काठमाडौं। निर्वाचन आयोगले विदेशमा रहेका नेपाली नागरिकलाई मतदानमा सहभागी गराउने विषयमा सरोकारवाला तथा जानकारसँग छलफल अघि बढाएको छ।

आयोगका प्रवक्ता नारायणप्रसाद भट्टराईका अनुसार विदेशमा रहेका नेपालीको संख्या, उनीहरूलाई मतदाता नामावलीमा समेट्ने प्रक्रिया, मतदानको सम्भावित विधि तथा निर्वाचनमा नेपाली कूटनीतिक नियोगको भूमिकाबारे अध्ययन भइरहेको छ।

आयोगले विदेशमा रहेका नेपालीको यकिन विवरण संकलन, मतदान केन्द्रको व्यवस्था, मतदानपछि मतपत्र व्यवस्थापनलगायत प्राविधिक तथा प्रशासनिक पक्षबारे समेत छलफल गरिरहेको छ।

त्यस्तै, अध्ययनका क्रममा विभिन्न विकल्पबारे आयोगले छलफल अघि बढाएको छ। दूतावास तथा कन्सुलेटमा मतदान केन्द्र स्थापना गर्ने, हुलाकमार्फत मतदान गराउने, प्रतिनिधिमार्फत मतदानको व्यवस्था गर्ने तथा विद्युतीय वा मिश्रित मतदान प्रणाली अपनाउने विकल्पमाथि अध्ययन भइरहेको आयोगले जनाएको छ।

साथै, यस विषयमा आयोगले परराष्ट्र मन्त्रालयको सहजीकरणमा विभिन्न मुलुकस्थित नेपाली राजदूतावास तथा कूटनीतिक नियोगका प्रमुखसँग समेत छलफल गरेको छ।

विदेशमा रहेका नेपालीलाई मतदानको अवसर दिन आवश्यक पर्ने कानुनी तथा नीतिगत व्यवस्थाका विषयमा पनि आयोगले अध्ययन गरिरहेको छ।

आयोगले सम्भावित मतदान प्रणाली, त्यसका लागि आवश्यक पूर्वाधार तथा प्रशासनिक व्यवस्थाको अध्ययनपछि उपयुक्त विकल्पबारे थप प्रक्रिया अघि बढाउने जनाएको छ।