काठमाडौं । बालेन सरकारसँग रास्वपाकै सांसद रीमा विश्वकर्मा आक्रोशित भएकी छन् । सिन्धुलीका युवक श्रीकृष्ण विकको प्रहरी हिरासतमै भएको मृत्यु प्रकरणमा पीडित पक्षको जाहेरी प्रहरी र सरकारी वकिल कार्यालयले लिन नमानेको भन्दै उनले बालेन सरकारलाई भनेकी छन्,– जनताले न्याय कसरी पाउँछन् सरकार ?

रास्वपा सभापति रवि लामिछानेले धेरै भाबुक नहुन बुधबार मात्रै आफ्ना सांसदहरूलाई निर्देशन दिएका थिए । भोलिपल्टै सांसद विश्वकर्माले श्रीकृष्ण विकको हिरासतमै भएको मृत्यु प्रकरणमा मुख खोलिन् र पीडित परिवारको न्यायको पक्षमा बोलिन् ।

रीमा ती सांसद हुन् जो यसअघि रास्वपाकै सांसदहरू खगेन्द्र सुनार, आशिष गजुरेललगायतसँगै जिल्ला प्रशासन कार्यालय सिन्धुलीको गेटमा धर्ना बस्न पुगेका थिए ।

धर्नापछि दबाबमा परेको बालेन सरकारले नेपाल प्रहरीका डीआईजीको नेतृत्वमा छानबिन समिति गठन गरेको छ, तर, मृतक श्रीकृष्णकी आमा बिन्दासहित पीडित परिवार काठमाडौंको माइतीघर आइपेगेका छन् र उनीहरू पनि दिनहुँ जसो धर्नामा छन् ।

यस्तोमा रीमाले आफ्ना सभापति रविले धेरै भाबुक नहुन दिएको निर्देशनविपरीत आफ्नै पार्टीका प्रधानमन्त्री बालेनलाई जाहेरी प्रहरीले नलिएछि कसरी न्याय पाउने भन्दै गम्भीर प्रश्न गरेकी हुन् ।

प्रहरी गृहमन्त्रालयअन्तर्गत पर्ने निकाय भएको र गृहमन्त्रालयको जिम्मेवारी अहिले प्रधानमन्त्री बालेनले नै लिएका छन् । आफ्नै सांसदहरूले मृतक श्रीकृष्ण विकको परिवारलाई न्यायका लागि दबाब बढाउँदा बालेन चुपचाप छन् ।