काठमाडौं। युद्धविराम जारी रहँदासमेत इजराइलले लेबननमा आक्रमण गरेको घटनामा एक पत्रकारको ज्यान गएको छ। इसराइल–लेबनन सीमावर्ती अल तायरी क्षेत्रमा रिपोर्टिङ गरिरहेकी ४३ वर्षीया पत्रकार अमल खलिलको मृत्यु भएको हो ।

उनीसँगै रहेकी फोटो पत्रकार जैनब फराज घाइते भएकी छन्।

अन्तर्राष्ट्रिय समाचार संस्था रोयटर्सका अनुसार घटनास्थलमा रिपोर्टिङ गरिरहेका बेला उनीहरू सवार गाडीको अगाडि रहेको अर्को सवारी साधनमा आक्रमण गरिएको थियो। त्यसपछि उनीहरू नजिकैको घरमा आश्रय लिन पुगेका थिए। तर सोही घरमा पुनः आक्रमण हुँदा खलिलको ज्यान गएको बताइएको छ।

घटनापछि उद्धार टोली घटनास्थल पुग्ने प्रयासमा रहे पनि आक्रमण जारी राखेर अवरोध गरिएको आरोप लगाइएको छ। लेबननका पत्रकार संघकी प्रमुख एल्सी मौफार्रेज तथा सैन्य अधिकारीका अनुसार उद्धारकर्मीलाई रोक्न ध्वनि ग्रेनेड प्रहार गरिएको थियो, जसका कारण तत्काल उद्धार सम्भव हुन सकेन। करिब सात घण्टापछि मात्रै खलिलको शव भग्नावशेषबाट निकालिएको जनाइएको छ।

लेबननका प्रधानमन्त्री नवाफ सलामले पत्रकारमाथि भएको आक्रमण र उद्धार कार्यमा अवरोध पुर्‍याउनु युद्ध अपराध भएको टिप्पणी गर्दै यसबारे अन्तर्राष्ट्रिय निकायमा पहल गर्ने बताएका छन्।

यद्यपि, इसरायली सेनाले उद्धार टोलीलाई अवरोध गरेको आरोप अस्वीकार गरेको छ। सेनाले दुई वटा सवारी साधन हिजबुल्लाहसँग सम्बन्धित सैन्य संरचनाबाट निस्केर आफ्ना सैनिकतर्फ बढेको भन्दै सुरक्षा जोखिमका आधारमा आक्रमण गरिएको दाबी गरेको छ। साथै, आफूहरूले पत्रकारलाई लक्षित नगरेको पनि जनाएको छ।

बुधबारको उक्त आक्रमणमा कुल पाँच जनाको मृत्यु भएको लेबननको स्वास्थ्य मन्त्रालयले जनाएको छ। मार्चदेखि सुरु भएको द्वन्द्वमा हालसम्म २,४०० भन्दा बढी मानिसको ज्यान गएको बताइएको छ।

इसराइलले आफ्नो उत्तरी क्षेत्रलाई हिजबुल्लाहका आक्रमणबाट जोगाउन भन्दै सीमावर्ती क्षेत्रमा ‘बफर जोन’ कायम गरिरहेको छ। तर यस्ता आक्रमणले युद्धविरामको प्रभावकारितामाथि प्रश्न उठाएको छ र क्षेत्रीय तनाव झन् बढ्ने संकेत देखिएको छ। दुई देशबीच मार्च १६ मा दस दिनका लागि युद्धविराम घोषणा गरिएको थियो।