूर्वबाट आउने सवरीसाधानलाई जगातीस्थित इँटा तथा टायल कारखानामा र पश्चिमबाट आउने सवारीसाधनलाई गठ्ठाघरबाट कमेरोटार क्षेत्रमा व्यवस्थापन गरिने उनले जानकारी दिए । महाधिवेशनमा आयोजक र निर्वाचित गरी दुई हजार ४०० प्रतिनिधि रहने छन् । महाधिवेशन यही मंसिर २७ देखि २९ गतेसम्म हुनेछ ।

काठमाडौं । नेकपा (एमाले) का नेता तथा कार्यकर्ता ११ औं राष्ट्रिय महाधिवेशनका लागि प्रतिनिधि चयन गर्न स्वदेश र प्रवासमा व्यस्त छन् ।यही मंसिर २७ देखि २९ गतेसम्म आयोजना हुने महाधिवेशनका लागि पार्टीका करिब छ लाख ६७ हजार ६३० संगठित सदस्यबाट झण्डै दुई हजार २०० सय प्रतिनिधि चयन गर्न जिल्ला–जिल्लामा उनीहरू व्यस्त भएका हुन् ।

महाधिवेशनका लागि यसपटक प्रत्येक संघीय निर्वाचन क्षेत्रबाट कम्तीमा एक जना युवक प्रतिनिधिको कोटा सुरक्षित गरिएको छ । प्रदेश कमिटीहरूबाट ४५, प्रतिनिधिसभा निर्वाचन क्षेत्रबाट करिब एक हजार, विशेष जिल्ला कमिटीबाट ४७, दलितबाट ८१, ट्रेड युनियनबाट ४० प्रतिनिधि चयन हुनेछन् ।

पार्टी विधानअनुसार महाधिवेशनमा आयोजक केन्द्रीय कमिटीबाट तीन सय ५४ स्वतः प्रतिनिधि हुनेछन् । केन्द्रीय अनुशासन आयोगबाट २९, लेखा आयोगबाट ३०, निर्वाचन आयोगबाट २५ र सल्लाहकार परिषदबाट २५ प्रतिनिधि गरी चार सय ६४ स्वतः प्रतिनिधि हुनेछन् ।

एमाले केन्द्रीय प्रचार तथा प्रकाशन विभाग प्रमुख राजेन्द्र गौतमका अनुसार गत कात्तिक १५ गतेको केन्द्रीय सचिवालय बैठकले प्रतिनिधिसभा निर्वाचन क्षेत्रलाई आधार मानी प्रति एक हजार २०० संगठित सदस्य बराबर दुई खुला र एक महिला एक प्रतिनिधि हुनुपर्ने व्यवस्था बमोजिम प्रतिनिध छनोट जारी छ । –रासस

काठमाडौं । नेकपा (एमाले) को ११ औं राष्ट्रिय महाधिवेशन नजिकिँदै गर्दा पार्टीले नारा, लोगोदेखि लिएर उद्घाटनस्थलसम्मका सबै तयारीलाई तीव्र बनाएको छ । बुधबार च्यासलस्थित पार्टी केन्द्रीय कार्यालयमा बसेको महाधिवेशन सचिवालय बैठकपछि प्रचार विभाग प्रमुख राजेन्द्र गौतमले महाधिवेशनका विभिन्न पक्षबारे विस्तृत जानकारी दिएका हुन् ।

गौतमका अनुसार महाधिवेशनका लागि गठन गरिएका १२ वटा समितिहरूले आफ्नो–आफ्नो क्षेत्राधिकारभित्रको तयारीबारे बैठकलाई प्रतिवेदन दिएका छन् । महाधिवेशनमा प्रस्तुतीकरण गरिने लोगोसम्बन्धी अन्तिम छलफल पनि सकिएको र चाँडै सार्वजनिक गरिने बताएका छन् । पार्टीले यस पटक महाधिवेशनको मुख्य नारा ‘निर्णायक राष्ट्रिय शक्ति निर्माणको संकल्प ः समृद्ध नेपाल र सुखी नेपाली हाम्रो गन्तव्य’ तय गरेको छ । गौतमले निर्वाचन आयोगमा दल दर्ता अध्यावधिक गरिएको उल्लेख गर्दै यो नियमित कानुनी प्रक्रिया भएको बताए ।

