झापा। मेची रङ्गशालामा जारी प्रथम ‘ओम साई पाथिभरा हस्पिटल चन्द्रगढी महिला गोल्डकप’ फुटबल प्रतियोगिताअन्तर्गत भएको खेलमा विजयी हुँदै नेपाल पुलिस क्लब सेमिफाइनलमा प्रवेश गरेको छ ।

खेलको सुरुआतमै १० खेलाडीमा सीमित बनेको पुलिसले भारतको रानी लक्ष्मीबाई फुटबल एकेडेमीलाई ५–१ गोलअन्तरले पराजित गर्दै अन्तिम चारमा स्थान सुरक्षित गरेको हो । अब सेमिफाइनलमा पुलिसले त्रिभुवन आर्मी क्लबसँग प्रतिस्पर्धा गर्नेछ ।

खेलको १४औँ मिनेटमा पुलिस १० खेलाडीमा सीमित भएको थियो । गोलकिपर उषा नाथ डि–बक्स बाहिर हातले बल समातेपछि रातो कार्ड पाउँदै मैदानबाट बाहिरिइन् । त्यसपछि बैकल्पिक गोलकिपर सपना राई मैदान प्रवेश गरेकी थिइन् । सोही अवसरमा प्राप्त फ्रि–किकलाई सदुपयोग गर्दै हेमन्ती कुमारीले गोल गरेपछि लक्ष्मीबाईले अग्रता लिएको थियो ।

१–० गोलअन्तरले पछि परेको पुलिसले त्यसपछि खेलमा पुनरागमन गर्दै उत्कृष्ट प्रदर्शन ग¥यो । खेलको ३८औँ मिनेटमा मीना देउवाको क्रसमा रेखा पौडेलले हेडमार्फत गोल गर्दै खेल बराबरी बनाइन् ।

दोस्रो हाफमा पुलिसले आक्रामक खेल प्रदर्शन गर्दै थप चार गोल गरेको थियो । छयालीसौँ मिनेटमा पूजा रानाको कर्नर प्रहार गोलकिपरबाट रिबाउन्ड भएपछि कप्तान अमृता जैसीले गोल गर्दै पुलिसलाई अग्रता दिलाइन् । पुलिसका लागि ५३औँ मिनेटमा सम्झना लावती, ६७ औँ मिनेटमा मीना देउवा र इन्ज्युरी समयमा पूजा रानाले गोल गरिन् ।

खेलको ‘प्लेयर अफ द म्याच’ पूजा राना घोषित भइन् । उनले नगद रु ११ हजार पुरस्कार प्राप्त गरिन् । प्रतियोगिताअन्तर्गत बिहीबार अन्तिम क्वाटरफाइनल खेल सशस्त्र प्रहरीको एपीएफ क्लब र सङ्कटा क्लबबीच हुने आयोजकले जनाएको छ ।

प्रतियोगिताको विजेताले रु ११ लाख तथा उपविजेताले रु पाँच लाख पुरस्कार प्राप्त गर्नेछन् । साथै, सर्वोत्कृष्ट खेलाडीलाई रु ५० हजार तथा उत्कृष्ट गोलकिपर, डिफेन्डर, मिडफिल्डर, फरवार्ड र प्रशिक्षकलाई जनही रु २५ हजार प्रदान गरिनेछ ।