दमक । नेकपा एमालेका अध्यक्ष केपी शर्मा ओलीले आफूलाई सरकारबाट हटाउने बित्तिकै देश ड्राइभरबिनाको बसजस्तै हुने गरेको बताएका छन् । दमकमा नेशनल भोलेन्टियर्स फोर्स कोशी युनिफाइड कमान्ड घोषणा कार्यक्रममा ओलीले यस्तो बताएका हुन् ।

‘मलाई सरकारबाट हटाउने बित्तिकै देश ड्राइभरबिनाको गाडीजस्तै हुन्छ’ उनले भने ।

कार्यक्रममा ओलीले एमालेले राम्रो काम गर्ने भएकाले सरकार ढाल्ने गरेको आरोप लगाए । ‘एमालेले रंगशाला बनाउँछ, फलामखानी पत्ता लगाउन खोज्छ, सडक बनाउँछ, मिथेन ग्याँस पत्ता लगाउँछ,’ उनले भने,’ त्यही काम गरेको कारण एमालेको सरकार ढालिन्छ।’

अधिकांश समय एमालेको प्रशंसामा खर्चेका ओलीले दमकको विकासको जिम्मा आफूले लिने बताए । ‘ यहाँको हरेक किसिमको विकासको जिम्मा मैले लिन्छु, यहाँ मात्रै देशैभरी एमालेले विकास गरेको छ,’ ओलीले सम्बोधनका क्रममा भने, ‘ फेरि पनि देशको विकास, शान्ति र सुव्यवस्थाको लागि एमालेको जित अनिवार्य छ।’