काठमाडौं । नेकपा (एमाले) का अध्यक्ष केपी शर्मा ओलीले पार्टीमाथि हमला गर्नेहरुलाई ‘फनक्क घुमेर’ हान्न कार्यकर्तालाई निर्देशन दिएका छन् । एमाले डराउँछ भन्ने भ्रममा नपर्न आग्रह गर्दै उनले जस्तोसुकै हमलाबाट पनि एमाले नभाग्ने बताएका हुन् । पार्टी निकट स्थानीय विकास विभागले आज च्यासलमा आयोजना गरेको कार्यक्रमलाई सम्बोधन गर्ने क्रममा अध्यक्ष ओलीले बारा घटनाको सन्दर्भ औंल्याउँदै सरकारको हस्तक्षेपविरुद्ध कडा प्रतिवाद गर्न नेता–कार्यकर्तालाई आदेश समेत दिए । ‘बारामा होस् वा जुनसुकै ठाउँ होस्, यदि एमालेमाथि आक्रमण र हमला हुन्छ भने हामी भाग्ने होइन, फनक्क फर्केर झ्याम्म हान्ने हो’, उनले भने, ‘एमाले डराएर भाग्छ भन्ने कसैले सोचेको छ भने त्यो नसोचे हुन्छ ।’

ओलीले फरक प्रसंगमा नेपाली कम्युनिष्ट पार्टीका संयोजक पुष्पकमल दाहाल प्रचण्डको ओरालो दिन सुरु भएको पनि बताए । आफ्नै पूर्व सहकर्मीहरु माधव नेपाल, झलनाथ खनाल, वामदेव गौतमकै कारण नेकपाको भविष्य जोखिममा परेको उनको विश्लेषण छ । ‘प्रचण्डले एकताको नाममा नचाहिँदो काम नगर्ने खालका मान्छे, अहंकारले भरिएका मान्छे थुपारेका छन्, अब देख्छन्’, उहाँले अघि भन्नुभयो, ‘म त खुशी छु, दोस्रो, तेस्रो, चौथो र छैटौँ तहका नेता मेरै साथी हुन्, उनीहरु कस्ता छन्, अब प्रचण्डले राम्ररी देख्छन् ।’