काठमाडौं । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले वर्तमान संविधान व्यवहारिक रूपमा निष्क्रिय भइसकेको दाबी गर्दै देशलाई थप दुर्घटनातर्फ धकेल्ने गरी जबरजस्ती ब्युँताउने प्रयास नगर्न चेतावनी दिएका छन् । राजनीतिक, सामाजिक र पुस्तागत रूपमा मुलुक गम्भीर सङ्कटमा रहेको उल्लेख गर्दै उनले अब नयाँ राष्ट्रिय सहमतिको खाँचो रहेको बताए ।
काठमाडौंमा आयोजित नेकपा एमालेको ११ औँ महाधिवेशनको उद्घाटन समारोहलाई सम्बोधन गर्दै लिङ्देनले संविधानलाई लिएर समाजमा गहिरो मतभेद रहेको बताए । उनका अनुसार कसैले यही संविधानबिना देश चल्दैन भन्ने धारणा राखिरहेका छन् भने कसैले यसलाई अपूर्ण र असफल ठानिरहेका छन् । संविधानलाई धर्मग्रन्थजस्तो अपरिवर्तनीय ठान्नु गलत भएको उल्लेख गर्दै उनले समयअनुसार परिवर्तन आवश्यक हुने तर्क गरे ।
‘हामीले सधैँ भनिरहेका छौँ, संविधान गीता, बाइबल वा पुराण होइन। यसलाई आवश्यक परे परिवर्तन गर्नुपर्छ’, लिङ्देनले भने, ‘आजको अवस्थामा संविधान जिवित छैन, मरेको जस्तै भइसकेको छ । यस्तो अवस्थामा जबरजस्ती ब्युँताएर देशलाई थप दुर्घटनामा लैजानुभन्दा नयाँ समझदारी गर्नु बुद्धिमानी हुन्छ ।’ उनले अब देशको भविष्य जोगाउन राजा, राजनीतिक दलहरू र नयाँ पुस्ता अर्थात् जेन–जीबीच नयाँ सहकार्य र समझदारी आवश्यक रहेको धारणा राखे। परम्परागत शक्ति, राजनीतिक नेतृत्व र नवयुवालाई एकै ठाउँमा उभ्याएर राष्ट्रिय एकताको आधार तयार गर्न नसके मुलुक झन् जटिल संकटमा फस्ने उनको चेतावनी थियो ।
लिङ्देनले विगतका राजनीतिक परिवर्तनबाट प्राप्त तीन महत्वपूर्ण उपलब्धिलाई जोगाउँदै अघि बढ्नुपर्नेमा जोड दिए । उनले २००७ सालको प्रजातन्त्र, २०४६ सालको बहुदलीय व्यवस्था र २०६२÷०६३ को आन्दोलनबाट स्थापित समावेशीता र समानुपातिकताको उपलब्धिलाई राष्ट्रिय सम्पत्तिको रूपमा संरक्षण गर्नुपर्ने बताए । ‘यी उपलब्धि बचाएर मात्र अब नयाँ राष्ट्रिय सहमति सम्भव छ’, उनले स्पष्ट पारे । देश बचाउने र देश बनाउने अभियानमा सबै राजनीतिक शक्ति एक ठाउँमा उभिनुपर्ने समय आएको उल्लेख गर्दै उनले दलगत स्वार्थभन्दा माथि उठेर सोच्न आग्रह गरे । कार्यक्रममा उनले एमालेको महाधिवेशन उद्घाटन समारोह भव्य र व्यवस्थित रहेको भन्दै प्रशंसा पनि व्यक्त गरे । लिङ्देनको अभिव्यक्तिले वर्तमान राजनीतिक संरचना र संविधानबारे पुनर्विचारको बहसलाई थप चर्काउने संकेत गरेको विश्लेषण गरिएको छ ।