त्यस्तै, संसद पुनः स्थापनाको पक्षमा एमालेले संवैधानिक समीक्षा (जुडिसियल रिभ्यु) का लागि निवेदन दिइसकेको जानकारी पनि दिए । सरकार अहिले शान्ति–सुरक्षाप्रति संवेदनशील नभएको आरोप लगाउँदै उनले निर्वाचनका लागि सुरक्षित वातावरण बनाउन सरकार गम्भीर हुनुपर्ने आवश्यकता औंल्याए ।
महाधिवेशनको उद्घाटन स्थलका विषयमा पनि बुधबारकै बैठकमा निर्णायक छलफल भयो । टुँडिखेल खुलामञ्च, भृकुटीमण्डप र भक्तपुरको सल्लाघारी चौरमध्ये विकल्प खोज्दा अंततः सल्लाघारी खोलामञ्च उद्घाटनको मुख्य स्थलका रूपमा अगाडि आएको गौतमले जानकारी दिए । काठमाडौंको सवारी चाप, भीडभाड र आवतजावतको समस्या तथा व्यवस्थापन पक्षलाई मध्यनजर गर्दै सल्लाघारीतर्फ झुकाव बढेको उनले बताए । यद्यपि, बन्द सत्र भने काठमाडौंको भृकुटीमण्डपमै गरिनेछ ।

एमालेको ११ औं महाधिवेशन मंसिर २७, २८ र २९ गते हुँदैछ । यो महाधिवेशन आगामी कार्यकालका लागि नेतृत्व चयनसँग प्रत्यक्ष जोडिएको छ । पार्टीले भदौ २०–२२ गते विधान महाधिवेशन सम्पन्न गरी नीति तथा संरचनामा आवश्यक परिमार्जन गरिसकेको छ । अध्यक्ष केपी शर्मा ओलीले यसपटक विधानमा ठूलो बहस हुने सम्भावना नरहेको संकेत गरिसकेका छन् । सर्वसाधारण सदस्यदेखि नेतृत्व तहसम्मको ध्यान अब महाधिवेशनको संयोजन, नारा, कार्यक्रम र नेतृत्व छनोटको प्रक्रियामा केन्द्रित रहेको देखिन्छ ।

काठमाडौं । संसद विघटनविरुद्ध देशभरका ७५३ वटै स्थानीय तहमा जनप्रदर्शन गरिसकेको नेकपा (एमाले) ले आज (शनिबार) राजधानी काठमाडौंलाई केन्द्र बनाउँदै व्यापक शक्ति प्रदर्शन गर्दैछ । जनपरिचालन अभियानलाई तीव्रता दिँदै एमालेलाई आजको दिन महत्वपूर्ण देखिएको छ, जहाँ काठमाडौंका विभिन्न चोक–चोकबाट र्‍यालीसहित हजारौँ कार्यकर्ता भृकुटीमण्डपतर्फ उन्मुख भएका छन् ।

संसद् विघटनपछिको राजनीतिक परिस्थितिमा असंवैधानिक कदम चालिएको आरोप लगाउँदै प्रदर्शनमा उत्रिएको एमालेलाई आज भृकुटीमण्डपको जनसभामा ठूलो जनसमूह उतार्ने योजना छ । पार्टीका पोलिटब्युरो सदस्य महेश बस्नेतका अनुसार कम्तीमा ६० हजार कार्यकर्ता सहभागिता जनाउने अनुमान गरिएको छ । शुक्रबार मात्र ‘नेशनल भोलेन्टियर फोर्स’ सार्वजनिक गरेको एमालेलाई आजको प्रदर्शन आफ्नो शक्तिको परीक्षणको रूपमा पनि हेरिएको छ ।

