काठमाडौँ। गृहमन्त्री ओमप्रकाश अर्यालले स्वच्छ, निष्पक्ष र भयरहित वातावरणमा निर्वाचन हुने बताएका छन् ।

आसन्न प्रतिनिधिसभा सदस्य निर्वाचनको सुरक्षा अवस्था र समग्र शान्ति व्यवस्थाको निरीक्षण तथा अनुगमनका लागि शुक्रबार ओखलढुंगा पुगेका मन्त्री अर्यालले शान्ति–सुरक्षाको व्यवस्था सुदृढ रहेकाले सबैलाई ढुक्क भएर मतदान गर्न आग्रह गरे । उनले भने, ‘अन्य जिल्लाको तुलनामा ओखलढुंगा शान्त छ । कानूनविपरीत गतिविधिमा उन्मुक्ति दिइनेछैन । सबैलाई सुरक्षाको पूर्ण अनुभूति दिलाइनेछ ।’

मन्त्री अर्यालले गैरकानूनी गतिविधि गर्नेलाई कानूनको दायरामा ल्याई कडा कारबाही गरिने प्रतिबद्धता जनाए । साथै उनले निष्पक्ष र मर्यादित रूपमा निर्वाचन सम्पन्न गर्न सबै पक्ष जिम्मेवार हुनुपर्नेमा जोड दिए ।

उनले दैनिक घटनाको विश्लेषण गरी धार्मिक तथा सामाजिक सद्भाव कायम राख्न र उम्मेदवारको व्यक्तिगत सुरक्षामा विशेष ध्यान दिन निर्देशन दिए ।

गृहमन्त्रीसहितको उच्चस्तरीय टोलीले जिल्ला सुरक्षा समिति, जिल्लास्थित प्रमुख राजनीतिक दल, प्रमुख निर्वाचन अधिकृतलगायत सरोकारवालासँग अन्तरक्रिया गरेको थियो ।

कार्यवाहक प्रमुख निर्वाचन आयुक्त रामप्रसाद घण्डारीले ओखलढुंगामा कुनै खास समस्या नरहेको उल्लेख गर्दै निर्वाचन स्वच्छ र निष्पक्ष हुने विश्वास व्यक्त गरे । उनले निर्वाचन आचारसंहिता उल्लंघन गर्नेलाई कानूनी दायरामा ल्याउनुपर्नेमा जोड दिए ।

ओखलढुंगाका प्रमुख जिल्ला अधिकारी मेखबहादुर मंग्रान्तिले निर्वाचनको तयारी तथा जिल्लाको समग्र शान्ति–सुरक्षाबारे जानकारी गराए । उनले जिल्लामा स्रोत–साधन र सुरक्षा टोलीको परिचालनबारे पनि अवगत गराए ।

मुख्य निर्वाचन अधिकृत हरिप्रसाद कोइरालाले कर्मचारी व्यवस्थापन चुस्त र दुरुस्त रहेको तथा राजनीतिक दलहरूसँग प्रभावकारी समन्वय भइरहेको बताए । उनले सुरक्षा निकायबाट दैनिक ब्रिफिङ लिई सोही अनुरूप परिचालन गरिएको जानकारी दिए ।

अनुगमनमा गृहमन्त्री अर्याल, कार्यवाहक प्रमुख निर्वाचन आयुक्त घण्डारी, सशस्त्र प्रहरी महानिरीक्षक राजु अर्याल, नेपाली सेनाका बलाधिकृत रथी प्रदीपजंग केसी, एआईजी गणेश ठाडा मगर, गृहमन्त्रालयका प्रवक्ता आनन्द काफ्ले, सह–प्रवक्ता रमा आचार्य, डिआइजी विष्णु भट्ट, प्रमुख निर्वाचन अधिकृत रामप्रसाद न्यौपाने, दोलखाका प्रमुख जिल्ला अधिकारी हरिप्रसाद घिमिरेलगायत सहभागी थिए ।

मन्त्री अर्याल नेतृत्वको टोलीले दोलखाको बैदेश्वर गाउँपालिकास्थित मतदान स्थलको स्थलगत निरीक्षण तथा अनुगमन गरेपछि ओखलढुंगा पुगेर छलफल गरेको थियो । हाल मोरङका विभिन्न क्षेत्रमा पनि अनुगमन र अन्तरक्रिया भइरहेको गृहमन्त्रालयका सह–प्रवक्ता आचार्यले जानकारी दिए ।