रुसी राष्ट्रपति भ्लादमिर पुटिन दुई दिने राजकीय भ्रमणका लागि आज भारत आउँदैछन् । सन् २०२२मा युक्रेन युद्ध सुरु भएपछि उनी पहिलो पटक भारत आउन लागेका हुन् । यसअघि सन् २०२१मा उनी भारत आएका थिए ।

पुटिन भारतीय प्रधानमन्त्री नरेन्द्र मोदीको निमन्त्रणामा भारत आउन लागेका हुन् । अपरान्ह ४ बजे भारत आइपुगेपछि उनी प्रधानमन्त्री मोदीले आयोजना गर्ने दिवाभोजमा सहभागी हुनेछन् ।

भारत भ्रमणका क्रममा उनी शुक्रबार रुस-भारत शिखर सम्मेलनमा सहभागी हुनेछन् । यो सम्मेलनमा व्यापार, श्रम र पर्यटनसँग सम्बन्धित विभिन्न सम्झौतामा हस्ताक्षर हुने बताइएको छ । दुई देशबीच रुसी तेलको खरिदको विषयमा पनि छलफल हुनेछ ।

युक्रेन युद्धपछि युरोपेली देशहरूले रुसी खनिज इन्धन खरिद गर्न छोडेपछि भारत एक प्रमुख खरिदकर्ता मुलुक बनेको छ ।

शिखर सम्मेलनअघि दुई देशका रक्षामन्त्रीहरूबीच औपचारिक वार्ता हुनेछ । वार्तामा रुसी लडाकु विमान खरिद लगायतका विषयमा छलफल हुने बताइएको छ ।

भारत भ्रमणका क्रममा पुटिनले महात्मा गान्धीको समाधीस्थलमा गएर श्रद्धान्जली प्रकट गर्नेछन् भने भारतीय राष्ट्रपति द्रौपदी मुर्मुले रात्रीभोज आयोजना गर्नेछिन् ।

यी सबै कार्यक्रमपछि शुक्रबार साँझ उनी रूस फर्किनेछन् ।