जनसभामा सहभागी हुन काठमाडौं उपत्यकाभित्रका मात्र होइन, वरपरका जिल्लाबाट पनि कार्यकर्ताहरू बिहानैदेखि काठमाडौं प्रस्थान गरेका छन् । यसले राजधानीका मुख्य सडकहरूमा पैदल तथा सवारी चाप असामान्य रूपमा बढेको छ । एमालेको जुलुस बढ्दै जाँदा भृकुटीमण्डप–प्रदर्शनीमार्ग वरपरका सडकमा भीड अत्यधिक भएपछि प्रहरीले त्यहाँ सञ्चालन भइरहेका सवारी साधनलाई वैकल्पिक मार्गतर्फ डाइभर्ट गरेको छ ।

प्रदर्शनी मार्ग हुँदै चल्ने सवारीसाधनलाई पद्मोदय मोड तथा सभागृह मोडबाट अन्य मार्गतर्फ मोडिएको छ । त्यसैगरी, टुँडिखेल वरपर र्‍याली भइरहेकाले त्यहाँका सवारी आवागमनमा पनि समय–समयमा रोकावट वा ढिलाइ हुन सक्ने प्रहरीले जनाएको छ । यात्रुहरूलाई वैकल्पिक मार्ग रोज्न आग्रह गरिएको छ ।

राजधानीको संवेदनशील क्षेत्र मानिएको भृकुटीमण्डप आसपास आज बिहानैदेखि ठूलो संख्यामा सुरक्षाकर्मी परिचालन गरिएको छ । भीड नियमन, ट्राफिक व्यवस्थापन र सम्भावित अप्रिय घटना रोकथामलाई ध्यानमा राख्दै प्रहरी, सशस्त्र प्रहरी र ट्राफिक प्रहरी संयुक्त रूपमा खटिएका छन् ।

‘संविधान र लोकतन्त्रको रक्षा हाम्रो साझा जिम्मेवारी !’ भन्ने मूल नाराका साथ बागमती प्रदेश कमिटीले आयोजना गरेको जनसभालाई एमालेका शीर्ष नेताहरूले सम्बोधन गर्ने कार्यक्रम छ । विभिन्न र्‍यालीहरू सहभागी भइरहेका कारण भृकुटीमण्डप क्षेत्र बिहानैदेखि नाराबाजी, झन्डा तथा ब्यानरसहित भीडले भरिएको छ । जनसभापछि राजनीतिक सन्देशसहित पार्टीले आगामी कार्यक्रम घोषणा गर्ने अनुमान विश्लेषकहरूले गरेका छन् ।

काठमाडौं । एमालेका पोलिटव्युरो सदस्य महेश बस्नेतले जेनजीको नाममा आफ्ना गतिविधिहरूमा जहाँ अवरोध हुन्छ त्यहा प्रतिरोध गर्ने चेतावनी दिएका छन् । एमालेको युवा दस्ता ‘युथ भोलेन्टियर फोर्स’ घोषणा अघि शुक्रबार बबरमहलमा युवाहरूको प्रदर्शनको नेतृत्व गर्दै बस्नेतले प्रतिवाद गर्ने चेतावनी दिएका हुन् । उनले खास जेनजीहरूका माग सम्बोधन एमाले नै गर्ने दाबी गर्दै जेनजी आन्दोलनका घाइते र शहीदहरूलाई न्याय दिन पनि प्रतिनिधिसभा पुनस्र्थापना गर्नुपर्ने बताए ।

‘जेनजीको नाममा जहाँ अवरोध त्यहाँ प्रतिरोध हुन्छ’ उनले भने,’ जेनजीहरूसँग हामी सम्पर्कमै छौं । तर उनीहरूका नाम र ब्यानर भजाएर अरु खालका तत्वहरू सक्रिय छन् ।’ अध्यक्ष केपी शर्मा ओलीले आज फोर्सको केन्द्रीय कमाण्ड घोषणा गर्दैछन् । नेता बस्नेतले पालिका, वडा र टोलटोलमा सुरक्षा दिनका लागि फोर्स बनाइने जानकारी दिए । ‘हामी विभिन्त पेशागत संस्थासँग पनि सहकार्य गर्छौं’ नेता बस्नेतले भने, ‘अब राष्ट्रिय सम्पत्ति जलाउने तोडफोड गर्ने काम हुँदा हामी टुलुटुलु बसेर हेर्दैनौं ।’

