काठमाडौं । नेकपा (एमाले) की सचिव तथा ११ औं महाधिवेशन प्रचार समिति संयोजक पद्मा अर्यालले पार्टी नेतृत्वका लागि अध्यक्ष केपी शर्मा ओली नै अपरिहार्य रहेको जिकिर गरेकी छन् ।

पार्टी कार्यालय च्यासलमा बसेको महाधिवेशन प्रचार समितिको बैठकलाई सम्बोधन गर्दै उनले एमालेले सामना गरिरहेको विषम परिस्थितिमा ओलीको नेतृत्व नै उपयुक्त र आवश्यक रहेको स्पष्ट पारिन् ।

उनका अनुसार आसन्न ११ औं राष्ट्रिय महाधिवेशन पार्टी र देश दुवैका लागि दिशानिर्देशक बन्ने भएकाले नेतृत्व चयनबारे अनावश्यक बहस गर्नु उचित हुने छैन । ‘पार्टीलाई जोगाउन र स्थिरताबाट अघि बढाउन अहिले ओलीजीको विकल्प खोज्ने बेला होइन’, अर्यालले भनिन्, ‘एमालेमा ओलीको विकल्प अहिले पनि ओली नै हुन् ।’

अर्यालले महाधिवेशनले ओलीलाई पुनः अध्यक्षका रूपमा अनुमोदन गर्ने विश्वास व्यक्त गर्दै वर्तमान राजनीतिक संकटले पार्टीभित्र सुदृढ एकता र आन्तरिक समन्वयको आवश्यकता झनै बढाएको औंल्याइन् । उनका अनुसार देश गम्भीर राजनीतिक अनिश्चितताबाट गुज्रिरहेको समय एमालेमाथि भइरहेको ‘चौतर्फी प्रहार’ को सामना गर्न पार्टी एकबद्ध, सक्षम र सबल बन्नैपर्ने छ । संविधान ‘कोमामा पुगेको’ भाषिक चित्र प्रस्तुत गर्दै उनले राष्ट्रियता जोगाउन प्रभावकारी, स्थायी र उत्तरदायी नेतृत्व जरुरी रहेको बताइन् ।

पार्टीभित्र सहमतिमै नेतृत्व निर्माण गर्नुपर्नेमा जोड दिंदै उनले ओलीकै अध्यक्षतामा सर्वसम्मत नेतृत्व टुंगिने दाबी पनि गरिन् । पार्टी पंक्तिबाट अराजनीतिक, अस्वस्थ र संगठनविरोधी अभिव्यक्ति नआओस् भन्दै संयमता र एकताको आग्रह समेत उनले गरेकी छन् । उनका अनुसार अध्यक्ष ओलीको अनुभव, संकट व्यवस्थापन क्षमता तथा संगठनात्मक प्रभावकारिताले नै मुलुकलाई अहिले आवश्यक दिशानिर्देश प्रदान गर्न सक्छ, र यही कारणले महाधिवेशनबाट पनि ओलीकै नेतृत्वलाई निरन्तरता मिल्नेछ ।