पोल्याण्ड । रोमानियाको एक होटलमा लागेको आगोमा परी दुई नेपाली महिलाको ज्यान गएको छ । रोमानियाको ‘होटल डाले’ मा हिजो भएको आगलागीमा परी उनीहरुको मृत्यु भएको हो । उक्त होटल रोमानियाको राजधानी बुखारेष्टबाट लगभग ५२ किलोमिटरमा दूरीको प्रहोभा सहरमा पर्छ ।

आगलागीमा परेर २१ र २४ वर्षका राई तथा तामाङ थरका दुई नेपाली महिलाको घटनास्थलमै मृत्यु भएको हो । उनीहरुको नाम खुलिसकेको छैन । मृत्यु भएका दुई नेपाली महिलाहरू सोहि होटलमा काम गर्ने भएको बताइएको छ ।

‘होटलको माथिल्लो तलामा सुतेको अबस्थामा दुई जनाको मृत्यु भएको हो । एक जनाको अस्पतालमा उपचार भइरहेको होटल बाहिर सुतेका अर्को एक जना सकुशल छन्’ आगलागीबाट घाइते भएका व्यक्तिलाई उदृत गर्दै नेपाल पत्रकार महासंघ युरोप शाखाका सदस्य ल्हाक्पातेन्जी लामा शेर्पाले जानकारी दिए ।

अग्नि सुरक्षासम्बन्धी अनियमितताका कारण उक्त होटल एक हप्ता अघि नै प्रशासनले बन्द गरेको बताइएको छ । रोमानियाका स्थानीय सञ्चार माध्यम र नेपाली समुदायबाट घटनाको जानकारी प्राप्त भएको र आवश्यक समन्वयका लागि पहल भइरहेको जर्मनीको बर्लिनस्थित नेपाली राजदूतावासले जनाएको छ ।