काठमाडौं । नेकपा (एमाले) ले आज र भोलि काठमाडौंमा दुई वृहत कार्यक्रमको आयोजना गर्दैछ । आज बिहान ११ बजे एमालेको नेसनल भोलिन्टियर फोर्सले कार्की ब्यांक्वेट, बबरमहलमा एक विशेष कार्यक्रम गर्दैछ ।

यसअघि, फोर्सका सदस्यहरू बबरमहलमा भेला भई माइतीघर हुँदै पुनः बबरमहल र त्यहाँबाट बानेश्वरसम्म र्‍याली गर्ने कार्यक्रम तय भएको छ । यस कार्यक्रमको प्रमुख अतिथि पार्टी अध्यक्ष एवं पूर्व प्रधानमन्त्री केपी शर्मा ओली रहने छन् । एमालेले यस कार्यक्रमका लागि जिल्ला प्रशासन कार्यालय काठमाडौँलाई जानकारी गराइसकेको छ ।

यद्यपि, प्रमुख जिल्ला अधिकारी ईश्वरराज पौडेलका अनुसार कार्यक्रमका लागि निवेदन प्राप्त भए पनि सोबारेको अनुमति अझै विचाराधीन अवस्थामै छ । प्रशासनको निर्णयले कार्यक्रमको स्वरूप र व्यवस्थापनमा केही फेरबदल आउन सक्ने सम्भावना छ । यसैगरी, यही शनिबार एमाले बागमती प्रदेश कमिटीले प्रदर्शनीमार्गमा ‘शान्तिपूर्ण जनप्रदर्शन तथा जनसभा’ आयोजना गर्ने भएको छ ।

काठमाडौं । नेकपा (एमाले) ले सचिवालय बैठक बोलाएको छ । एमाले सचिवालय बैठक बिहीबार दिउँसो १ बजे पार्टी केन्द्रीय कार्यालय च्यासलमा बस्न लागेको हो । भोलि बस्ने बैठकमा महाधिवेशनसँग सम्बन्धित तयारीका विषयमा छलफल हुने जनाइएको छ । एमालेको ११ औं महाधिवेशन आगामी मंसिर २७, २८ र २९ गते हुँदैछ । मंसिर १३ गते देशैभर एकै दिन प्रतिनिधि छनोट पनि गर्दैछ ।

त्यस्तै प्रतिनिधि सभा पुनर्स्थापनाको मुद्दा लिएर एमाले अदालत जाँदैछ। हिजो बसेको विघटित संसदीय दल बैठकले अदालत जाने विषयमा तयारी र आवश्यक कार्य गर्न निवर्तमान प्रमुख सचेतक महेश बर्तौला र सचेतक सुनीता बराललाई जिम्मा दिएको छ । यसैबीच भदौ २४ गते आन्दोलनकारीबाट जलाएपछि एमाले बैठक पार्टी कार्यालयबाहिर बस्दै आएको थियो । सचिवालय बैठक प्रायः अध्यक्ष केपी शर्मा ओलीको अस्थायी निवास गुण्डुमा बस्ने गरेको थियो । आगजनीबाट क्षतिग्रस्त पार्टी कार्यालय एमालेले पुनर्निर्माण गरिरहेको छ । अहिले पार्टीका नियमित काम पार्टी कार्यालयबाटै भइरहेको छ । बिहीबारको बैठक पनि एमालेले पार्टी कार्यालयमै राख्न लागेको छ ।

काठमाडौं । नेकपा (एमाले) का उपाध्यक्ष विष्णुप्रसाद पौडेलले देशमा भएको राजनीतिक घटना क्रमलाई प्रतिगामी भन्दै त्यसकाविरुद्ध पार्टी सडक आन्दोलनमा जानुपर्ने बताएका छन् । मंगलबार पार्टीको विघटित संसदीय दलको बैठकमा बोल्दै उनले यस्तो टिप्पणी गरेका हुन् । उनले गत भदौ २३ र २४ मा भएको जेन–जी आन्दोलन संविधानमिाथिको आक्रमण भएको जिकिर गरे ।

