काठमाडौं । प्रधानमन्त्री बालेन्द्र शाह (बालेन)सँग कांग्रेस सांसद भीष्मराज आङ्देम्बेले गृह जिल्ला पाँचथरको विकासका लागि आगामी आर्थिक वर्ष २०८३/०८४ का विभिन्न योजनामा बजेट विनियोजन गर्न माग गरेका छन्।

उनले पाँचथरको काउले, चरीभञ्याङ, वारेबुङ र ओयाम स्कुल जोड्ने सडक कालोपत्रे गर्ने योजनालाई आगामी बजेटमा समावेश गर्न माग गरेका छन्। उक्त आयोजना फालेलुङ र याङवरक गाउँपालिका क्षेत्रसँग सम्बन्धित रहेको उल्लेख छ।

त्यसैगरी, छ नं बुधबारे, दुर्दिम्बा, सोमबारे, टोखा हुँदै नावाखोला र तमोर करिडोर जोड्ने सडक (सोमबारे खण्ड) स्तरोन्नति तथा कालोपत्रे गर्नुपर्ने आवश्यकता औंल्याइएको छ। यो योजना मिक्लाजुङ–८ र तुम्बेवा-२ क्षेत्रमा पर्ने जनाइएको छ।

नवमीडाँडा, लुङचक्रो, सिस्नेरी हुँदै मेहेलबोटे सडक स्तरोन्नति तथा कालोपत्रे गर्ने अर्को योजना पनि आगामी आर्थिक वर्षको विकास कार्यक्रममा समावेश गर्न उनले सरकारसँग अनुरोध गरेका छन्।

सांसद आङदेम्बेले यी सबै योजनाहरू पाँचथरको दुर्गम क्षेत्रलाई सडक सञ्जालसँग जोड्ने दृष्टिले अत्यन्त महत्वपूर्ण रहेको उल्लेख गर्दै समयमै बजेट विनियोजन गरी कार्यान्वयन गर्नुपर्ने आवश्यकता औंल्याएका छन्।