काठमाडौं । नेपाली कांग्रेसका प्रतिनिधिसभा सदस्य भीष्मराज आङ्देम्बेले प्रधानमन्त्री बालेन्द्र शाह (बालेन)ले बोलाएको बैठकमा समानुपातिक सांसदहरूलाई ‘क्लस्टरवाइज’ रूपमा बोल्न भनिएकोप्रति गम्भीर आपत्ति जनाएका छन् ।

उनले संविधानप्रदत्त मिश्रित निर्वाचन प्रणालीको सम्मान गर्न प्रधानमन्त्री बालेनलाई सचेत पनि गराए ।

सबै सांसद राष्ट्रका प्रतिनिधि भएकाले उनीहरूको भूमिका कुनै एक ‘क्लस्टर’मा सीमित गर्न नहुने भन्दै उनले बैठकमा भने, ‘खस–आर्यले खस आर्यको मात्रै, दलितले दलितको मात्रै कुरा गर्ने हुन्छ ? त्यो गलतै हो । तपाईंले संविधानप्रदत्त मिश्रित निर्वाचन प्रणालीको सम्मान गर्नुपर्छ ।’

उनले प्रधानमन्त्री बालेनलाई अहिले संविधान संशोधन गर्ने बेला भएकाले सांसदको व्यक्तिगत विचार लिने भन्दा पनि निर्वाचनको बेला प्रतिबद्धतापत्रमा उल्लिखित पार्टीहरूले औँल्याएका संशोधनसम्बन्धी विषयहरूलाई समेट्न सुझाए ।

निर्वाचन प्रणालीमा संशोधन के कसरी गर्ने भन्नेबारे थप जानकारी संवैधानिक आयोगहरू आदिवासी जनजाति आयोग, राष्ट्रिय दलित आयोग, राष्ट्रिय महिला आयोगजस्ता आयोगबाट लिन सांसद आङ्देम्बेले आग्रह गरे ।

तर, संविधान संशोधन संवेदनशील विषय भन्दै हतारमा गर्न नहुने उनको भनाइ छ । ‘थप मसिनो गरी छलफल र बहस गरी टुंगोमा पुग्नुपर्छ । एउटा व्यक्तिले निर्णय गरेर हतारमा संशोधन गर्नु हुँदैन । व्यापक छलफल र बहस गरिकन संविधान संशोधन गर्ने सन्दर्भमा निचोडमा पुग्नुपर्छ,’ आङ्देम्बेले बैठकमा भने ।

बैठकमा सहभागी एमालेसहित अन्य दलका समानुपातिक सांसदहरूले पनि आङ्देम्बेले जस्तै ‘क्लस्टरवाइज’ कुरा राख्न प्रधानमन्त्री बालेनले राखेको आग्रहको प्रतिवाद गरेका थिए ।