उनले अनधिकृत रुपमा संसद विघटन गरेर संसदबाहिरबाट सरकार गठन गरिएको उल्लेख गर्दै यसका विरुद्ध निर्णायक आन्दोलनमा जानुपर्ने बताए । पौडेलले जनतालाई संगठित गर्दै प्रतिनिधि सभा पुनःस्थापनाका लागि निर्णायक आन्दोलन सुरु गर्नुपर्ने पार्टीको निष्कर्ष रहेको पनि बताए ।

उनले भने, ‘गत भदौ २३, २४ को सिरानी हालेर देशमा जुन प्रकारको प्रतिगमन भएको छ यो प्रतिगमनको विरुद्धमा आन्दोलनमा जानुपर्ने, सडकमा उत्रिनुपर्ने जिम्मेवारीमा छौं । हामीले सुविचार लिएर जनताको माझमा जानुपर्ने, जनतालाई संगठित गर्नुपर्ने र आन्दोलित गर्नुपर्ने परिवर्तित भूमिकामा छौं । हामीले हरेक परिस्थितिमा आफूलाई खरो रुपमा उतार्न सक्नुपर्छ जस्तो मलाई लाग्छ । हाम्रो पार्टीको पृष्ठभूमि र हाम्रो पार्टीको विगत पनि त्यस्तै छ ।’

उनले मुलुकमा विकसित घटनाक्रम र पार्टीको भूमिकाका विषयमा पार्टी आन्तरिक छलफलमा जुटिरहेको समेत बताए । पौडेलले अहिलेको सरकारले एमालेमाथि प्रहार केन्द्रित गरेको भन्दै एक भएर सामना गर्नुपर्ने बताएका छ्न् । पौडेलले भने, ‘एमालेलाई ,नेतृत्वलाई, अध्यक्षलाई प्रहार गर्न सरकार उद्दत छ । यसलाई हामीले एक भएर सामना गर्नु पर्दछ ।’

काठमाडौं । प्रतिनिधि सभाको विघटन असंवैधानिक रहेको दाबी गर्दै नेपाल कम्युनिष्ट पार्टी (एमाले) आज विघटित संसदीय दलको विस्तृत बैठक बस्दै छ । बैठक दिउँसो १ बजे पार्टी केन्द्रीय कार्यालय च्यासलमा सञ्चालन हुने जनाइएको छ। दल स्रोतका अनुसार संसद् विघटनविरुद्ध पार्टीले प्रारम्भमै उठाएको विरोधलाई संस्थागत रूप दिन तथा पुनर्स्थापनाका लागि उत्पन्न संवैधानिक र कानुनी पक्षमा ठोस निर्णय लिन बैठक आह्वान गरिएको हो ।

विघटित प्रतिनिधि सभामा एमाले दलका प्रमुख सचेतक महेश बर्तौलाका अनुसार बैठकमा अध्यक्ष केपी शर्मा ओलीले संसद् विघटनको पृष्ठभूमि, त्यसप्रति पार्टीको धारणा र सम्भावित कानुनी कदमबारे सांसदहरूलाई विस्तृत जानकारी गराउने छन् ।

उनका अनुसार संसद् विघटनको संवैधानिक परीक्षण अझै बाँकी रहेकोले पार्टीका तर्फबाट दल वा व्यक्तिगत सांसदमार्फत सर्वोच्च अदालतमा जाने विकल्पलाई आजको बैठकले प्राथमिकताका साथ छलफल गर्नेछ । एमालेले विघटनलाई ‘असंवैधानिक कदम’ भन्दै प्रतिनिधि सभा पुनःस्थापना हुनुपर्ने आफ्नो अडानलाई दृढ बनाउँदै आएको छ । आजको बैठकपछि अदालत जाने सम्बन्धमा औपचारिक निर्णय हुने अपेक्षा गरिएको छ ।

काठमाडौँ । नेकपा (एमाले) का सचिव एवं पूर्वमन्त्री छविलाल विश्वकर्माले जेन–जी आन्दोलनमा आपराधिक गतिविधिमा संलग्नहरूलाई सरकारले तत्काल कारबाही गर्नुपर्ने बताएका छन् ।

