काठमाडौँ । राष्ट्रिय स्वतन्त्र पार्टी (रास्वपा) ले पार्टी संरचना विस्तार गर्दै चार पदाधिकारी थप्ने निर्णय गरेको छ । वनस्थलीस्थित केन्द्रीय कार्यालयमा बसेको केन्द्रीय समिति बैठकले उपसभापति, महामन्त्री, सहमहामन्त्री र सहप्रवक्ता पद थप्ने निर्णय गरेको हो ।काठमाडौँ महानगरपालिकाका मेयर बालेन्द्र शाह (बालेन) र कुलमान घिसिङ नेतृत्वको ‘उज्यालो नेपाल’ सँग एकताको सहमतिपछि पदीय समायोजन आवश्यक परेकाले पदाधिकारी संख्या बढाइएको पार्टीले जनाएको छ । यस निर्णयसँगै रास्वपामा अब पदाधिकारी संख्या कम्तीमा १४ पुगेको छ ।

यसअघि रास्वपामा सभापति, दुई उपसभापति, एक महामन्त्री, तीन सहमहामन्त्री, एक कोषाध्यक्ष र दुई सहप्रवक्ता गरी १० पदाधिकारी थिए । नयाँ निर्णयअनुसार अब एक उपसभापति, एक महामन्त्री, एक सहमहामन्त्री र एक सहप्रवक्ता थपिनेछ ।

बैठकपछि कुलमान घिसिङ उपसभापतिमा मनोनीत भइसकेका छन् भने बाँकी पदका लागि आन्तरिक छलफल जारी छ । विशेष गरी महामन्त्री पदलाई लिएर बालेनको टिम र उज्यालो नेपालबीच दाबी देखिएको छ । स्रोतका अनुसार कुलमानसँग एकता हुनुअघि नै बालेनको टिमलाई महामन्त्री दिने अनौपचारिक समझदारी भएको थियो । तर, उज्यालो नेपालले पनि उक्त पदमा दाबी गरेपछि सहमति टुंगिन सकेको छैन ।

पार्टीभित्रको छलफलअनुसार महामन्त्री बालेनकै टिमबाट हुने सम्भावना बलियो देखिएको छ । सभापति रवि लामिछानेले उज्यालो नेपाललाई एक उपसभापति, एक सहमहामन्त्री र एक सहप्रवक्ता दिने प्रस्ताव अघि सारेको बताइन्छ । यदि उज्यालो नेपालको भागमा महामन्त्री परे जितराम लामाको नाम चर्चामा रहेको छ ।

रास्वपामा सभापतिपछिको सबैभन्दा प्रभावशाली पद महामन्त्री मानिन्छ । पार्टी संगठन परिचालन र दैनिक व्यवस्थापनमा महामन्त्रीको भूमिका केन्द्रीय हुने गर्छ । डा. मुकुल ढकाल निष्काशित भएपछि कविन्द्र बुर्लाकोटी एकल महामन्त्रीका रूपमा कार्यरत छन्। अब भने पदाधिकारी विस्तारसँगै उनले आफ्नो जिम्मेवारी र अधिकार अर्को महामन्त्रीसँग बाँड्नु पर्ने अवस्था बनेको छ । पदाधिकारी बाँडफाँटको अन्तिम टुंगो भने आगामी छलफलपछि मात्रै लाग्ने पार्टी स्रोतले जनाएको छ ।