काठमाडौं । निर्वतमान सांसद अमरेशकुमार सिंहले राष्ट्रिय स्वतन्त्र पार्टी (रास्वपा) सभापति रवि लामिछानेले अदालतबाट चाँडै न्याय पाउने विश्वास व्यक्त गरेका छन् । नख्खु कारागार पुगेर रविलाई भेटेपछि सञ्चारकर्मीहरूसँग कुरा गर्दै रविलाई न्यायालयले न्याय दिने विश्वास अझै रहेको बताएका छन् ।

उनले भने, ‘नेपालको न्यायालयप्रति विश्वास छ, चाँडै न्याय उहाँले पाउनु हुनेछ । चुनावअघि नै निस्किनु हुन्छ भन्ने आशा छ ।’ उनले तत्कालीन सरकारले रविमाथि प्रतिशोध राखेको समेत दाबी गरेका छन् । उनले आजको रविसँगको भेटमा रास्वपा उपसभापति स्वणिम वाग्ले पनि सहभागी रहेको जानकारी दिए ।

उनले भने, ‘तीन जनाबीच देशको राजनीतिक अवस्था, जेनजी आन्दोलन, जनतामा देखिएको निराशालगायतको विषयमा छलफल भयो । हामी जनतामा जानुपर्छ भन्नेमा हामी सहमत छौँ । जनतामा परिवर्तनको चाहना छ ।’ उनले आफ्नो रास्वपासँग सहकार्यको सम्भावना रहेको भन्दै रविसँग पनि त्यसबारे छलफल भएको बताए । उनले आगामी निर्वाचनमा रास्वपाबाट उम्मेदवार हुनसक्ने सम्भावना समेत उनले बताएका छन् । उनले कुलमान, बालनेसहित नयाँ शक्तिहरू एक ठाउँमा ल्याउनु पर्छ भन्ने संवाद भइरहेको पनि जानकारी दिएका छन्।