काठमाडौं । २०२६ आइसीसी महिला टी–२० च्यालेन्ज ट्रफीमा नेपालले रुवान्डालाई २ विकेटले पराजित गर्दै महत्वपूर्ण जित हात पारेको छ। ८९ रनको साधारण लक्ष्य नेपालले १९.४ ओभरमा ८ विकेट गुमाउँदै अन्तिम दुई बल बाँकी छँदा पूरा गर्‍यो।

नेपालको जितमा ओपनर सम्झना खड्का चम्किइन्। उनले ४२ बलमा ७ चौकासहित ४८ रनको शानदार इनिङ्स खेल्दै टोलीलाई जितको आधार तयार गरिन्।
लक्ष्य पछ्याउने क्रममा नेपालले सुरुवाती चरणमै केही विकेट गुमाए पनि पुजा महतो (१३) र बिन्दु रावल (१०) ले आवश्यक साथ दिँदै पारीलाई सम्हाले। तर मध्यक्रम दबाबमा परेको थियो—कप्तान इन्दु बर्मा १ रनमै रनआउट भइन् भने कविता कुँवर शून्यमा आउट भएर नेपाल संकटमा फसेको थियो।

रुवान्डाका लागि जियोभानिस उवासे सर्वाधिक प्रभावकारी बलर साबित भइन्। उनले ३ विकेट लिइन् भने हेन्रिट र गिसेले इसिम्वे ले २–२ विकेट निकाल्दै खेललाई रोमाञ्चक बनाइदिए।

पहिले ब्याटिङ गरेको रुवान्डा १९.४ ओभरमै सबै विकेट गुमाउँदै ८८ रनमा समेटिएको थियो। नेपालका बलरहरूको नियन्त्रण र कडा फील्डिङका कारण रुवान्डा ठूलो स्कोर बनाउन सफल भएन।