काठमाडौँ ।  ऊर्जामन्त्री कुलमान घिसिङको नेतृत्वमा नयाँ दल निर्माणको तयारी अन्तिम चरणमा पुगेको छ ।

पार्टीको नाम ‘उज्यालो नेपाल’ र चुनाव चिन्ह बिजुलीको चिम प्रस्ताव गरेर आयोगमा निवेदन दिन लागिएको हो । आगामी चुनावमा भाग लिने गरी नयाँ वैकल्पिक शक्तिको निर्माण गर्न कुलमान जुटेका छन् । पार्टीको संयोजक (अध्यक्ष) मा उनी स्वयं रहने सम्भावना रहे पनि फाइनल भईसकेको छैन् ।

कुलमान निकट स्रोतका अनुसार तत्कालीनरूपमा पार्टीमा संयोजक र केन्द्रीय सदस्यहरू मात्र रहनेछन् । २१ जनाको केन्द्रीय कमिटी राख्ने गरी छलफल भइरहेको छ ।

पार्टी निर्माणमा काठमाडौं महानगरपालिकाका मेयर बालेन्द्र साहको प्रत्यक्ष संलग्नता र दृढ समर्थन रहेको स्रोतको दाबी छ । बालेनको टीमबाट २ जना केन्द्रीय समितिमा रहन सक्ने पनि स्रोतले बतायो। उनीहरू बालेनको पहिलो लेयरका नभएर दोस्रो लेयरका व्यक्तिहरू हुने स्रोतको भनाइ छ ।

यस्तै, राष्ट्रिय स्वतन्त्र पार्टी (रास्वपा) परित्याग गरेकी सुमना श्रेष्ठ पनि कुलमान टीमसँग संवादमा छिन् । यद्यपि, प्रारम्भिक केन्द्रीय कमिटीमा उनी नरहन सक्ने जनाइएको छ । सुमनाले आफ्नो तर्फबाट केही सिफारिस गरेकी छन् ।

जेन-जी आन्दोलनपछि उदाएका सुधन गुरुङ पनि केन्द्रीय कमिटीमा रहने वा नरहने तय भइसकेको छैन । उनको टीमबाट २-३ जनाको नाम सिफारिस भएको बुझिएको छ ।

यसैगरी, चर्चित अभियन्ताहरू सागर ढकाल, सोम शर्मालगायतको नाम केन्द्रीय समितिमा प्रस्ताव गरिएको छ ।  केन्द्रीय कमिटी टुंग्याइनुअघि सबैको सीआरएस (क्रिमिनल रेकर्ड सिस्टम) चेक गर्ने आन्तरिक समझदारी भएको छ ।

‘पछि गएर विवाद नआओस् भनेर सुरूमै सतर्कता अपनाउँदै सीआरएस हेर्ने कुरा भएको छ,’ स्रोतले भन्यो ।

कुनै पनि अपराधिक कार्यमा मुछिएर मुद्दा फर्छ्यौट नभएका वा फरार रहेका अभियुक्तहरूको रेकर्ड प्रहरीको सीआरएसमा हुने गर्छ । हालै मात्र मन्त्रीमा प्रस्तावित खगेन्द्र सुनारको नाम सीआरएसमा पाइएपछि उनको नियुक्ति रोकिएको थियो ।

आजै २१ जनाको नाम फाइनल गरी भोलिसम्म पार्टी दर्ता गर्ने गरी गृहकार्य भइरहेको स्रोतले जनाएको छ ।