आज (शनिबार) बुटवलमा आयोजित जनसभा कार्यक्रममा बोल्दै उनले जेनजी आन्दोलनमा घुसपैठ भई मुलुकमा गुण्डागर्दी गर्ने, निजी तथा सार्वजनिक सम्पत्तिलाई धराशायी बनाउनेहरूलाई सरकारले अझै कारबाहीको दायरामा ल्याउन नसकेको भन्दै आक्रोश व्यक्त गरेका छन् ।

सचिव विश्वकर्माले जेलबाट भागेका कैदीहरूलाई नियन्त्रणमा लिने काम समेत नगरेको भन्दै प्रधानमन्त्री सुशीला कार्की र गृहमन्त्री ओमप्रकाश अर्यालको आलोचना समेत गरे ।

उनले भने, ‘जसले घुसपैठ गरे । जसले यस खालको गुण्डागर्दी गरे । जसले यस खालको आतंकित गतिविधि गरे । जसले देशको सम्पत्ति, निजी सम्पत्ति, प्रतिष्ठानहरू । यसलाई धराशायी बनाउने काम गरे । अब यो सरकारले त्यो छानबिन गर्न पर्दैन ? ती अपराधीहरूलाई कानुनको दायरामा ल्याउनु पर्दैन ? जेलबाट हजारौँ कैदीहरू छुटेका छन् । तिनलाई ल्याउनका लागि यो सरकारले के गरिरहेको छ ? जनताको प्रश्न छ । त्यो जवाफ दिने सामथ्र्य सम्माननीय सुशील कार्कीसँग हुनुपर्छ कि पर्दैन ? गृह मन्त्रीसँग हुनुपर्छ कि पर्दैन ? यो सरकारसँग हुनुपर्छ कि पर्दैन ?’ सचिव विश्वकर्माले मुलुकलाई संकटबाट पार लगाउन आफ्नो पार्टीले सक्दो पहल गरिरहेको जिकिर समेत गरेका छन् ।

काठमाडौं । नेकपा (एमाले) का उपमहासचिव प्रदीप ज्ञवालीले देशको राजनीतिक स्थायित्व र विकास सुनिश्चित गर्न सबै राजनीतिक दल र युवापुस्ता एकताबद्ध हुनुपर्ने बताएका छन् ।

प्रेस चौतारी गुल्मी शाखाद्वारा आज तम्घासमा आयोजित पत्रकार सम्मेलनमा नेता ज्ञवालीले देशको विकासको पहिलो सर्त राजनीतिक स्थायित्व रहेको बताएका हुन् । ज्ञवालीले भने, ‘देश विकासको मार्ग प्रशस्त गर्न सबै दल र युवा एकसाथ भएर काम गर्नु जरुरी छ, अनि पार्टीलाई सशक्त र जनमुखी बनाउने अभियान जारी रहनेछ ।’

उनले हालैको जेनजी आन्दोलनमा घुसपैठ भएको र सुनियोजित ढंगले सार्वजनिक तथा व्यक्तिगत सम्पत्तिमा आगजनी गरिएको टिप्पणी पनि गरेका छन् । उनले भने, ‘वर्तमान सरकारलाई संविधानले मान्यता दिएको होइन । चुनावमा पनि अग्रसर छैन । पुरानै नेताहरू आए खारेज गर्छौं भन्ने चेतावनी दिँदै चुनावको मिति तोक्ने, तर शीर्ष नेताहरूलाई उपत्यका बाहिर जान नदिने काम भइरहेको छ । यसरी कसरी चुनाव हुन्छ भनेर जनता कसरी विश्वास गर्ने ? दलीय व्यवस्थामा राजनीतिक दललाई निषेध गरेर चुनाव हुन सक्दैन ।’

ज्ञवालीले वर्तमान प्रधानमन्त्री र उनको वरपरको समूहले प्रत्यक्ष–अप्रत्यक्ष रूपमा चुनाव रोक्ने वातावरण बनाइरहेको बताएका छन् ।