काठमाडौं । राष्ट्रिय प्रजातन्त्र पार्टी (राप्रपा) का युवा नेता रवि किरण हमालले भदौ २३–२४ गतेको जेनजी आन्दोलनलाई अपराधीकरण गर्ने प्रयास भए आफूहरु फेरि सडकमा उत्रिने चेतावनी दिएका छन् । आज (मंगलबार) राप्रपाले काठमाडौंमा आयोजना गरेको कार्यक्रममा हमालले मुख्य राजनीतिक दलका नेताहरू जेनजी आन्दोलनलाई अपराधीकरण गर्न लागे राप्रपाले आन्दोलनको स्वामित्व लिने बताएका हुन् ।

‘जेनजी आन्दोलनपछि देशले नयाँ संविधान प्राप्त गर्छ भन्ने आशा थियो । अहिले त्यो विद्रोहलाई अपराधीकरण गर्ने दिशातर्फ मुख्य राजनीतिक दल गएको बेला राप्रपाले स्वामित्व लिन्छ । जेनजी पुस्ताको भावना बोक्ने पार्टी राप्रपा छ,’ हमालले भने । हमालले राजासहितको नयाँ समझदारी गर्नु जेनजी आन्दोलनको म्यान्डेट रहेको दाबी गरे । ‘जेनजी विद्रोहलाई दमन गर्नेहरूले टाउको उठाए त्यसका विरुद्ध हामी उभिन्छौं । सुशीला कार्की र ओमप्रकाश अर्यालहरूले हाम्रो सामु घुँडा टेक्नु पर्छ । हामी फेरि सडक संघर्षमा जान तयार छौं,’ हमालले भने ।