काठमाडौं । गत ८ फेब्रुअरीमा इंग्ल्याण्डसँग ४ रनले पराजित भएपछी नेपालले विश्व क्रिकेटको ध्यान तान्न सफल भएको थियो।  तर ४ दिन नबित्दै नेपालले पाएको उक्त चर्चा आज इटालीले नेपालबाट खोसेर लिएको छ। 

विश्वकपको प्रारम्भिक चरणमै नेपालमाथि सनसनीपूर्ण जित निकाल्दै इटाली अहिले विश्व क्रिकेटको मुख्य चर्चाको केन्द्र बनिरहेको छ । समूह चरणको खेलमा इटालीले नेपाललाई जम्मा १२ दशमलव ४ ओभरमै १ सय २४ रनको लक्ष्य पछ्याएर नयाँ किर्तीमानी बनायो ।

इटालीले गत जुलाईमा पहिलोपटक टी-२० विश्वकपको क्वालिफायर खेलेको हो। अनुभवी स्कटल्याण्डविरुद्ध अप्रत्याशित जित निकाल्दै उसले आफ्नो विश्वकप यात्रा सुनिश्चित गर्यो। त्यही स्कटल्याण्डसंग इटालीले ९ फेब्रुअरीमा विश्वकप डेब्यू गरेको थियो। तर क्वालिफायरमा पराजित भएको स्कटल्याण्डले विश्वकपमा भने इटालीलाई हराउँदै बदला लियो। ९ फेब्रुअरीमा ७३ रनको विशाल हार बेहोरेको इटालीले ३ दिनमै त्यसको बदला लिदै नेपाललाई १० विकेटले पराजित गर्यो। 

१९९५ मा इन्टरनेसनल क्रिकेट काउन्सिल (ICC) बाट एसोसियट मान्यता पाएको इटालीले विश्वकप खेल्न ३१ वर्ष पर्खनु परेको थियो। क्रिकेटमा धेरै पछि प्रवेश गरे पनि इटालीले पछिल्ला वर्षमा निरन्तर प्रगति देखाउँदै आएको छ। २०१९ मा जर्मनीविरुद्ध पहिलो टी-२० अन्तर्राष्ट्रिय खेल खेलेको इटालीले त्यसको केही वर्षमै विश्वकपमा जित निकाल्नु उसको प्रगतिको परिणाम हो। 

इटालीको आजको सफलताको प्रमुख आधार बहुराष्ट्रिय पृष्ठभूमिबाट आएका खेलाडीहरूको प्रभावशाली उपस्थिति हो । इटालीएन टोलीमा टेस्ट मुलुकहरूमा खेलेका अनुभवी खेलाडीहरू छन्, जसले इटालीलाई अन्य एसोसियट टिमभन्दा बलियो बनाएको छ। 

जेजे स्मुट्स इटालीका सबैभन्दा अनुभवी खेलाडी हुन्, जसले २०११ मा रोयल च्यालेञ्जर्स बेङ्ग्लारुविरुद्ध च्याम्पियन्स लिग खेलेका थिए। उनीसँग पाकिस्तान तथा इंग्ल्याण्डविरुद्ध एकदिवसीय क्रिकेट खेलेको अनुभव पनि छ।

विकेटकिपर मार्कस क्याम्पोपियानो बेलायती मूलका भए पनि अहिले इटालीका प्रमुख खेलाडी हुन्। त्यस्तै अष्ट्रेलियामा जन्मेका ग्रान्ट स्टेवार्टले इटालीको लागि अलराउन्डरको भूमिका निर्वाह गर्छन् । अर्का विकेटकिपर जियान मेएडे दक्षिण अफ्रिकाका घरेलु लिगहरूका चर्चित नाम हुन्। इण्डियामा हुर्केका जसप्रित सिंहले रणजी ट्रफीदेखि विजय हजारे ट्रफीसम्म खेलिसकेका छन्, भने अली हसन र जाईन अली दुवै पाकिस्तानबाट आएका दक्ष खेलाडीहरू हुन्।

विदेशी पृष्ठभूमि र अनुभवको बलमा इटालीले नेपालमाथि जित निकाल्दै क्रिकेट इतिहासमा एक नयाँ अध्यायको सुरुवात गरेको छ । यो जितले इटालीलाई केवल समूह चरणमा मात्र होइन, एसोसियट क्रिकेटमा पनि एउटा बलियो टिमका रूपमा पनि चिनाएको छ।

आइसीसीको टी-२० अन्तराष्ट्रिय रैंकिंगमा इटाली २६ नम्बरमा छ।