काठमाडाैं। नेपाली कांग्रेसका निवर्तमान कार्यवाहक सभापति पूर्णबहादुर खड्काले पार्टीले मागेको स्पष्टीकरणको जवाफ नदिने भएका छन्।

बुधबार पार्टी केन्द्रीय कार्यालय सानेपामा बसेको अनुशासन समितिको बैठकले खड्कालाई सात दिनभित्र स्पष्टीकरण दिन निर्देशन गर्ने निर्णय गरेको थियो।

पार्टी सभापति गगन थापाले क्रियाशील सदस्यता खारेज भएको घोषणा गर्दै सबैलाई वडा-वडामा पुगेर सदस्यता अद्यावधिक गर्न निर्देशन दिएपछि खड्का त्यस निर्णयको विपक्षमा उभिएका थिए। त्यसपछि गत चैत ३० गते कार्यवाहक सभापतिको हैसियतमा उनले विज्ञप्ति जारी गरेपछि कांग्रेसले उनीविरुद्ध कारबाही प्रक्रिया अघि बढाएको हो।

यसअघि चैत १४ गते पनि खड्काले पूर्वप्रधानमन्त्री तथा नेकपा (एमाले) अध्यक्ष केपी शर्मा ओली र पूर्वगृहमन्त्री तथा कांग्रेस नेता रमेश लेखकको पक्राउको विरोधमा कार्यवाहक सभापतिकै हैसियतमा विज्ञप्ति जारी गरेका थिए।