काठमाडौं। युरोपियन च्याम्पियन्स लिगअन्तर्गत सेमिफाइनलको पहिलो लेगमा इङ्लिस क्लब आर्सनल र स्पेनिस टोली एट्लेटिको म्याड्रिडले बराबरी खेलेका छन्।

एट्लेटिकोको घरेलु मैदानमा बुधबार राति भएको प्रतिस्पर्धात्मक खेल १–१ गोलको बराबरीमा सकिएको हो। दुवै टोलीले पेनाल्टीमार्फत एक-एक गोल गरेका थिए।

खेलको ४४औँ मिनेटमा आर्सनलले अग्रता लिएको थियो। भिक्टर ग्योकेरेसले पेनाल्टीमा गोल गर्दै टोलीलाई अग्रता दिलाउनुभएको थियो।

तर दोस्रो हाफमा ५६औँ मिनेटमा जुलियन अल्भारेजले पेनाल्टीमै गोल गर्दै एट्लेटिको म्याड्रिडलाई खेलमा बराबरीमा फर्काउनुभयो।

त्यसपछि दुवै टोलीले गोल गर्ने प्रयास गरे पनि थप गोल हुन सकेन। अब सेमिफाइनलको दोस्रो लेग आर्सनलको घरेलु मैदानमा हुनेछ।