काठमाडौं । मधेसी समुदायबाट बालेन्द्र शाह (बालेन) पहिलोपटक प्रधानमन्त्री भएको एक महिना नबित्दै मधेसका नागरिकले सीमामा चरम दमन बेहोरेको भन्दै राष्ट्रियसभा सदस्य महन्थ ठाकुर असन्तुष्ट बनेका छन् ।

उनले मधेसका नागरिक बालेन सरकारविरुद्ध विद्रोहनजिक रहेको चेतावनी दिए । उनले नेपाल–भारत सीमा क्षेत्रमा मधेसका नागरिकविरुद्ध दुव्र्यवहार भएको बताएका छन् ।

राष्ट्रिय सभा अन्तर्गत विकास, आर्थिक मामिला तथा सुशासन समिति बैठकमा बोल्दै ठाकुरले सीमा नाकामा सर्वसाधारणले भोग्नुपरेको सास्ती र राज्यको उदासिनताले गर्दा आफूहरू ‘विद्रोहको नजिक’ पुगेको चेतावनीसमेत दिएका छन्।

मन्त्रीज्युहरू मिटिङमा व्यस्त हुनुहुन्छ, हाम्रो कुरा सुन्ने समय उहाँहरूसँग छैन। हामी विद्रोही त होइनौँ, तर राज्यको यस्तै व्यवहार रहिरहने हो भने हामी विद्रोहको निकै नजिक छौं,’ उनले भने।

एक सय रूपैयाँको सामान ल्याउँदा पनि भन्सार भनेर घन्टौं कुराउने, अनुहार हेरेर व्यवहार गर्ने र मानिसहरूलाई अपमानित गर्ने काम भइरहेको उनले बताए।

खाद्यान्न र नुन–तेलका लागि भारतीय बजारको बाध्यता छ। अहिले गरिब जनता आधा किलो चामल, पीठो, नुन र कुकिङ्ग तेलका लागि सीमा पारि जान बाध्य छन्। त्यही एक–दुई किलो सामान ल्याउँदा पनि सीमामा लुटिने र खोसिने डर छ,’ उनले भने।

नेपाल र भारतबीचको ‘रोटी–बेटी’ को सम्बन्धमा राज्यले कठोर व्यवहार देखाएकोमा उनले आपत्ति जनाएका छन्।

विवाहका गाडीहरूलाई रोक लगाउने र जन्ती–बरीतलाई पैदल हिँडाउन बाध्य पार्ने कार्यले दुई देशको सांस्कृतिक वातावरण बिगारिरहेको पनि उनले बताए।

वर्तमान सरकारलाई ‘हेलिकप्टर सरकार’ को संज्ञा दिँदै उनले राजधानीमा बस्ने मन्त्रीहरूलाई मधेसको भुइँमान्छेको पीडा थाहै बताए।