काठमाडौं । चुनावी सरकारकी प्रधानमन्त्री सुशीला कार्की शुक्रबारदेखि औपचारिक रूपमा पदबाट बिदा भएकी छन् ।

उनी २७ भदौमा चुनाव गर्नेरी प्रधानमन्त्री नियुक्त भएकी थिइन् । राष्ट्रपतिको अवशिष्ट अधिकारअन्तर्गत प्रधानमन्त्री नियुक्त उनले यही २१ फागुनमा निर्वाचन गर्न सफल भइन् । उनको सरकारले गरेको निर्वाचनबाट नवनियुक्त प्रधानमन्त्री बालेन्द्र शाह ‘बालेन’ वरिष्ठ नेता भएको दल रास्वपाले दुई तिहाई नजिकको बहुमत प्राप्त गर्‍यो ।

शान्तिपूर्ण निर्वाचन गर्न सफल भएकी कार्कीकै पालामा सुशासन मार्गचित्र तयार भएको छ । जेन–जी विद्रोहमा भएको घटनाको जाँचबुझ आयोग गर्न गठित गौरीबहादुर कार्की आयोगको प्रतिवेदन ग्रहण गरिन् तर सार्वजनिक गरिनन् ।

तर, मिडियाबाट प्रतिवेदन सार्वजनिक भयो, जुन पक्षपातपूूर्ण भएको भन्दै कांग्रेस, एमाले, बार एसोसिएसन, संविधानका जानकारहरू, पत्रकार महासंघलगायत बहुपक्षीय निकायहरूले गम्भीर असहमति प्रकट गरेका छन् ।

यसबीच कार्कीले प्रतिवेदन सार्वजनिक गर्ने निर्णय हालै गरेकी थिइन् । तर, सार्वजनिक नगरी उनको बिदाइ भएको छ । उनी शुक्रबार बालेनले प्रधानमन्त्रीका रुपमा शपथ ग्रहण गर्दा सँगै देखिइन् ।