काठमाडौं । नेकपा (एमाले) का अध्यक्ष तथा निवर्तमान प्रधानमन्त्री केपी शर्मा ओलीले जेनजी आन्दोलन भड्काएको भन्दै टीओबी (तिब्बतीयन ओरिजिनल ग्रुप) प्रति आक्रोश पोखेका छन् । आज (मंगलबार) एमालेको विघटित प्रतिनिधि सभा संसदीय दलको बैठकमा दलका नेता ओलीले तिब्बती शरणार्थीहरूप्रति आक्रोश व्यक्त गरेका हुन् । भदौ २३ र २४ गते भएको जेनजी आन्दोलनका क्रममा ‘टीओबी’ ग्रुपका युवाले ‘मलाई मेरो देश चाहिन्छ’ भनेर चिच्याएको भिडिओ भाइरल भएको थियो भने आन्दोलन भड्काउन सो समूह सक्रिय भएको आरोप छ ।
अध्यक्ष ओलीले अहिलेको सरकारलाई ‘बाघको छालामा स्यालको रजाँइ’ को संज्ञा दिए । ‘यो सरकार बनायो कसले ? जनताले बनाएको होइन । सरकार टेलिफोनबाट, डिस्कर्डबाट बनेको हो’ उनले भने, ‘सरकार राजनीतिबाट बन्छ । चुनावबाट बन्छ । त्यसैले यो असंवैधानिक छ ।’ उनले राजनीति, सामाजिक, आर्थिक रुपले पछाडी धकेल्न खोजिएको बताए । यस्तै, उनले अहिले भ्रष्टाचार बढेको दाबी पनि गरे ।
‘देश दोबाटोमा छ । देशको स्वाधीनता, स्वतन्त्रता जोगाएर समृद्धिको यात्रामा अघि बढाउने कि वा नेपाललाई विनास र बर्बादीको बाटोमा लैजाने यो महत्वपूर्ण प्रश्न हो’ उनले भने, ‘देशमा भ्रष्टाचार अहिले बढेको छ । देश लोकतान्त्रिक प्रणालीमा अघि बढेको थियो । अहिले गलत तरिकाले नेपो बेबी भनेर बच्चा बच्चीमा त्रास फैलाइयो ।’ उनले भदौ २३ र २४ को घटना बालबालिका विरोधी अपराध भएको बताए । उनीहरूलाई मानसिक दबाब दिइएको बताएका छन् । ‘बाबुआमाले भ्रष्टाचार गरेका रहेछन् भने पनि बालबालिकाको के दोष ?’ उनले भने ।
अध्यक्ष ओलीले आफूलाई भदौ २३÷२४ गतेको घटना जिम्मा लिनुपर्छ भन्नेहरू पार्टी विरोधी र नेतृत्व विरोधी भएको बताए । अध्यक्ष ओलीले वर्तमान सरकारले खुलेआम भ्रष्टाचारको काण्ड मच्याएको आरोप लगाएका छन् । अध्यक्ष ओलीले ऊर्जामन्त्री कुलमान घिसिङ र अर्थमन्त्री रामेश्वर खनालको नाम नलिई विद्युत् खरिदको नाममा करोडौँ घोटाला गरेको विदेशी कम्पनीलाई कर छुट दिएर कमिसन खाने काम वर्तमान सरकारले गरेको भन्दै आपत्ति समेत जनाए ।
उनले आफू नेतृत्वको सरकारको पालामा केही भ्रष्टाचार भएपनि वर्तमान सरकारले जस्तो कुशासन र चरम भ्रष्टाचार नगरेको जिकिर समेत गरे । अध्यक्ष ओलीले भने ‘देश समृद्धिको मार्गमा अघि बढिरहेको थियो । यस्तो अवस्थामा अनावश्यक ढंगले न देशमा त्यस्तो चरम भ्रष्टाचार थियो । भ्रष्टाचार हुँदो हो । कुन भ्रष्टाचार कहाँ, कहाँ निरको भ्रष्टाचार रु कुन केस रु अहिलेका जस्ता खासै तोकिएका यति करोडका विद्युत् खरिदका विद्युत् विक्रीका अथवा विदेशी कम्पनीलाई कर छुटका यस्ता खुलेआम भ्रष्टाचारका काण्डहरू त देखिएका थिएनन् त रु अहिले जुन देखिएको छ । त्यो त देखिएको थिएन । यस्तो कुशासन पनि देखिएको थिएन । विकासहीनता, राजनीति, अन्योलग्रस्त, अराजक यस्तो त थिएन त ।’ अध्यक्ष ओलीले वर्तमान सरकारले मुलुकलाई विकासहीनता, अराजकता र अन्योलग्रस्त अवस्थामा पुर्याएको समेत बताए ।
