काठमाडौं । नेपाल ब्लुले तेस्रो तथा अन्तिम अभ्यास खेलमा नेपाल रेडविरुद्ध डीएलएस (डकवर्थ–लुइस–स्टर्न) आधारमा दुई विकेटको रोमाञ्चक जित निकालेको छ।

यो अभ्यास शृंखलामा नेपाल ब्लुको पहिलो जित हो। यसअघि भएका दुई खेलमा नेपाल रेडले क्रमशः चार रन र एक विकेटको जित हासिल गरेको थियो।

बिहीबार मूलपानी क्रिकेट मैदानमा वर्षाले प्रभावित खेलमा नेपाल ब्लुले ४५ ओभरमा २७२ रनको संशोधित लक्ष्य पाएको थियो। उक्त लक्ष्य टोलीले पाँच बल बाँकी रहँदा आठ विकेट गुमाएर पूरा गर्‍यो।

नेपाल ब्लुका सन्तोष यादवले ७६ रनको उत्कृष्ट पारी खेले। पवन सर्राफले ५० र रुपेश सिंहले अविजित ४९ रन बनाए भने नारायण जोशीले ४२ रनको योगदान दिए।

नेपाल रेडका लागि विशाल पटेलले सर्वाधिक तीन विकेट लिए। शेर मल्ल, अभिषेक गौतम र कुशल मल्लले समान एक–एक विकेट हात पारे।

त्यसअघि पहिले ब्याटिङ गरेको नेपाल रेडले ४९.२ ओभरमा सबै विकेट गुमाएर २७९ रन बनाएको थियो। तृतराज दासले १२५ रनको शतकीय इनिङ खेले भने दीपक डुम्रेले ४३, शुभ कंसकारले ३५ र शंकर रानाले २० रन जोडे।

नेपाल ब्लुका नारायण जोशीले सर्वाधिक चार विकेट लिए। प्रकाश जोशीले तीन विकेट लिँदा शहाब आलमले दुई र पवन सर्राफले एक विकेट लिए।