काठमाडौं । मुलपानी क्रिकेट मैदानमा आजबाट सुरु भएको ‘नेपाल ए एकदिवसीय सिरिज २०२६’ को उद्घाटन खेलमा ओमानले नेपाल ए अगाडि बलियो चुनौती पेस गरेको छ।

टस जितेर पहिले ब्याटिङ गरेको ओमानले निर्धारित ५० ओभरमा ९ विकेट गुमाउँदै २८० रनको प्रतिस्पर्धात्मक स्कोर बनायो।

ओमानका मध्यक्रमका मुजिबुर अली शानदार फर्ममा रहे । उनले ८५ बलमा ४ चौका र ३ छक्कासहित सर्वाधिक ७२ रन जोडे। ओपनर जतिन्दर सिंहले आक्रामक सुरुवात दिलाउँदै ४८ बलमा ५८ रन बनाए।
त्यसैगरी हासिर दफेदारले ४६ रन र आशिष ओडेदराले २७ रनको योगदान दिए।

नेपाल ए का लागि आकाश चन्द उत्कृष्ट बलर साबित भए। उनले ४ विकेट लिए भने सन्तोष यादवले २ विकेट हात पारे। शहाब आलम, रशिद खान र शेर मल्लले एक–एक विकेट लिएर ओमानको रन प्रवाह रोक्न प्रयास गरे।