काठमाडौं । देशभरका २३ वटा जेनजी समूहहरुले राष्ट्रपति रामचन्द्र पौडेललाई आज ज्ञापनपत्र बुझाउँदै सरकारको कडा आलोचना गरेका छन् । ज्ञापनपत्रमा प्रत्यक्ष जननिर्वाचित प्रधानमन्त्रीको व्यवस्था गर्ने संविधान संशोधनसहित तत्काल गर्नुपर्ने पाँच बुँदे राखिएको छ। जेनजी समूहका प्रतिनिधिहरूले वर्तमान सरकारलाई ‘दिशाहीन’ र विद्रोहका मूल उद्देश्यभन्दा भड्किएको सरकारको रूपमा चित्रण गरेका छन् । ज्ञापनपत्रमा भनिएको छ, ‘यो विद्रोह र शहादत केवल ‘अर्ली इलेक्सन’ का लागि मात्र थिएन । विद्रोहमा संलग्न जेनजीका २३ एलाइन्स, घाइते र शहीद परिवारका माग तत्काल सम्बोधन हुनुपर्छ ।’

उनीहरूले सरकारले माग पूरा नगरेमा राष्ट्रपतिले वर्तमान सरकारलाई फिर्ता बोलाएर नयाँ सरकार गठनमा मध्यस्थता गर्नुपर्ने बताएका छन् । नभए विद्रोही पक्षले शान्तिपूर्ण तर दवावपूर्ण आन्दोलन अघि बढाउने तयारीमा रहेको उनीहरुले चेतावनी दिएका छन् । ज्ञापनपत्र बुझाउने समूहमा जेनजी नेसनल फ्रन्ट लाइनर, जेनजीसी स्पार्क, एन टेक जेनजी, जेनजी वाइ युनाइटेड, रियल जेनजी लगायतका समूहहरू सहभागी छन् । ज्ञापनपत्रमा मुलुकमा भएका ठूला भ्रष्टाचार प्रकरणमा संलग्नलाई कारवाही गर्नुपर्ने, जेनजी आन्दोलनमा नरसंहार गर्ने दोषीलाई दण्ड हुनुपर्ने, जेनजी घाइतेको उपचारको सुनिश्चितता हुनुपर्ने, जेनजी शहीद परिवारको उचित क्षतिपूर्ति र भरणपोषण हुनुपर्ने माग राखेका छन् ।