काठमाडौं। कुनैबेला राष्ट्रिय प्रजातन्त्र पार्टी (राप्रपा) का सांसद ज्ञानेन्द्र बहादुर शाहीले भनेको एउटा भाषण सामाजिक सञ्जालमा अत्यधिक भाइरल थियो । जहाँ उनले भनेका थिए, ‘कहाँ छौ कांग्रेसका गगन कुमार थापा उर्फ ‘गगने’, कहाँ हुनुहुन्छ तपाइँ, उठ्नुहोस्, जाग्नुस्।’ उनले यो अरू नै सन्दर्भमा  भनेपनि अहिले कांग्रेस सभापति गगन कुमार थापा यस्तै निष्क्रिय देखिएका छन्।

चुनावअघि थापा आफ्नो फेसबुक पेजमार्फत लगभग दैनिकजसो सक्रिय देखिन्थे। विभिन्न समसामयिक विषयमा धारणा राख्दै उनले जनताको ध्यान तान्ने र समर्थन बढाउने प्रयास गरिरहेका हुन्थे।

विशेष महाधिवेशनबाट सभापति पदमा चयन भएपछि उनीभित्र प्रधानमन्त्री बन्ने आकांक्षा अझ स्पष्ट रूपमा देखिन थालेको थियो। संसदमा प्रवेश गरेर बहुमत जुटाउने र सिंहदरबार पुगेर सरकारको नेतृत्व गर्ने उनको राजनीतिक ध्येय थियाे। उनी कांग्रेसलाई ठूलो दल बनाउँदै सत्ता नेतृत्वमा पुग्ने रणनीतिमा थिए।

तर निर्वाचनको परिणाम गगनले साेचेभन्दा निकै फरक आइदियाे। सर्लाही-४ मा अमरेश कुमार सिंहसँग पराजित भएपछि उनकाे संसद हुँदै प्रधानमन्त्री बन्ने सपना सपनामै सीमित बन्याे।

त्यसपछि केही समय उनी अलमलमा परेको जस्तो देखिए। पार्टी सभापतिको भूमिकामा रहने वा नैतिकताको आधारमा राजीनामा दिने भन्ने विषयमा समेत चर्चा चल्यो।

त्यही अलमलका बीच उनले सभापति पदबाट राजीनामा समेत दिए।  तर केन्द्रीय कार्यसम्पादन समितिको बैठाले उनको राजीनामा अस्वीकृत गर्यो। 

चुनावपछि फेसबुकमा उनी निकै कम सक्रिय देखिए।  कहिलेकाही आक्कलझुक्कल पार्टीका औपचारिक बैठकमा बाहेक थापा आँट कही देखिँदैनन्।  बरु केही दिन अगाडि उनको जिम गर्दै गरेको भिडियो भने देखिएको थियो। 

चुनावपछि सामाजिक संजालमा केही  अभिव्यक्तिहरू मात्रै सार्वजनिक भए । एक पटक अमरेश सिंहलाई बधाई, अर्को पटक केपी शर्मा ओलीप्रति पितृ शोकमा समवेदना, र एउटा अवसरमा सामान्य शुभकामना सन्देश, यी बाहेक अरू राजनीतिक धारणा गगनले सार्वजनिक गरेका छैनन् ।

पार्टी बैठकमा सानेपा पुग्ने गरेपनि उनी अचेल पत्रकारहरुसँग कुरा गर्न चाहदैनन्।  यसबाट उनी चुनावी हारपछि मनोवैज्ञानिक दबाबमा रहेको अनुमान पनि गर्न सकिन्छ।

चुनावपछि उनको भूमिका के हुन्छ भन्नेबारे राजनीतिक वृत्तमा विभिन्न अड्कलबाजीहरू चलिरहे। कतिपयले तत्काल नेतृत्व छोड्छन् भनिरहेका थिए भने कतिले केही समयपछि पुनः सक्रिय हुने धारणा व्यक्त गरे।

त्यसपछी उनको राजिनामा अस्वीकृत भएको खबर सार्वजनिक भयो । राजिनामा दुईधारको जमात खडा भयो।  गगनको यस कदमलाई एक जमातले राजनीतिक नैतिकताको उदाहरणका रूपमा व्याख्या गरे भने एक जमातले यसलाई कांग्रेसकाे वर्तमान केन्द्रीय समिति उनको आफ्नै फेवरको भएकाले राजीनामा स्वीकृत नगरेको भने।

अहिले गगन र प्रधानमन्त्री बालेन्द्र शाह  ‘बालेन’ बीच आन्तरिक गोप्य गठबन्धन भइरहेको समेत चर्चा हुने गर्छ । यसबारे न कुनै आधिकारिक कुरा खुलेको छ, न गगनले नै खुलेर राजनीतिक धारणा सार्वजनिक गरेका छन्।

जेनजी आन्दोलनपछि  भएको विशेष महाधिवेशनबाट थापा सभापति चयन भए पनि देउवा र शेखर समूहले त्यसलाई अस्वीकार गरेपछि कांग्रेसभित्र नेतृत्व विवाद चर्किएको छ। यससँगै पार्टी तीन धारमा विभाजित भएको विश्लेषण राजनीतिक वृत्तमा छ । यो बेला समेत गगन बाह्य रुपमा त्यति सक्रिय देखिन्नन्। 

अहिले आमजनचासाेकाे विषय बनेकाे छ- ‘चुनावपछि कहाँ हराए गगन ?’, ‘किन चुप छन् गगन ?’, ‘कस्तो रणनीति बनाउँदैछन् गगन ?’

गगनले कुनै न कुनै रणनीति बनाइरहेकाे विश्लेषकहरु बताउँछन् ।  गगन अब कुन रूपमा प्रस्तुत हुन्छन्, त्यो त समयले नै बताउनेछ।