काठमाडौं । भक्तपुर क्षेत्र नम्बर–२ मा आगामी निर्वाचनका लागि राजनीतिक प्रतिष्पर्धा रोचक रुपमा चर्किने संकेत देखिएको छ । राष्ट्रिय स्वतन्त्र पार्टी (रास्वपा) ले यस क्षेत्रमा पूर्व पत्रकार राजीव खत्रीलाई उम्मेदवार बनाउने लगभग निश्चित भएको छ । रास्वपाका एक नेताका अनुसार पार्टी नेतृत्वले खत्रीलाई नै भक्तपुर–२ बाट अघि सार्ने तयारी अन्तिम चरणमा पुर्‍याएको हो ।

यस क्षेत्रमा नेकपा एमालेका सचिव तथा प्रभावशाली नेता महेश बस्नेत उम्मेदवार भइसकेका छन् । बस्नेत र खत्रीबीचको प्रतिष्पर्धालाई लिएर अहिले नै राजनीतिक वृत्तमा चासो बढ्न थालेको छ । दुवै जनाबीच विगतदेखि नै सामाजिक सञ्जालमार्फत आरोप–प्रत्यारोप र वाकयुद्ध चल्दै आएको हुँदा चुनावी भिडन्त अझै रोचक हुने अनुमान गरिएको छ ।

राजीव खत्री केही समयअघि मात्र रास्वपामा आबद्ध भएका हुन् । सञ्चार क्षेत्रबाट राजनीतिमा प्रवेश गरेका खत्रीले सुरुवातमा काठमाडौं क्षेत्र नम्बर–१० बाट उम्मेदवारी दिने इच्छा व्यक्त गरेका थिए । तर पार्टी सभापति रवि लामिछाने तथा काठमाडौं महानगरपालिकाका मेयर बालेन्द्र साहसँगको छलफलपछि उनलाई भक्तपुर–२ बाट उम्मेदवार बनाउने निर्णय भएको स्रोतको दाबी छ ।

महेश बस्नेतले पछिल्लो समय काठमाडौं महानगरका मेयर बालेन शाहविरुद्ध कडा आलोचना गर्दै आएका छन् । जेन–जी आन्दोलनपछिका अभिव्यक्ति र गतिविधिले बस्नेत थप चर्चामा आएका छन् । यही पृष्ठभूमिमा बालेन शाहको राजनीतिक प्रभाव र समर्थनलाई ध्यानमा राख्दै रास्वपाले खत्रीलाई भक्तपुर–२ मा अघि सारेको विश्लेषण पनि भइरहेको छ ।

भक्तपुर–२ महेश बस्नेतको परम्परागत निर्वाचन क्षेत्र मानिन्छ । यद्यपि, उनी अघिल्लो आमनिर्वाचनमा पराजित भइसकेका थिए । अर्कोतर्फ, खत्री यसपटक पहिलोपटक प्रत्यक्ष चुनावी मैदानमा उत्रिन लागेका हुन् । उनी काठमाडौं क्षेत्र नम्बर १० का बासिन्दा भए पनि पार्टी रणनीतिअनुसार भक्तपुरमा उम्मेदवारी दिन लागेका छन् ।

यसैबीच, रास्वपाले काठमाडौं क्षेत्र नम्बर १० मा भने प्रदीप विष्टलाई उम्मेदवार बनाउने निर्णय गरिसकेको छ । विष्ट यसअघि पनि सोही क्षेत्रबाट रास्वपाको तर्फबाट उम्मेदवार भइसकेका थिए । पुराना र स्थापित नेताविरुद्ध नयाँ अनुहार र वैकल्पिक राजनीतिक धार बोकेको उम्मेदवारको भिडन्तका रूपमा भक्तपुर–२ को चुनावलाई हेरिँदैछ । सामाजिक सञ्जालदेखि चुनावी मैदानसम्म दुवै पक्षबीचको प्रतिष्पर्धाले यो क्षेत्रको चुनावलाई विशेष महत्वको बनाउने देखिएको छ ।