काठमाडौँ, ४ पुस : राष्ट्रियसभाका उपाध्यक्ष विमला घिमिरेले राष्ट्रियसभाले संवैधानिक आयोगहरूबाट प्राप्त वार्षिक प्रतिवेदनहरूलाई सभाको बिजनेस बनाउनुपर्नेमा जोड दिनुभएको छ । सङ्घीय संसद् सचिवालयले आज यहाँ आयोजना गरेको राष्ट्रियसभाको १८औँ अधिवेशनको कार्यसम्पादन समीक्षा कार्यक्रमलाई सम्बोधन गर्दै संवैधानिक आयोगले कस्ता कार्य गरेका छन् ? भनेर सुसूचित गराउनका लागि पनि प्रतिवेदनहरू सभाको बिजनेस बनाइनुपर्नेमा जोड दिनुभएको हो ।

“हाम्रो संवैधानिक व्यवस्थाअनुसार गठन भएका आयोगका बारेमा जानकारी प्राप्त होस्”, उहाँले भन्नुभयो, “हामीले यी प्रतिवेदन माथि छलफल नगर्दा संविधानमा व्यवस्था गरी गठन गरिएका आयोगले जनहितमा केके काम गरे भनेर जनता सुसूचित हुनबाट वञ्चित भएका छन् ।”

उपाध्यक्ष घिमिरेले संसदीय अभ्यासलाई जनताका बीचमा प्रष्ट्याउन नसक्नु तथा संसद्मा सांसदहरूले आफ्नो विचार राख्दा आफूले गरेका कामका विषयमा भन्दा एकअर्काप्रति कटाक्ष गर्नमा बढी समय बिताएका कारण पनि जनतामा गुनासो पक्कै बढेको स्वीकार गर्नुभयो ।